ଘଡେଇଙ୍କ ‘ନଗଡା’ ପ୍ରେମ ! ଅପପୁଷ୍ଟିର ଉପତ୍ୟକାରେ ପାଳିଲେ ଜନ୍ମଦିନ, ସାଧାରଣରେ ପ୍ରଶ୍ନ, ଆଜି ଯାଏଁ ନେତା ଥିଲେ କେଉଁଠି
କନକ ବ୍ୟୁରୋ : ଜନ୍ମଦିନରେ ମନେପଡିଲା ଅପପୁଷ୍ଟିର ଉପତ୍ୟକା । ମନ୍ତ୍ରୀ ଥିବା ବେଳେ ଯେଉଁ ମାଟିରେ କେବେ ପାଦ ପଡିନଥିଲା ସେଠି ନେତା ପାଳିଲେ ଜନ୍ମଦିନ । ନଗଡାର ପାହାଡି ଇଲାକାରେ ପୂର୍ବତନ ଅର୍ଥମନ୍ତ୍ରୀ ପ୍ରଫୁଲ ଘଡେଇ ପାଳିଛନ୍ତି ୭୭ତମ ଜନ୍ମଦିନ । ଅପପୁଷ୍ଟିର ଶୀକାର ନଗଡାବାସୀଙ୍କୁ ନେତା କମ୍ବଳ ବାଂଟିଛନ୍ତି , ମିଠା କଥା କହିଛନ୍ତି । ଏଥିସହ ପୁଣି ଥରେ ଆରମ୍ଭ ହୋଇଛି ନଗଡାକୁ ନେଇ ରାଜନୀତି ।
Kanak News is now on WhatsApp
Join and get latest news updates delivered to you via WhatsApp
ଯେଉଁ ଅଂଚଳରୁ ଲୋକମାନଙ୍କ ଭୋଟ ପାଇ ବିଧାନସଭାକୁ ଆସି ସର୍ବାଧିକ ସମୟ ଧରି ଅର୍ଥମନ୍ତ୍ରୀ ରହିଲେ, ସେହି ଇଲାକାର ବିକାଶ କଣ ହୋଇଥିଲା, ତାକୁ ସାରା ଦୁନିଆ ଦେଖିଲା । ଆଉ ଏବେ ସରକାର ରାସ୍ତା କରି, ବିକାଶ ପହଂଚାଇବା ପରେ ପ୍ରଫୁଲ୍ଲ ଘଡେଇ ନଗଡାରେ ପାଳିଛନ୍ତି ଜନ୍ମଦିନ । ନିଜର ୭୭ ତମ ଜନ୍ମଦିନକୁ ପାଳନ କରିବାକୁ ନଗଡା ଯାଇଥିଲେ ଘଡେଇ, ଯେଉଁ ଇଲାକାକୁ ନିଜେ ବିଧାୟକ ଥିବା ବେଳେ ଦିନଟିଏ ମଧ୍ୟ ଯାଇପାରିନଥିଲେ । ଏତେ ଦିନଧରି ନା ନଗଡାକୁ ରାସ୍ତା ହୋଇପାରିଥିଲା, ନା ସରକାର ପହଂଚି ପାରିଥିଲେ ନା ଘଡେଇ ପାହାଡି ରାସ୍ତା ଦେଇ ନଗଡାରେ ପହଂଚି ପାରିଥିଲେ ।
ଘଡେଇଙ୍କୁ ୭୬ ବର୍ଷ ପୁରିଲା । ନଗଡାରେ ଜନ୍ମଦିନ ପାଳିବା ଆଉ କମ୍ବଳ ବାଂଟିବା ବେଳେ ନେତାଙ୍କ ସ୍ପର୍ଶରେ ପୁଣି ରାଜନୀତି ଆରମ୍ଭ ହୋଇଛି । ପ୍ରଶ୍ନ ଉଠୁଛି
– ପ୍ରଫୁଲ୍ଲ ଘଡେଇ ଏତେ ଦିନ ଥିଲେ କେଉଁଠି?
– ନଗଡା ମାଟିରେ ଜନ୍ମଦିନ ପାଳିବାକୁ ଘଡେଇଙ୍କୁ ଏତେ ବର୍ଷ ଲାଗିଲା କାହିଁକି?
ଗତକିଛି ଦିନ ପୂର୍ବେ ଅପପୁଷ୍ଟିର ଉପତ୍ୟକା ପାଳଟିଥିଲା ନଗଡା । ପୂରା ବିଶ୍ୱ ଦେଖିଥିଲା ନଗଡାର ନଗ୍ନ ଚିତ୍ର । ଅପହଞ୍ଚ ଇଲାକାରେ ଅପପୁଷ୍ଟିର ଶିକାର ହୋଇଥିବା ଶିଶୁଙ୍କ କାନ୍ଦ ନଗଡା ପାହାଡ ଡେଇଁ ପହଞ୍ଚି ପାରୁନଥିଲା ସରକାରୀ ବାବୁଙ୍କ ନିକଟରେ । ତେବେ ଅପପୁଷ୍ଟିର ଶିକାର ହୋଇ ନଗଡାରେ ଶିଶୁମୃତ୍ୟୁ ଖବର ଗଣମାଧ୍ୟମରେ ପ୍ରକାଶ ପାଇବା ପରେ ସରକାର ମିଶନ ମୋଡରେ କାମ କରି ନଗଡାକୁ ରାସ୍ତା କଲେ, ଆବଶ୍ୟକୀୟ ସୁବିଧା ପହଂଚାଇଲେ । ଆଉ ଏହି ରାସ୍ତାରେ ନଗଡା ପହଂଚି ଘଡେଇ ପାଳିଲେ ଜନ୍ମଦିନ ।
ମିଡିଆର ହୋହଲ୍ଲା ଆଉ ଚାପ ପରେ ନଗଡାର ଅବସ୍ଥା ସୁଧୁରିଛି, ଆଉ ଜନ୍ମଦିନର ଉତ୍ସବ ପାଳିବାକୁ ଆଉ ନଗଡାବାସୀଙ୍କୁ ସ୍ନେହ ଦେବାକୁ ଘଡେଇ ପହଂଚିବା ପୁଣି ରାଜନୀତିକୁ କ୍ରିୟାଶୀଳ କରିଛି ।