ବିଜେଡି ବିରୋଧରେ ବିଜେପି ଓ କଂଗ୍ରେସର ଅଘୋଷିତ ମେଣ୍ଟ । ରାଜନଗରରେ ଶାସକ ଦଳ ପ୍ରାର୍ଥୀଙ୍କୁ ହରାଇବା ପାଇଁ ବିରୋଧୀଙ୍କ ରଣନୀତି
କନକ ବ୍ୟୁରୋ: କଂଗ୍ରେସ ଓ ବିଜେପି ମଧ୍ୟରେ ମେଣ୍ଟ କରି ନିର୍ବାଚନରେ ଲଢ଼େଇ ହେବା ଖବର ହୁଏତ ଆପଣଙ୍କୁ ଆଶ୍ଚର୍ଯ୍ୟ ଲାଗିପାରେ । କିନ୍ତୁ ଏମିତି ଏକ ଖବର ଆସିଛି କେନ୍ଦ୍ରାପଡା ଜିଲ୍ଳାର ରାଜନଗର ବ୍ଲକ ଅଞ୍ଚଳରୁ । ଶାସକ ଦଳ ବିଜେଡିକୁ ହରାଇବା ପାଇଁ ହେଲେ ବିଜେପି ଓ କଂଗ୍ରେସ ମଧ୍ୟରେ ମେଣ୍ଟ କରିବାକୁ ପଡିବ ବୋଲି ଧରି ନେଇଛନ୍ତି ସ୍ଥାନୀୟ ନେତା । ଆଉ ଅଘୋଷିତ ମେଣ୍ଟ କରି ନିର୍ବାଚନ ମଇଦାନକୁ ଓହ୍ଲାଇବାକୁ ପ୍ରସ୍ତୁତ ହେଉଥିବା ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ରାଜନଗର ଅଞ୍ଚଳର କଂଗ୍ରେସ ନେତା ମାଧବ ଚନ୍ଦ୍ର ମାନ୍ନାଙ୍କ କିଛି କଥା ଏବେ ସାରା ରାଜ୍ୟରେ ଚର୍ଚ୍ଚାର ବିଷୟ ହୋଇଛି । କାରଣ ଯେଉଁ କଂଗ୍ରେସ ଓ ବିଜେପି ମଧ୍ୟରେ ସାରାଦେଶରେ ଅହି ନକୁଳ ସମ୍ପର୍କ ରହିଛି, ସେହି ବିଜେପି ସହ ତୃଣମୂଳ ସ୍ତରରେ ଅଘୋଷିତ ମେଣ୍ଟ କରି ଶାସକ ବିଜେଡିକୁ ଚେକ୍ ଦେବାକୁ ସ୍ୱତନ୍ତ୍ର ରଣନୀତି ପ୍ରସ୍ତୁତ କରିଛନ୍ତି ବିରୋଧୀ । ଯେଉଁଠି ବିଜେପି ସରପଞ୍ଚ ପ୍ରାଥୀ ଦେବ ସେଠି କଂଗ୍ରେସ ସମିତି ସଭ୍ୟ ଓ ଯେଉଁଠି ବିଜେପି ସମିତି ସଭ୍ୟ ପ୍ରାର୍ଥୀ ଦେବ ସେଠି କଂଗ୍ରେସ ସରପଞ୍ଚ ପ୍ରାର୍ଥୀ ଦେବା ପାଇଁ ସ୍ଥିର କରିଛନ୍ତି । ଆଉ ଏହି ପ୍ରସ୍ତାବକୁ ପରୋକ୍ଷରେ ସ୍ୱୀକାର କରିଛନ୍ତି ସ୍ଥାନୀୟ ବିଜେପି ନେତା । ଯାହାକି ରାଜନଗର ରାଜନୀତିକୁ ସରଗରମ କରିଛି ।
କୁହାଯାଉଛି ରାଜନଗର ବ୍ଲକର ଡାଙ୍ଗମାଳ ପଞ୍ଚାୟତରୁ ଆରମ୍ଭ ହୋଇଛି ଏହି ମେଣ୍ଟ ପ୍ରକ୍ରିୟା । ଡାଙ୍ଗମାଳ ପଞ୍ଚାୟତର ସରପଞ୍ଚ ପ୍ରାର୍ଥୀଭାବେ କଂଗ୍ରେସ ପକ୍ଷରୁ ପ୍ରତିମା ସେଠୀଙ୍କ ନାଁ ଘୋଷଣା କରାଯାଇଥିବାବେଳେ ବିଜେପି ପକ୍ଷରୁ ସମିତି ସଭ୍ୟ ପ୍ରାର୍ଥୀ ଭାବେ ଜଗବନ୍ଧୁ ସେଠୀଙ୍କ ନାଁ ଘୋଷଣା କରାଯାଇଛି । ତେବେ ଏଥିରୁ ବିଜେଡିକୁ ଫାଇଦା ମିଳିବ ବୋଲି କହିଛନ୍ତି ଦଳୀୟ ନେତା । ତେବେ କୁହାଯାଏ ରାଜନୀତିରେ କେହି କାହାର ଶତ୍ରୁ ନୁହେଁ । ରାଜନୀତିରେ ସବୁକିଛି ସମ୍ଭବ । ଆଉ ରାଜନଗରରେ ଯଦି ବିଜେପି ଓ କଂଗ୍ରେସ ପରସ୍ପର ଭିତରେ ବୁଝାମଣା କରି ନିର୍ବାଚନ ଲଢ଼ନ୍ତି ତେବେ ରାଜନୈତିକ ମହଲରେ ଏକ ଚର୍ଚ୍ଚାର ବିଷୟ ହେବ ।