ସୁଧୁରୁନି ସଇତାନ ଚୀନ୍ । ସୀମାରେ ପୁଣି ଦେଖାଇଛି ଦୋମୁହାଁ ନୀତି
କନକ ବ୍ୟୁରୋ: ପୁଣି ମୁହାଁମୁହିଁ ହେଲେ ଭାରତୀୟ ସେନା ଓ ପିଏଲଏ । ମିଳିଥିବା ସୂଚନା ଅନୁସାରେ ୩ ଦିନ ତଳେ ସିକିମ୍ ସୀମାରେ ପୁଣି ସାମ୍ନାସାମ୍ନି ହୋଇଛନ୍ତି ଭାରତ ଏବଂ ଚୀନ ସୈନିକ । ଲଦାଖ ସୀମାର ଗଲୱାନ୍, ପେଙ୍ଗଙ୍ଗ, ଗୋଗ୍ରାପୋଷ୍ଟ ଓ ହଟସ୍ପିଙ୍ଗ ଅଂଚଳରେ ଚୀନ ସେନା ଗତ ବର୍ଷ ମେ ମାସରେ ଅନୁପ୍ରବେଶ ପାଇଁ ଉଦ୍ୟମ କରିଥିଲା । ଏବେ ପୁଣି ଉତ୍ତର ସିକିମର ନାକୁ ଲା’ ଅଂଚଳରେ ଅନୁପ୍ରବେଶ ପାଇଁ ଉଦ୍ୟମ କଲା ବେଳେ ବାଧା ଦେଇଛି ଭାରତୀୟ ସେନା । ଫଳରେ ୨ ଦେଶର ସୈନିକ ହାତାହାତି ହୋଇଛନ୍ତି । ଏଥିରେ ୪ ଭାରତୀୟ ଯବାନ ଆହତ ହୋଇଥିବା ବେଳେ ଚୀନର ୨୦ ଜଣ ଚୀନ୍ ସୈନିକ ଆହତ ହୋଇଥିବା ଜଣାପଡ଼ିଛି । ଗତ ୨୦ ତାରିଖରେ ଉତର ସିକିମର ନାକୁ ଲା’ ଠାରେ ଭାରତୀୟ ସେନା ଓ ଚୀନର ପିଏଲଏ ମଧ୍ୟରେ ଗଣ୍ଡଗୋଳ କଥାକୁ ସ୍ୱୀକାର କରିଛି ଭାରତୀୟ ସେନା । ଚୀନ୍ ସେନା ଅନୁପ୍ରବେଶ ଉଦ୍ୟମ କରୁଥିବା ବେଳେ ଏପରି ପରିସ୍ଥିତି ଉପୁଜିଥିଲା ।
Kanak News is now on WhatsApp
Join and get latest news updates delivered to you via WhatsApp
ନାକୁ ଲା’ ସୀମାରେ ଚୀନ ସେନା ଭାରତ ମାଟି ଭିତରକୁ ପ୍ରବେଶ କରିବା ପାଇଁ ଚେଷ୍ଟା କରୁଥିବା ବେଳେ ବାଧା ଦେଇଥିଲେ ସେଠାରେ ମୁତୟନ ଭାରତୀୟ ସୈନିକ । ଏହା ପରେ ମୁହାଁମୁହିଁ ସ୍ଥିତି ଉପୁଜିଥିଲା । ତେବେ ପ୍ରଟୋକଲ ଅନୁଯାୟୀ ସ୍ଥାନୀୟ କମାଣ୍ଡର ସ୍ତରୀୟ ଅଧିକାରୀ ବିବାଦର ସମାଧାନ କରିଥିଲେ ବୋଲି ସେନା ପକ୍ଷରୁ କୁହାଯାଇଛି ।
ଉତ୍ତର ସିକ୍କିମର ନାକୁ ଲା’ ନିକଟରେ ଗତ ବର୍ଷ ମେ’ ୯ ତାରିଖରେ ଉଭୟ ଦେଶର ପ୍ରାୟ ୧୫୦ ସହ ସୈନିକ ମୁହାଁମୁହିଁ ହୋଇଥିଲେ । ଯେଉଁଥିରେ ଭାରତ ଓ ଚୀନ୍ର ପ୍ରାୟ ୧୦ଜଣ ସୈନ୍ୟ ଆହତ ହୋଇଥିଲେ । ସେପଟେ ଗତବର୍ଷ ମେ’୨୦ତାରିଖରେ ଗଲୱାନ ଘାଟି ସଂଘର୍ଷ ପରେ ସ୍ଥିତି ଏବେ ବି ସ୍ୱାଭାବିକ ହୋଇନାହିଁ । ରବିବାର ଦିନ ଉଭୟ ଦେଶର ସେନାସ୍ତରୀୟ ବୈଠକରୁ କୌଣସି ନିଷ୍କର୍ସ ବାହାରି ପାରିନାହିଁ । ଏପଟେ ପୁଣି ସିକ୍କିମ ସୀମାରେ ଅନୁପ୍ରବେଶ ଉଦ୍ୟମ କରି ନିଜ ଅସଲ ରୂପ ଦେଖାଇଛି ଚୀନ୍ ।