କନକ ବ୍ୟୁରୋ: ଏଲଏସିରେ ସୁଧୁରୁନି ସ୍ଥିତି, ପଛକୁ ହଟୁନି ଚୀନ ସେନା । ଏବେ ବି ଜାରି ରଖିଛି ସ୍ଥାୟୀ ନିର୍ମାଣ କାର୍ଯ୍ୟ । ଭାରତୀୟ ସେନା ମୁଖ୍ୟଙ୍କ ବୟାନକୁ ନେଇ ବର୍ତ୍ତମାନ ଚର୍ଚ୍ଚା ଆରମ୍ଭ ହୋଇଛି । ପୂର୍ବ ଲଦାଖ ଗୋଗ୍ରା ହଟ ସ୍ପ୍ରିଙ୍ଗ୍ ଅଞ୍ଚଳର ପାଟ୍ରୋଲିଂ ପଏଣ୍ଟ ୧୫ରୁ ଭାରତ ଏବଂ ଚୀନ ସେନା ପଛକୁ ହଟିବାର ଦୁଇ ମାସ ପୁରିଲାଣି । ହେଲେ ବାସ୍ତବ ସ୍ଥିତିରେ ବହୁତ କିଛି ବଦଳି ନାହିଁ, ଯାହା ଭାରତୀୟ ସେନା ମୁଖ୍ୟ ଜେନେରାଲ ମନୋଜ ପାଣ୍ଡେଙ୍କ ବୟାନରୁ ସ୍ପଷ୍ଟ ହୋଇଛି । ପ୍ରକୃତ ନିୟନ୍ତ୍ରଣ ରେଖା ନିକଟରେ ସ୍ଥିତି ସ୍ଥିର ରହିଛି ହେଲେ ଆଗକୁ କିଛି ଆକଳନ କରିହେବନି ବୋଲି କହିଛନ୍ତି ଜେନେରାଲ ମନୋଜ ପାଣ୍ଡେ । ଚୀନ ସେନା ଏଲଏସିରୁ ପଛକୁ ହଟିବାକୁ ପ୍ରତିଶ୍ରୁତି ଦେଇଥିଲା ହେଲେ ଏବେ ମଧ୍ୟ ସେନା ହଟିବା ନିଷ୍ପତି ବାସ୍ତବ ରୂପ ନେଇ ନାହିଁ । ଶୀତ ଋତୁ ଆରମ୍ଭ ହୋଇଯାଇଥିଲେ ବି ଏଲଏସି ନିକଟରେ ଚୀନ ସେନା ଡେରା ପକାଇଥିବା ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
୨୦୨୦ ଗଲୱାନ ଘାଟିରେ ହୋଇଥିବା ରକ୍ତାକ୍ତ ସଂଘର୍ଷ ପରେ ସମାଧାନ ପାଇଁ ଦୁଇ ଦେଶର ସେନା ୧୬ ରାଉଣ୍ଡ କମାଣ୍ଡରସ୍ତରୀୟ ଆଲୋଚନା କରିିସାରିଲେଣି । ଆଲୋଚନା ପରେ ହୋଇଥିବା ଚୁକ୍ତି ମୁତାବକ କିଛି କିଛି ସ୍ଥାନରେ ଉଭୟ ସେନା ପଛକୁ ହଟିଛନ୍ତି ।
ଫେବ୍ରୁଆରୀ ୨୦୨୧ରେ ପ୍ରଥମେ ପାଙ୍ଗୋଙ୍ଗ୍ ଟିସୋ ଅଂଚଳରୁ ଦୁଇ ଦେଶର ସେନା ପଛକୁ ହଟିଥିଲେ । ଅଗଷ୍ଟ ୨୦୨୨ରେ ଗୋଗ୍ରା ହଟ୍ ସ୍ପ୍ରିଙ୍ଗ୍ ଅଂଚଳରୁ ଉଭୟ ସେନା ପଛକୁ ହଟିଥିଲେ । ସେପ୍ଟେମ୍ବର ୨୦୨୨ରେ ପିପି-୧୫ ଅଂଚଳରୁ ମଧ୍ୟ ସେନା ପ୍ରତ୍ୟାହାର କରାଯାଇଥିଲା । ହେଲେ ଡେମଚୋକ୍ ଓ ଡେପସାଙ୍ଗ୍ ଅଞ୍ଚଳରୁ ସେନା ପ୍ରତ୍ୟାହାର କରିବାକୁ ଡ୍ରାଗନ ସେନା ଆଦୌ ରାଜି ହେଉନାହିଁ । ତାସହ ଅନ୍ୟ ସେକ୍ଟରରୁ ସେନା ହଟାଇବାକୁ ଚୁକ୍ତି କରି ମଧ୍ୟ ସେନା ହଟାଉନାହିଁ ଚୀନ ।
ପ୍ରକୃତ ନିୟନ୍ତ୍ରଣ ରେଖା ନିକଟରେ ଜି-୬୯୫ ହାଇୱେ ନିର୍ମାଣ କାର୍ଯ୍ୟ ଜାରି ରଖିଛି ଚୀନ । ସେପଟେ ସୀମାନ୍ତରେ ସୈନିକମାନଙ୍କୁ ଯୁଦ୍ଧ ପ୍ରଶିକ୍ଷଣ ମଧ୍ୟ ଦେଉଛି । ହେଲେ ଚୀନ ପକ୍ଷରୁ କୌଣସି ଆକ୍ରମଣ ହେଲେ ତାର କଡା ଜବାବ ଦେବାକୁ ଭାରତୀୟ ସେନା ପ୍ରସ୍ତୁତ ରହିବାକୁ ହେବ ବୋଲି କହିଛନ୍ତି ସେନା ମୁଖ୍ୟ ମନୋଜ ପାଣ୍ଡେ ।