୧୧ ଦିନରେ ପହଂଚିଲା ଶିକ୍ଷକ ଆନ୍ଦୋଳନ ! ବ୍ଳକ୍ ଗ୍ରାଂଟ ପ୍ରଥା ଉଚ୍ଛେଦ ଦାବିରେ ଶିକ୍ଷକ ଓ ଅଧ୍ୟାପକଙ୍କ ଅହୋରାତ୍ର ଧାରଣ
କନକ ବ୍ୟୁରୋ: ବ୍ଳକ୍ ଗ୍ରାଂଟ ଭଳି ଘୃଣ୍ୟ ପ୍ରଥାର ଉଛେଦ ଦାବିରେ ବ୍ଲକଗ୍ରାଂଟ ଶିକ୍ଷକଙ୍କ ଓ ଆନ୍ଦୋଳନ ୧୧ ଦିନରେ ପହଁଚିଛି । ଲୋୟର ପିଏମଜିରେ ଅହୋରାତ୍ର ଧାରଣାରେ ବସିଛନ୍ତି ଶିକ୍ଷକ ଓ ଅଧ୍ୟାପକ । ଫଳରେ ୫ ହଜାର ବ୍ଲକଗ୍ରାଣ୍ଟ ସ୍କୁଲ, କଲେଜରେ ପାଠପଢ଼ା ବନ୍ଦ। ସରକାରଙ୍କ ସହ ତିନି ଥର ଆଲୋଚନା ପରେ ବି ସମାଧାନର ବାଟ ନ ବାହାରିବାରୁ ଆନ୍ଦୋଳନ ଜାରି ରଖିଛନ୍ତି ୬୦ ହଜାର ଶିକ୍ଷକ ।
Kanak News is now on WhatsApp
Join and get latest news updates delivered to you via WhatsApp
ସାରା ଦେଶରେ ଗତକାଲି ବିଘ୍ନ ବିନାଶକ ଗଜାନନଙ୍କ ଆରାଧନା ଚାଲିଥିବା ବେଳେ ବ୍ଲକଗ୍ରାଣ୍ଟ ସ୍କୁଲ, କଲେଜରେ ସବୁ କିଛି ଠପ୍ ହୋଇଯାଇଛି । ଶିକ୍ଷାନୁଷ୍ଠାନକୁ ପୂଜା କରିବାକୁ ଆସି ନିରାଶ ହୋଇ ଫେରିଛନ୍ତି ଛାତ୍ରଛାତ୍ରୀ । ତେବେ କେତେକ ସ୍କୁଲରେ ଛାତ୍ରଛାତ୍ରୀ ଶିକ୍ଷକଙ୍କ ବିନା ଗଣେଶଙ୍କ ପୂଜା କରିଥିବାବେଳେ ଧାରଣାରତ ଶିକ୍ଷକମାନେ ରାଜଧାନୀ ରାଜରାସ୍ତାରେ ଗଜାନନଙ୍କ ଆରାଧନା କରିଛନ୍ତି । ଅନ୍ୟପକ୍ଷରେ ଓଡ଼ିଶା ସ୍କୁଲ କଲେଜ ଶିକ୍ଷକ କର୍ମଚାରୀ ମିଳିତ ମଞ୍ଚ ପକ୍ଷରୁ ଚାଲିଥିବା ଧାରଣା ସ୍ଥଳରେ ଗତକାଲ ଆଉ ୩ ଜଣ ଶିକ୍ଷକ ଅସୁସ୍ଥ ହୋଇପଡ଼ିଥିଲେ । ସେମାନଙ୍କୁ ଚିକିତ୍ସା ଲାଗି ହସ୍ପିଟାଲରେ ଭର୍ତ୍ତି କରାଯାଇଥିଲା ।
ପୂର୍ବ ନିଷ୍ପତ୍ତି ଅନୁଯାୟୀ, ଲୋୟର ପିଏମଜିସ୍ଥିତ ଧାରଣାସ୍ଥଳରେ ଶିକ୍ଷକ, ଅଧ୍ୟାପକ, କର୍ମଚାରୀମାନେ ଏକାଠି ହୋଇ ରୀତିନୀତି ଅନୁଯାୟୀ ପୂଜାର୍ଚ୍ଚନା କରିଥିଲେ । ପୂର୍ବାହ୍ନରେ ଧାରଣାସ୍ଥଳରେ ହଜାର ହଜାର ଶିକ୍ଷକଙ୍କ ସମାଗମ ହେବା ପରେ ହରିବୋଲ, ହୁଳହୁଳିରେ ପ୍ରକମ୍ପିତ ହୋଇଉଠିଥିଲା ସାରା ଅଞ୍ଚଳ । ତେବେ ପିଲାଙ୍କ ସହ ବିଦ୍ୟାଳୟରେ ଗଣେଶ ପୂଜା କରିବାରୁ ବଞ୍ଚିତ ହୋଇଥିବାରୁ ଏଥିପାଇଁ ସେମାନେ ରାଜ୍ୟ ସରକାରଙ୍କୁ ଦାୟୀ କରିଥିଲେ ।
ମିଳିତ ମଞ୍ଚର ଆବାହକ ମଣ୍ଡଳୀ ସଦସ୍ୟ ଗୋଲକ ନାୟକ, ପ୍ରକାଶ ଚନ୍ଦ୍ର ମହାନ୍ତି, ପବିତ୍ର ମହାଲା କହିଛନ୍ତି ଯେ, ସରକାର ଆଲୋଚନା କରି ପୂର୍ବ ନିଷ୍ପତ୍ତି ଦୋହରାଉଛନ୍ତି । ପୂର୍ବଭଳି ପ୍ରତିଶ୍ରୁତି ଦେଇ ଶିକ୍ଷକମାନଙ୍କୁ ଠକିବାର ମସୁଧାରେ ଅଛନ୍ତି । ଚାକିରି ସର୍ତ୍ତାବଳୀ ନ ଦେଇ ବ୍ଲକଗ୍ରାଣ୍ଟ ଉଚ୍ଛେଦ କରିବା କଥା କହିବା ଏକ ପ୍ରହେଳିକା । ଏହାର ଦୃଢ଼ ଜବାବ ଦିଆଯିବ । ଆଲୋଚନା ସମୟରେ ୨୦୧୮ ଏପ୍ରିଲ ବେଳକୁ ଅନୁଦାନ ଦେବେ ବୋଲି ରାଜ୍ୟ ସରକାର ପ୍ରସ୍ତାବ ଦେଇଥିଲେ । ବ୍ଲକଗ୍ରାଣ୍ଟ ପାଉଥିବା ଅନେକ ଶିକ୍ଷକ, ଅଧ୍ୟାପକ ୨୫ ବର୍ଷରୁ ଊର୍ଦ୍ଧ୍ୱ ସମୟ ଖଟି ସାରିଲେଣି । ଆସନ୍ତା ୫ରୁ ୭ ବର୍ଷ ମଧ୍ୟରେ ୭୦ ଭାଗ ଶିକ୍ଷକ ଅବସର ନେଇଯିବେ । ଅଥଚ ସରକାର ଚାକିରି ସର୍ତ୍ତାବଳୀ ଦେବାକୁ ନାରାଜ । ୨୦୦୪ରୁ ୨୦୧୬ ମଧ୍ୟରେ ଏକାଧିକ ଥର ପ୍ରତିଶ୍ରୁତି ଦେଇ ସରକାର ପ୍ରତାରଣା କରି ସାରିଛନ୍ତି । ତେଣୁ ଶିକ୍ଷକମାନେ ଆଉ ବିଶ୍ୱାସ କରୁନାହାନ୍ତି ।
ସୁପ୍ରିମକୋର୍ଟଙ୍କ ନିର୍ଦେଶ ଅନୁଯାୟୀ, ଯେଉଁଦିନଠାରୁ ଯୋଗ୍ୟ ବିବେଚିତ ହୋଇଛନ୍ତି ସେହିଦିନଠାରୁ ବରିଷ୍ଠତାକୁ ଗୁରୁତ୍ୱ ଦେଇ ଚାକିରି ସର୍ତ୍ତାବଳୀ ସହ ଗତ ୨୦୧୭ ଜୁନ୍ ୧ରୁ ନୋସ୍ନାଲି ଦରମା ଧାର୍ଯ୍ୟ କରି ପୂର୍ଣ୍ଣ ଅନୁଦାନ ଦିଆ ନ ଗଲେ କାର୍ଯ୍ୟ ବନ୍ଦ ଆନ୍ଦୋଳନ ଜାରି ରହିବ । ସୋମବାରଠାରୁ ସମସ୍ତ ବର୍ଗର ଶିକ୍ଷକ, କର୍ମଚାରୀ ରାଜରାସ୍ତାକୁ ଓହ୍ଲାଇବେ । ଦରକାର ପଡ଼ିଲେ ସମସ୍ତ ସ୍କୁଲ, କଲେଜରେ ପାଠପଢ଼ା ବନ୍ଦ କରି ଦିଆଯିବ ବୋଲି ସେମାନେ କହିଛନ୍ତି । ବିଦ୍ୟାଳୟ, କଲେଜରେ ଛାତ୍ରଛାତ୍ରୀ ଗଣେଶ ପୂଜା କରିପାରି ନ ଥିବାରୁ ମିଳିତ ମଞ୍ଚ ଦୁଃଖ ପ୍ରକାଶ କରିଛି ।