ତାତି ବଢୁଛି, ହେଲେ ଶୋଷ ମେଣ୍ଟୁନି । ଖରା ସହ ତାଳଦେଇ ବଢୁଛି ଜଳ କଷ୍ଟ । ଲୋକଙ୍କ କାମରେ ଆସୁନି ଲକ୍ଷାଧିକ ଟଙ୍କାର ଜଳ ଯୋଗାଣ ପ୍ରକଳ୍ପ
କନକ ବ୍ୟୁରୋ: ଖରାଦିନରେ ଉତ୍କଟ ଜଳ ସମସ୍ୟା । ଲୋକଙ୍କ ପାଇଁ ପାଣି ଯୋଗାଇବାକୁ ଲକ୍ଷାଧିକ ଟଙ୍କା ବ୍ୟୟବରାଦ ହୋଇଛି । ହେଲେ ନା ପ୍ରକଳ୍ପ କାମ ହୋଇପାରୁଛି ନା ଲୋକଙ୍କୁ ପିଇବାପାଣି ଯୋଗାଯାଉଛି । ପ୍ରତିଦିନ ଡହଡହ ଖରାରେ ମାଇଲ ମାଇଲ ବାଟ ପାଣି ଆଣିବାକୁ ଯାଉଛନ୍ତି ନିଆଳି ବଛସାଇଲୋ ଗ୍ରାମବାସୀ । ତେବେ ଲକ୍ଷାଧିକ ଟଙ୍କା ଖର୍ଚ୍ଚ ହେଉଥିବା କୁହାଯାଉଥିବା ବେଳେ ଟଙ୍କା ଗଲା କୁଆଡେ? ତାକୁ ନେଇ ଉଠିଛି ପ୍ରଶ୍ନ?
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ପଟେ ପିଇବା ପାଣି ପାଇଁ ଲକ୍ଷ ଲକ୍ଷ ଟଙ୍କାରେ ପ୍ରକଳ୍ପ ତ ଅନ୍ୟ ପଟେ ନଳକୂଅ ପାଖେ ବାଲିଟିଏ ପାଣି ପାଇଁ ଘଣ୍ଟା ଘଣ୍ଟାର ଅପେକ୍ଷା । କଟକ ଜିଲ୍ଲା ନିଆଳି ବଛସାଇଲୋ ଗାଁ ଦେବୀ ନଦୀ କୂଳରେ, ତଥାପି ଏଠି କିନ୍ତୁ ପାଣି ଯୋଗୁ ସମସ୍ୟା ବଢିଛି । ଏବେ ଦେବୀ ନଦୀ ରେ ପାଣି ଟୋପାଏ ନଥିବା ବେଳେ ଶୁଖିଲା ପଡିଛି । ଚୈତ୍ରମାସ ମୁଣ୍ଡଫଟା ଖରାରେ ସନ୍ତୁଳି ହେଉଛନ୍ତି ବଛସାଇଲୋ ଗାଁର ୪୦୦ରୁ ଅଧିକ ଲୋକ । ସବୁଠାରୁ ବଡ କଥା ଏହି ଗାଁକୁ ସରକାରଙ୍କ ବସୁଧା ଯୋଜନାରେ ଜଳ ଯୋଗାଣ ପ୍ରକଳ୍ପ ଟାଙ୍କି ନିର୍ମାଣ କରାଯାଇଛି । ପ୍ରତିଘରକୁ ଷ୍ଟାଣ୍ଡପୋଷ୍ଟ ଲଗାଯାଇଥିବା ବେଳେ ପାଇପ୍ କାମ ବି ସରିଛି । ହେଲେ ବି କାର୍ଯ୍ୟକ୍ଷମ ହୋଇପାରିନି ପାନୀୟଜଳ ପ୍ରକଳ୍ପ । ଏଠାରେ ଟାଙ୍କି ନିର୍ମାଣ କରି ଲକ୍ଷ ଲକ୍ଷ ଟଙ୍କା ହରିଲୁଟ କରି ନେଇଥିବା ଗ୍ରାମବାସୀ ଆଣିଛନ୍ତି ଅଭିଯୋଗ ।
ସେପଟେ ପାଣି ନପାଇ ଗାଁ ଲୋକେ ଠିକାଦାର ଓ ସ୍ଥାନୀୟ ଜେଇଙ୍କ ଭିତରେ ମଧୁଚନ୍ଦ୍ରିକା ଥିବା କହିଛନ୍ତି ଗ୍ରାମବାସୀ । ଲକ୍ଷ ଲକ୍ଷ ଟଙ୍କା ଖର୍ଚ୍ଚ ହୋଇ ପ୍ରକଳ୍ପ ତିଆରି ହୋଇଛି ହେଲେ ପାନୀୟଜଳ ପାଇଁ ଖରାଦିନେ ଡହଳବିକଳ ହେଉଛନ୍ତି । ଏହି ପ୍ରକଳ୍ପ ନିର୍ମାଣ ହେବାର ଏକ ବର୍ଷ ରୁ ଅଧିକ ସମୟ ବିତିଯାଇଥିଲେ ମଧ୍ୟ ଏପର୍ଯ୍ୟନ୍ତ ଗାଁରେ ପହଁଚୁନି ପାଣି । ଗାଁରେ ଥିବା ନଳକୂପ ଅଚଳ ହୋଇପଡିଛି । ମାଇଲ ମାଇଲ ତତଲା ବାଲିରେ ପାଣି ପାଇଁ ଯାଉଛନ୍ତି ଲୋକେ । ଟୋପାଏ ପାଣି ପାଇଁ ଡହଳ ବିକଳ ହୋଇ ଅଭିୋଯାଗ ପରେ ଅଭିଯୋଗ ହେଉଛି । ହେଲେ ସମସ୍ୟା ଶୁଣିବାକୁ କେହି ନାହିଁ । ଲକ୍ଷ ଲକ୍ଷ ଟଙ୍କା ପ୍ରକଳ୍ପ କାହା ପାଇଁ ବୋଲି ଗାଁ ଲୋକ ପ୍ରଶ୍ନ ଉଠାଇଥିବା ବେଳେ ତୁରନ୍ତ ଗାଁକୁ ପାଣି ଯୋଗାଇ ଦେବାକୁ ସାଧାରଣ ଲୋକେ ଦାବି କରିଛନ୍ତି ।