ନୱାଜଙ୍କ ଭାଇ ଶେହବାଜ ସରିଫ ହେବେ ପାକିସ୍ତାନର ନୂଆ ପ୍ରଧାନମନ୍ତ୍ରୀ ! ପିଏମଏଲ-ଏନର ଉଚ୍ଚସ୍ତରୀୟ ବୈଠକରେ ହେଲା ନିଷ୍ପତ୍ତି
କନକ ବ୍ୟୁରୋ: ଶେହବାଜ ସରିଫ ହେବେ ପାକିସ୍ତାନର ନୂଆ ପ୍ରଧାନମନ୍ତ୍ରୀ । ନୱାଜ ସରିଫଙ୍କ ଇସ୍ତଫା ପରେ ତାଙ୍କ ସାନ ଭାଇ ଶେହବାଜ ସରିଫ ଦେଶର ପରବର୍ତ୍ତି ପ୍ରଧାନମନ୍ତ୍ରୀ ହେବେ । ନୱାଜ ସରିଫଙ୍କ ପାର୍ଟି ପାକିସ୍ତାନ ମୁସଲିମ୍ ଲିଗ୍-ନୱାଜ ବା ପିଏମଏଲ-ଏନର ଉଚ୍ଚସ୍ତରୀୟ ବୈଠକରେ ଏହି ନିଷ୍ପତ୍ତି ନିଆଯାଇଛି । ଦଳର ଶୀର୍ଷ ନେତୃତ୍ୱ ଶେହବାଜ ସରିଫ ପ୍ରଧାନମନ୍ତ୍ରୀ ହେବେ ବୋଲି ଘୋଷଣା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ଶେହବାଜ ପାକିସ୍ତାନୀ ସଂସଦର ତଳିଆ ସଦନ ନ୍ୟାସନାଲ ଆସେମ୍ବ୍ଲିର ସଦସ୍ୟ ହୋଇ ନଥିବାରୁ ତୁରନ୍ତ ପ୍ରଧାନମନ୍ତ୍ରୀ ହୋଇପାରିବେ ନାହିଁ । ଯେଉଁଥିପାଇଁ ୪୫ ଦିନ ପାଇଁ ଅନ୍ୟ କାହାକୁ ଅନ୍ତରୀଣ ପ୍ରଧାନମନ୍ତ୍ରୀ ଭାବେ ପଦ ସମ୍ଭାଳିବାକୁ ପଡିବ । କାହାକୁ ଅନ୍ତରୀଣ ପ୍ରଧାନମନ୍ତ୍ରୀ କରାଯିବ ସେନେଇ ଆଜି ବୈଠକରେ ନିଷ୍ପତି ନିଆଯିବ । ତେବେ ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖ୍ୱାଜା ଆସିଫଙ୍କୁ ଅନ୍ତରୀଣ ପ୍ରଧାନମନ୍ତ୍ରୀ କରାଯିବାର ସମ୍ଭାବନା ରହିଛି ।
ଏଠାରେ ଆମେ କହିରଖୁଛୁ କି, ଆର୍ଥିକ ଅନିୟମିତତା, ଦୁର୍ନୀତି ଓ ବିଦେଶରେ ସମ୍ପତି ରଖିବା ଅଭିଯୋଗରେ ଗତକାଲି ପାକିସ୍ତାନ ସୁପ୍ରିମକୋର୍ଟରେ ଦୋଷୀ ସାବ୍ୟସ୍ତ ହୋଇଛନ୍ତି ନୱାଜ ସରିଫ୍ । ତେବେ ବିଦେଶରେ ସମ୍ପତି ରଖିବା ଅଭିଯୋଗ ନେଇ ପାନାମା ପେପରରେ ସରିଫଙ୍କ ନାଁ ପ୍ରକାଶ ପାଇଥିଲା । ପରେ ପାକିସ୍ତାନର ରାଜନୈତିକ ଦଳ ତଥା ଆବାମୀ ମୁସଲିମ ଲିଗ୍ , ଜମାତ ଏ ଇସଲାମୀ ପକ୍ଷରୁ ସୁପ୍ରିମକୋର୍ଟରେ ମାମଲା ଦାଖଲ ହୋଇଥିଲା । ୧୯୯୦ରେ ପ୍ରଧାନମନ୍ତ୍ରୀ ନୱାଜ ସରିଫ ବିଦେଶରେ ଗୁପ୍ତ ଭାବରେ ସମ୍ପତି ରଖିଥିବା ନେଇ ପାନାମା ପେପରରେ ପ୍ରକାଶ ପାଇଥିଲା । ଗତବର୍ଷ ପାନାମା ପେପରରେ ବିଶ୍ୱର ବହୁ ନାମୀଦାମୀ, ପ୍ରତିଷ୍ଠିତ ବ୍ୟକ୍ତିମାନେ ନିଜର ସମ୍ପତି ଗୋପନଭାବେ ବିଦେଶରେ ରଖିଥିବା ନେଇ ତଥ୍ୟ ପ୍ରକାଶ ପାଇଥିଲା ।
ଏନେଇ ସୁପ୍ରିମକୋର୍ଟରେ ମାମଲା ରୁଜୁ ହେବା ସହ ଜେଆଇଟିକୁ ତଦନ୍ତ ଭାର ଦିଆଯାଇଥିଲା । ବିଚାର ପରେ ଶେଷରେ ନୱାଜ ସରୀଫଙ୍କୁ ଦୋଷୀ ସାବ୍ୟସ୍ତ କରିଥିଲେ ୫ଜଣିଆ ଖଣ୍ଡପୀଠ । ୧୯୯୦ରେ ଦ୍ୱିତୀୟଥର ପାଇଁ ପ୍ରଧାନମନ୍ତ୍ରୀ ଥିବାବେଳେ ନୱାଜ ସରିଫ ବିଦେଶରେ ଗଲ୍ଫ ଷ୍ଟିଲ ମିଲ୍, ବିଶେଷ କରି ଲଣ୍ଡନରେ ଗୁପ୍ତ ଭାବରେ ସଂପତି ରଖିଥିବା ନେଇ ପାନାମା ପେପରରେ ପ୍ରକାଶ ପାଇଥିଲା ।
ଗତବର୍ଷ ବ୍ରିଟେନରେ ପାନାମା ପେପରରେ ବିଶ୍ୱର ୧୪୦ରୁ ଅଧିକ ନେତା ଓ ବହୁ ନାମିଦାମୀ, ପ୍ରତିଷ୍ଠିତ ବ୍ୟକ୍ତିମାନେ ନିଜର ସଂପତି ଗୋପନଭାବେ ବିଭିନ୍ନ ଦେଶରେ ଲୁଚାଇ ରଖିଥିବା ଲକ୍ଷ ଲକ୍ଷ ପୃଷ୍ଠାର ତଥ୍ୟ ପ୍ରକାଶ ପାଇଥିଲା । ଯେଉଁଥିରେ ସରିଫଙ୍କ ନାମ ପ୍ରକାଶ ପାଇଥିଲା । ସରିଫଙ୍କର ଲଣ୍ଡନରେ ୪ଟି ଦାମି ଘର ସହ ଆଠଟି ସଂପତି ଥିବା ଅଭିଯୋଗ ଆସିଥିଲା । ଯେଉଁଥିରେ ପାକିସ୍ତାନ ବିରୋଧି ଦଳ ଟ୍ୟାକ୍ସ ଚୋରିହୋଇଥିବା ଅଭିଯୋଗ ଆଣିଥିଲେ । ଯାହାକୁ ନେଇ ଗତ ୨୦ ଏପ୍ରିଲରେ ଲଣ୍ଡନ ଘର କିଣା ଦୁର୍ନୀତିକୁ ନେଇ ଜେଆଇଟି ସ୍ୱତନ୍ତ୍ ଭାବେ ତଦନ୍ତ କରିବାକୁ ନିର୍ଦେଶ ଦେଇଥିଲେ ।
୧୯୯୯ରେ ମଧ୍ୟ ଏଭଳି ଅଭିଯୋଗ ଆସିଥିବାରୁ ସେ ସମୟରେ ନାସନାଲ ଆକାଂଉଟ ବ୍ୟୁରୋ ଏହାର ଯାଂଚ ଆରମ୍ଭ କରିଥିଲା । ସରିଫ୍ ପାନାମା ପେପର ଲିକକୁ ପ୍ରଥମେ ମାନୁନଥିବା ବେଳେ ଗତକାଲି ସୁପ୍ରିମକୋର୍ଟରେ ବିଚାର ପରେ ସେ ଦୋଷୀ ସାବ୍ୟସ୍ତ ହୋଇଛନ୍ତି ।