୨ ଘଣ୍ଟା ପାଇଁ ଅଚଳ ହୋଇଗଲା ହ୍ୱାଟସଆପ୍। ସୋସିଆଲ ମିଡିଆରେ ଟ୍ରେଣ୍ଡ କଲା ହ୍ୱାଟସଆପକୁ ଲାଗିଛି ଗ୍ରହଣ।
କନକ ବ୍ୟୁରୋ: ଲୋକପ୍ରିୟ ମେସେଜିଂ ପ୍ଲାଟଫର୍ମ ହ୍ୱାଟସଆପ୍, ମଧ୍ୟାହ୍ନ ସମୟରେ ବନ୍ଦ ହେବା ପରେ ସୋସିଆଲ ମିଡିଆରେ ଟ୍ରେଣ୍ଡ କରିଥିଲା ଏମିତି ମେସେଜ୍ । ହ୍ୱାଟସଆପ୍ କାମ ନକରିବାକୁ ମଜାଳିଆ ଢ଼ଙ୍ଗରେ ଲେଖି ବିଭିନ୍ନ ସାମାଜିକ ଗଣମାଧ୍ୟମରେ ପୋଷ୍ଟ କରିଛନ୍ତି ବ୍ୟବହାରକାରୀ । ଦୀପାବଳୀରେ ଅଧିକାଂଶ ଲୋକ ବନ୍ଧୁ, ବାନ୍ଧବ ଓ ସମ୍ପର୍କୀୟମାନଙ୍କୁ ମେସେଜ କରି ଶୁଭେଛା ଜଣାଇବାରୁ ହ୍ୱାଟସଆପରେ ଗ୍ରହଣ ଲାଗିଲା ବୋଲି କେହି କେହି ଲେଖି ପୋଷ୍ଟ କରିଛନ୍ତି । କେବଳ ଏତିକି ନୁହେଁ ମାର୍କ ଜୁକର ବର୍ଗ ତାର କାଟିଦେଉଥିବାର ଏକ ମିମ୍ ପୋଷ୍ଟ କରିଛନ୍ତି ହ୍ୱାଟସଆପ୍ ବ୍ୟବହାରକାରୀ । ଯାହା ବେଶ୍ ଭାଇରାଲ ହେଉଛି ।
Kanak News is now on WhatsApp
Join and get latest news updates delivered to you via WhatsApp
ହ୍ୱାଟସ୍ଆପ୍ କାର୍ଯ୍ୟ କରିବା ବନ୍ଦ ହେବା ଖବର ପ୍ରଚାର ପରେ ଟୁଇଟରରେ ହ୍ୱାଟସଆପ୍ ଡାଉନ ହାସଟ୍ୟାଗ୍ ଟ୍ରେଣ୍ଡ ହୋଇଥିଲା । ଦୁଇ ଘଣ୍ଟା ମଧ୍ୟରେ ୧ ଲକ୍ଷରୁ ଅଧିକ ଟୁଇଟର ବ୍ୟବହାରକାରୀ ହ୍ୱାଟସଆପ୍ ଡାଉନ ହ୍ୟାସଟ୍ୟାଗ ସହ ଟୁଇଟ୍ କରିଥିଲେ । ଯେଉଁଥିରେ ଅଧିକାଂଶ ବ୍ୟବହାରକାରୀ ହ୍ୱାଟସଆପ୍ ୟୁଜର୍ସଙ୍କୁ ଟ୍ରୋଲ କରିଥିବା ଦେଖିବାକୁ ମଳିଥିଲା । ହ୍ୱାଟସଆପ୍ କାର୍ଯ୍ୟ କରିବା ବନ୍ଦ ହେବା ପରେ ମେଟାର ମୁଖପାତ୍ର କହିଥିଲେ, ହ୍ୱାଟସଆପ୍ରେ ମେସେଜରେ କିଛି ଅସୁବିଧା ହୋଇଛି ଯେତେ ଶୀଘ୍ର ହେବ ଆମେ ଏହାକୁ ଠିକ୍ କରିଦେବୁ । ଆଉ ଏହାର ୧ ଘଣ୍ଟା ମଧ୍ୟରେ ପୁଣି ସ୍ୱାଭାବିକ୍ ହୋଇଥିଲା ହ୍ୱାଟସଆପ୍ । କିନ୍ତୁ କଣ ପାଇଁ ଏଭଳି ସମସ୍ୟା ହୋଇଥିଲା ସେନେଇ କମ୍ପାନୀ ପକ୍ଷରୁ କୌଣସି ସୂଚନା ଦିଆଯାଇ ନାହିଁ । ସାଇବର ଏକ୍ସପର୍ଟଙ୍କ କହିବା ଅନୁସାରେ ବ୍ୟବହାରକାରୀଙ୍କ ସଂଖ୍ୟା ଅତ୍ୟଧିକ ହୋଇଗଲେ ସର୍ଭର କ୍ରାସ କରିଯାଇଥାଏ ।
ଯୋଗାଯୋଗର ଗୁରୁତ୍ୱପୂର୍ଣ୍ଣ ମାଧ୍ୟମ କୁହାଯାଉଥିବା ହ୍ୱାଟସ୍ଆପ୍ ମଧ୍ୟାହ୍ନ ୧୨ଟା ପରେ କାମ କରିବାକୁ ବନ୍ଦ କରିଦେଇଥିଲା । ନା ମେସେଜ ଯାଉଥିଲା ନା ଆସୁଥିଲା । ହ୍ୱାଟସ୍ଆପ୍ରେ ଥିବା ଭଏସ କଲ୍ ସୁବିଧା ମଧ୍ୟ ବନ୍ଦ ହୋଇଯାଇଥିଲା । ଜଣେ ଅନ୍ୟ ଜଣଙ୍କୁ କଲ କରି ତାଙ୍କର ହ୍ୱାଟ୍ସଆପ କାର୍ଯ୍ୟ କରୁଛି କି ନାହିଁ ପଚାରି ବୁଝିଥିଲେ । ଏହାରି ଭିତରେ ଖବର ଆସିଥିଲା କି ହ୍ୱାଟସପ୍ର ସର୍ଭର କ୍ରାସ୍ କରିଯାଇଛି । ଗତ ୨୦୨୧ ଅକ୍ଟୋବର ୫ ତାରିଖରେ ହ୍ୱାଟସ୍ଆପ ସମେତ ମେଟାର ଅନ୍ୟ ଦୁଇ ସୋସିଆଲ ମିଡିଆ ପ୍ଲାଟଫର୍ମ ଫେସବୁକ ଏବଂ ଇନଷ୍ଟ୍ରଗ୍ରାମ ସର୍ବାଧିକ ୬ ଘଣ୍ଟା ପାଇଁ କାର୍ଯ୍ୟ କରିବା ବନ୍ଦ ହୋଇଯାଇଥିଲା । ପରେ ଏହାକୁ ଠିକ୍ କରାଯାଇଥିଲା । ତେବେ ଏହା ପଛରେ ଖାଲି ସର୍ଭର ସମ୍ବନ୍ଧୀୟ ତୃଟି ନା ଆଉ କିଛି ରହିଛି ତାକୁ ନେଇ ଏବେବି ଦ୍ୱନ୍ଦ୍ୱ ରହିଛି ।