ଜଳୁଛି ହରିୟାଣା ଓ ପଂଜାବ ! ଡେରା ସମର୍ଥକଙ୍କ ହିଂସାକାଣ୍ଡରେ ୩୧ମୃତ, ଶତାଧିକ ଆହତ, ବିଭିନ୍ନ ସ୍ଥାନରେ କର୍ଫ୍ୟୁ ଜାରି
କନକ ବ୍ୟୁରୋ: ରେପିଷ୍ଟ ବାବା ରାମ ରହିମଙ୍କ ସମର୍ଥକଙ୍କ ଗୁଣ୍ଡାଗର୍ଦି । ଫଳରେ ହରିୟାଣା ଓ ପଞ୍ଜାବରେ ସ୍ଥିତି ଅଣାୟତ୍ତ ହୋଇଛି । ହରିୟାଣାର ପଂଚକୁଲାରେ ଅଣାୟତ୍ତ ହେଉଛି ସ୍ଥିତି । ରାତିସାରା ପୋଲିସ ଫ୍ଲାଗମାର୍ଚ୍ଚ କରିଛି । ବର୍ତ୍ତମାନ ସୁଦ୍ଧା ମୃତ୍ୟୁସଂଖ୍ୟା ୩୦ରେ ପହଂଚିଲାଣି । ରାମ ରହିମଙ୍କ ଭଡ଼ାଟିଆ ଗୁଣ୍ଡାଙ୍କ ହିଂସାକାଣ୍ଡରେ କୋଟି କୋଟି ଟଙ୍କାର ସମ୍ପତି ନଷ୍ଟ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଭଡ଼ାଟିଆ ଗୁୁଣ୍ଡାଙ୍କ ହିଂସାକାଣ୍ଡରେ ଏଭଳି କ୍ଷତି ହୋଇଛି ଯେ, କୋର୍ଟ ରେପିଷ୍ଟ ବାବାଙ୍କ ସବୁ ସମ୍ପତି ଆଟାଚ କରିବାକୁ ନିର୍ଦ୍ଦେଶ ଦେଇଛନ୍ତି । କିନ୍ତୁ ରାଜ୍ୟର ଖଟ୍ଟର ସରକାର କହୁଛନ୍ତି ପରିସ୍ଥିତି ନିୟନ୍ତ୍ରଣାଧୀନ ରହିଛି । ପଂଜାବ ଓ ହରିୟାଣାର ବିଭିନ୍ନ ସହରରେ କଫ୍ୟୁ ଲଗାଯାଇଛି । ଦିଲ୍ଲୀରେ ହାଇଆଲର୍ଟ ଜାରି କରାଯାଇଛି । ଉତ୍ତରପ୍ରଦେଶର ନୋଇଡା, ଗାଜିଆବାଦ, ମୁଜାଫରନଗର, ବାଗପତ ଏବଂ ସାମଲି ଜିଲ୍ଲାରେ ୧୪୪ ଧାରା ଜାରି କରାଯାଇଛି । ହରିଆଣା ଓ ପଂଜାବରେ ରାଜ୍ୟ ପୁଲିସ ସହ ୬୦୦ ସେନା ଯବାନ ଓ ୧୦ କଂପାନୀ ସିଆରପିଏଫ୍ ମୁତୟନ କରାଯାଇଛି । ଡୋରା ସଚ୍ଚା ସୌଦାର ହଜାର ସମର୍ଥକଙ୍କୁ ହାଜତକୁ ନିଆଯାଇଛି ।
ହରିଆଣା ମୁଖ୍ୟମନ୍ତ୍ରୀ ମନୋହରଲାଲ ଖଟାରା ପଂଚକୁଲାରେ ହିଂସାସ୍ଥଳ ବୁଲିବା ସହ ସ୍ଥିତିର ସମୀକ୍ଷା କରିଛନ୍ତି । ସେପଟେ ହରିଆଣା, ପଂଜାବ ଓ ଦିଲ୍ଲୀରେ ଉତେଜନାକୁ ଦେଖି ଆଜି ଜରୁରିକାଳୀନ ବୈଠକ ଡାକିଛନ୍ତି କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂ । ଆଜି ୧୧ଟାରେ ଏହି ବୈଠକ ହେବ । ପ୍ରଧାନମନ୍ତ୍ରୀ ମୋଦିଙ୍କୁ ସ୍ଥିତିର ସୂଚନା ଦିଆଯାଇଛି । ଏପଟେ ବ୍ୟାପକ ହିଂସାକାଣ୍ଡକୁ ଦେଖି ବାବା ରାମରହିମଙ୍କୁ ହେଲିକପ୍ଟର ଯୋଗେ ରୋହତକରେ ଥିବା ପୋଲିସ ଟ୍ରେନିଂ ସେଂଟରରେ ଏକ ଅସ୍ଥାୟୀ ଜେଲରେ ରଖାଯାଇଛି ।
ସୂଚନା ମୁତାବକ, ଦୁଷ୍କର୍ମ ଅଭିଯୋଗରେ ବାବା ରାମ ରହିମଙ୍କୁ ଦୋଷୀ ସାବ୍ୟସ୍ତ କରିଛନ୍ତି ପଞ୍ଚକୁଳାର ସ୍ୱତନ୍ତ୍ର ସିବିଆଇ କୋର୍ଟ । ଦୀର୍ଘ ୧୫ ବର୍ଷ ପରେ ଡେରା ପ୍ରମୁଖ ବାବା ରାମ ରହିମଙ୍କ ବିରୋଧରେ ଲାଗିଥିବା ଯୌନ ନିର୍ଯ୍ୟାତନା ମାମଲାରେ ଗତକାଲି ରାୟ ପ୍ରକାଶ ପାଇଥିଲା । ସ୍ୱାଧୀଙ୍କୁ ଯୌନ ନିର୍ୟ୍ୟାତନା ମାମଲାରେ ୩୭୬ ଧାରା ଅନୁଯାୟୀ ବାବାଙ୍କୁ ଦୋଷୀ ସାବ୍ୟସ୍ତ କରିଛନ୍ତି ସିବିଆଇର ସ୍ୱତନ୍ତ୍ର କୋର୍ଟ । ଆସନ୍ତା ୨୮ରେ ଏହି ମାମଲାରେ ଦଣ୍ଡାଦେଶ ଶୁଣାଇବେ ସିବିଆଇର ସ୍ୱତନ୍ତ୍ର କୋର୍ଟ । ତେବେ ରାମ ରହିମଙ୍କ ଜେଲ ଯିବାକୁ କେନ୍ଦ୍ର କରି ବ୍ୟାପକ ହିଂସାକାଣ୍ଡ ଭିଆଇଛନ୍ତି ବାବାଙ୍କ ସମର୍ଥକ ।