କନକ ବ୍ୟୁରୋ: ନାଁ ରାଜେଶ ନାୟକ, ଘର ଭୁବନେଶ୍ୱର । ବିଭିନ୍ନ ଲୋକଙ୍କ ଠାରୁ ନିବେଶ ନାଁରେ ଟଙ୍କା ନେଇ ସେମାନଙ୍କୁ ଚୁନା ଲଗାଇବା ଭଳି ମାଳମାଳ ଅଭିଯୋଗ ରହିଛି ଏହି ବ୍ୟକ୍ତିଙ୍କ ନାଁରେ । କେତେବେଳେ ଟଙ୍କା ନିବେଶ କଲେ ଭଲ ରିଟର୍ଣ୍ଣ ଦେବାର ଲୋଭ ତ, ଆଉ କେତେବେଳେ ବିଜନେସରେ ପ୍ରଫିଟ ସେଆରିଂର ଲାଳସା ଦେଖାଉଥିଲା । ଆଉ ଟଙ୍କା ନେଲା ପରେ ଫେରେଇବାର ନା ଗନ୍ଧ ଧରୁନଥିଲା । କିଛି ଏଭଳି ଢଙ୍ଗରେ ଜଣେ ବ୍ୟକ୍ତି ଓ ଜଣେ ବିବାହିତ ମହିଳାଙ୍କ ଠାରୁ ପାଖାପାଖି କୋଟିଏ ଟଙ୍କା ନେଇଯିବା ପରେ ଆଉ ଧରାଛୁଆଁ ଦେଉନଥିଲା ଠକ ଜଣକ । ଲକ୍ଷ୍ମୀସାଗର ଥାନାରେ ଏନେଇ ଅଭିଯୋଗ ହେବା ପରେ ଠକ ରାଜେଶ ନାୟକକୁ ଗିରଫ କରି କୋର୍ଟ ଚାଲାଣ କରିଛି ପୋଲିସ ।
Kanak News is now on WhatsApp
Join and get latest news updates delivered to you via WhatsApp
ଭୁବନେଶ୍ୱରରେ ରହୁଥିବା ରଶ୍ମିରଞ୍ଜନଙ୍କ ଠାରୁ ଏହି ଠକ ପାଖାପାଖି ୮୦ ଲକ୍ଷ ଟଙ୍କା ହଡପ କରିଥିବା ବେଳେ, ଦେବଶ୍ରୀଙ୍କ ଠାରୁ ପର୍ଯ୍ୟାୟ କ୍ରମେ ପାଖାପାଖି ୩୩ ଲକ୍ଷ ଟଙ୍କା ଚଳୁ କରିଛି । ଜଣେ ବନ୍ଧୁଙ୍କ ମାଧ୍ୟମରେ ଦେବଶ୍ରୀ ଓ ରଶ୍ମିରଞ୍ଜନଙ୍କ ସହ ଅଭିଯୁକ୍ତ ରାଜେଶ ନାୟକର ସାକ୍ଷାତ ହୋଇଥିଲା । ପରବର୍ତ୍ତୀ ସମୟରେ ଉଭୟଙ୍କ ସହ ବନ୍ଧୁତା ନିବିଡ କରିଥିଲା । ଆଉ ସୁଯୋଗ ଦେଖି ଉଭୟଙ୍କୁ ନିଜ ଫାଶରେ ପକାଇଥିଲା ।
- ପ୍ରାରମ୍ଭିକ ପର୍ଯ୍ୟାୟରେ କିଛି ଲାଭ ମଧ୍ୟ ଉଭୟଙ୍କୁ ଦେଇଥିଲା
- ଲାଭ ପାଇବା ପରେ ଅଧିକ ଟଙ୍କା ନିବେଶ କରିଥିଲେ ଦେବଶ୍ରୀ ଓ ରଶ୍ମୀରଞ୍ଜନ
- ଅଧିକ ଟଙ୍କା ହାତେଇବା ପରେ ଆଉ ଧରାଛୁଆଁ ଦେଇନଥିଲା ରାଜେଶ
- ବାରମ୍ବାର ଅନୁରୋଧ କରିବା ପରେ ବି ଟଙ୍କା ଫେରାଉନଥିଲା
କେବଳ ରଶ୍ମିରଞ୍ଜନ ଓ ଦେବଶ୍ରୀ ନୁହନ୍ତି, ବଡବଡିଆ ଓ ଧନୀ ଲୋକଙ୍କୁ କ୍ରମାଗତ ଟାର୍ଗେଟ କରିଆସୁଛନ୍ତି ବିଭିନ୍ନ ଠକ । ପାଖରେ ପୁଳାପୁଳା ଟଙ୍କା ଥିବା ଓ ନିବେଶ କରିବାକୁ ବାଟ ଖୋଜୁଥିବା ବ୍ୟକ୍ତିଙ୍କୁ ମୁଖ୍ୟତଃ ଟାର୍ଗେଟ କରୁଛନ୍ତି । ଆଉ ସେମାନଙ୍କ ଜାଲରେ ଅତି ଆରାମରେ ଫସିଯାଉଛନ୍ତି ଏଭଳି ଧନୀ ବ୍ୟକ୍ତି ।