ବିରୋଧ ପ୍ରଦର୍ଶନର ପ୍ରଭାବ : ରଦ୍ଦହେଲା କୁସ୍ତିସଂଘର ବୈଠକ, ଅଟକିଲା ଗୋଣ୍ଡା ରାଙ୍କିଙ୍ଗ ଟୁର୍ଣ୍ଣାମେଣ୍ଟ
କନକ ବ୍ୟୁରୋ : କୁସ୍ତି ମହାସଂଘ ବିରୋଧରେ ଅଭିଯୋଗ ଆସିବା ଓ ଏହାକୁ ନେଇ କିଛି ଖେଳାଳୀ ଧାରଣାରେ ବସିବା ପରେ ଆକ୍ସନମୋଡକୁ ଆସିଛି ଖେଳ ମନ୍ତ୍ରଣାଳୟ । ଯାଂଚ ନିଷ୍ପତ୍ତି ଓ କମିଟି ଗଠନ ନେଇ ଘୋଷଣା ପରେ ଶନିବାର ଦିନ ଖେଳ ମନ୍ତ୍ରଣାଳୟ ଦୁଇଟି ବଡ ନିଷ୍ପତ୍ତି ନେଇଛି । ପ୍ରଥମେ କୁସ୍ତି ମହାସଂଘର ସହ ସଂପାଦକ ବିନୋଦ ତୋମରଙ୍କୁ ନିଲମ୍ବିତ କରାଯାଇଛି । ବିନୋଦ ତୋମରଙ୍କ ଉପରେ ଅନୁଶାସନହୀନତା ପାଇଁ କାର୍ଯ୍ୟାନୁଷ୍ଠାନ ନିଆଯାଇଥିବା କଥା କୁହାଯାଇଛି । ଏହାସହ ଗୋଣ୍ଡାରେ ଚାଲିଥିବା ରାଙ୍କିଙ୍ଗ ଟୁର୍ଣ୍ଣାମେଣ୍ଟକୁ ରଦ୍ଦ କରାଯାଇଛି । କେବଳ ସେତିକି ନୁହେଁ ଆଜି ଅଯୋଧ୍ୟାରେ ହେବାକୁ ଥିବା କୁସ୍ତିମହାସଂଘର ସାଧାରଣ କମିଟି ବୈଠକକୁ ବି ରଦ୍ଦ କରାଯାଇଛି । ଏବେ ଆସନ୍ତା ୪ ସପ୍ତାହ ମଧ୍ୟରେ ଏହି ବୈଠକ ହୋଇପାରିବ ନାହିଁ ବୋଲି କୁହାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଖେଳ ମନ୍ତ୍ରଣାଳୟ ତରଫରୁ ଗୋଣ୍ଡା ଠାରେ ଚାଲିଥିବା ରାଙ୍କିଙ୍ଗ ଟୁର୍ଣ୍ଣାମେଣ୍ଟ ରଦ୍ଦ ହେବାରୁ ଅନ୍ୟ ରାଜ୍ୟରୁ ଆସିଥିବା ଖେଳାଳୀମାନେ କ୍ଷୋଭ ପ୍ରକାଶ କରିଛନ୍ତି । ଏହାସହ ସେମାନେ ମନ୍ତ୍ରଣାଳୟ ଉର୍ଦ୍ଦେଶ୍ୟରେ ଚିଠି ମଧ୍ୟ ଲେଖିଛନ୍ତି । ଏଥିରେ ସେମାନେ ଖେଳ ପୂର୍ବରୁ ଜମା କରିଥିବା ପ୍ରବେଶ ଦେୟ ଫେରସ୍ତ ଦେବାକୁ ଦାବି କରିଛନ୍ତି ।
କୁସ୍ତି ମହାସଂଘର ସହ ସଂପାଦକ ବିନୋଦ ତୋମର ଗୋଟିଏ ଦିନ ପୂର୍ବରୁ କୁସ୍ତି ମହାସଂଘର ସଂପାଦକ ବ୍ରିଜଭୂଷଣ ଶରଣ ସିଂଙ୍କ ସମର୍ଥନରେ ବୟାନ ଦେଇଥିଲେ । ସେ କହିଥିଲେ କି ଖେଳାଳୀଙ୍କ ତରଫରୁ ବ୍ରିଜଭୂଷଣଙ୍କ ଉପରେ ଲଗାଯାଇଥିବା ସମସ୍ତ ଅଭିଯୋଗ ମିଥ୍ୟା ।
ଅନ୍ୟପଟେ ଖେଳ ମନ୍ତ୍ରଣାଳୟ ତରଫରୁ ଯାଂଚ କମିଟି ଗଠନ କରାଯିବା ନେଇ ଘୋଷଣା ହୋଇଛି । କ୍ରୀଡା ମନ୍ତ୍ରଣାଳୟ ଓ ଖେଳାଳୀଙ୍କ ମଧ୍ୟରେ ହୋଇଥିବା ଆଲୋଚନାରେ ବ୍ରିଜ ଭୂଷଣ ଏବେ ଅଧ୍ୟକ୍ଷ ଭାବେ କୌଣସି କାର୍ଯ୍ୟରେ ହସ୍ତକ୍ଷେପ କରିପାରିବେ ନାହିଁ ବୋଲି ନିଷ୍ପତ୍ତି ହୋଇଛି ।