ବ୍ରିଜରୁ କାହିଁକି ଡେଇଁ ପଡି଼ଲେ ଭିସୁଟ୍ ଛାତ୍ରୀ? ହତ୍ୟା ଅଭିଯୋଗ ଆଣିଲେ ପରିବାର ଲୋକ
କନକ ବ୍ୟୁରୋ: ଗତକାଲି ପିସି ବ୍ରିଜରୁ ଡେଇଁ ପଡିଥିବା ଭିସୁଟ୍ ଛାତ୍ରୀ ଚିନ୍ମୟୀ ପ୍ରିୟଦର୍ଶିନୀଙ୍କ ମୃତଦେହ ଆଜି ଉଦ୍ଧାର ହୋଇଛି । ଝିଅର ମୃତଦେହ ଦେଖିବା ପରେ ଦୁଃଖରେ ଭାଙ୍ଗି ପଡିଛନ୍ତି ପରିବାର ଲୋକ । ପାଠ ପଢୁଆ ଝିଅର ଏଭଳି ଅସ୍ୱଭାବିକ ମୃତ୍ୟୁକୁ ସହଜରେ ଗ୍ରହଣ କରିପାରି ନାହାନ୍ତି । ଗତକାଲି ରାତି ୯ଟା ସମୟରେ ଝିଅ ସହ କଥା ହୋଇଥିଲେ ମାଆ ଲବଙ୍ଗ ସାହୁ । ମାଆଙ୍କ ଅଭିଯୋଗ, ଝିଅ ସହ କଥା ହେଲାବେଳେ କେହି ତାଙ୍କ ତଣ୍ଟି ଚିପି ଦେଉଥିବା ଅନୁଭବ କରିଥିଲେ । ପରେ ଯେତେ ଫୋନ ଲଗାଇଲେ ବି କେହି ରିସିଭ କରିନଥିଲେ ବୋଲି କହିଛନ୍ତି ଚିନ୍ମୟୀଙ୍କ ମାଆ । ତେଣୁ ଝିଅକୁ କେହି ହତ୍ୟା କରିଥିବା ସେ ସନ୍ଦେହ ପ୍ରକାଶ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଚିନ୍ମୟୀଙ୍କ ପୁରୁଷ ବନ୍ଧୁ ଗତକାଲି ତାଙ୍କ ସହ ପିସି ବ୍ରିଜରେ ଥିବାବେଳେ ସହପାଠୀଙ୍କ ସହ ମିଶି ଝିଅକୁ ହତ୍ୟା କରିଥିବା ସାଂଘାତିକ ଅଭିଯୋଗ ଆଣିଛନ୍ତି ଚିନ୍ମୟୀଙ୍କ ପରିବାର । ମୃତଦେହ ଚିହ୍ନଟ ବେଳେ ଚିନ୍ମୟୀଙ୍କ ତଣ୍ଟି ଚିପିଦେବାର ଦାଗ ରହିଥିବା କହିଛନ୍ତି ଭଉଣୀ ତନ୍ମୟୀ ସାହୁ । ଏପରିକି ତାଙ୍କ ବେକରୁ ସୁନା ଚେନ୍ ଗାଏବ ହୋଇଯାଇଛି । ପରିବାରର ଅଭିଯୋଗ ଆଧାରରେ ପୁରୁଷ ବନ୍ଧୁ ଓ ତାଙ୍କ ସାଥୀଙ୍କୁ ପୋଲିସ ଅଟକ ରଖିଥିବା ସୂଚନା ମିଳିଛି । ପୋଲିସ ମଧ୍ୟ ପରିବାର ଲୋକଙ୍କ ଅଭିଯୋଗ ଆଧାରରେ ତଦନ୍ତ ହେବ ବୋଲି କହିଛି ।
ଘଟଣାସ୍ଥଳରୁ ପୁରୁଷ ବନ୍ଧୁଙ୍କ ବାଇକ ଓ ଚିନ୍ମୟୀଙ୍କ ମୋବାଇଲକୁ ଜବତ କରିଛି ପୋଲିସ । ଚିନ୍ମୟୀ ଗତବର୍ଷ ଭିସୁଟରୁ ଆଇଟି ଟ୍ରେଡରେ ପାସ କରିଥିବାବେଳେ ଭୁବନେଶ୍ୱରରେ ଚାକିରି କରୁଥିଲେ । ଗତକାଲି ସମାବର୍ତ୍ତନ ଉତ୍ସବରେ ଯୋଗଦେବାକୁ ସେ ସମ୍ବଲପୁର ଯାଇଥିବାବେଳେ ରାତିରେ ଭୁବନେଶ୍ୱର ଫେରିଥାନ୍ତେ । ମାତ୍ର ତା ପୂର୍ବରୁ ଅଘଟଣ ଘଟିଲା ଓ ଆଜି ସକାଳୁ ଅଗ୍ନିଶମ ବାହିନୀ ତାଙ୍କ ମୃତଦେହକୁ ଉଦ୍ଧାର କରିଥିଲେ । ଝିଅର ଅଚାନକ ମୃତ୍ୟୁରେ ପରବାର ଲୋକ ହତବାକ ହୋଇଯାଇଛନ୍ତି । ପ୍ରଶ୍ନ ଉଠୁଛି
– ସମାବର୍ତ୍ତନରେ ସାର୍ଟିଫିକେଟ୍ ନେବାକୁ ଆସି ବ୍ରିଜରୁ କାହିଁକି ଡେଇଁଲେ ଚିନ୍ମୟୀ?
– ସେ ଆତ୍ମହତ୍ୟା କରିଛନ୍ତି ନା ତାଙ୍କୁ କେହି ହତ୍ୟା କରି ଫିଙ୍ଗିଦେଇଛି?
– ପରିବାର ଲୋକଙ୍କ ଅଭିଯୋଗରେ କେତେ ସତ୍ୟାସତ୍ୟ ରହିଛି?
– ଚିନ୍ମୟୀଙ୍କ ମୃତ୍ୟୁ ପଛରେ ପୁରୁଷ ବନ୍ଧୁଙ୍କ କିଛି ଭୂମିକା ରହିଛି କି?