ବରଗଡ଼ ପଦ୍ମପୁର ଅଂଚଳରେ ଦୁଇ ଭାଇଙ୍କ ଷ୍ଟ୍ରବେରି ଚାଷ: ବାହାର ରାଜ୍ୟରୁ ୧୫୦୦ ଚାରା ଆଣି ଆରମ୍ଭ କରିଥିଲେ ଚାଷ
କନକ ବ୍ୟୁରୋ: ବରଗଡ ପଦ୍ମପୁର ଉପଖଣ୍ଡରେ ଷ୍ଟ୍ରବେରୀ ଚାଷ କରୁଛନ୍ତି ଚାଷୀ । ତେବେ ଏହି ଅଂଚଳରୁ ହଜାର ହଜାର ଲୋକ ପରିବାର ପ୍ରତିପୋଷଣ ପାଇଁ ବାହାର ରାଜ୍ୟକୁ ଦାଦନ ଖଟିବାକୁ ଯାଇଥାନ୍ତି । କିନ୍ତୁ ପ୍ରତିକୂଳ ପରିସ୍ଥିତିରେ ନିଜର ପରିଶ୍ରମ ଓ ଆଧୁନିକ ଜ୍ଞାନ କୌଶଳ ଉପଯୋଗ କରି ଷ୍ଟ୍ରବେରୀ ଭଳି ଏକ ବ୍ୟୟ ବହୁଳ ଫଳକୁ ଚାଷ କରିବାରେ ସଫଳ ହୋଇଛନ୍ତି । ଏହାକୁ ଏକ ଲାଭବାନ ବ୍ୟବସାୟରେ ପରିଣତ କରିଛନ୍ତି ପଦ୍ମପୁର ଜାମଖାର ଗାଁର ଦୁଇ ଭାଇ ସୁଜିତ୍ ଓ ଅଜିତ ।
Kanak News is now on WhatsApp
Join and get latest news updates delivered to you via WhatsApp
ବରଗଡ଼ ପଦ୍ମପୁର ଅଂଚଳରେ ଆଧୁନିକ ଜ୍ଞାନ କୌଶଳ ଉପେଯୋଗ କରି ଷ୍ଟବେରୀ ଚାଷ କରି ସଫଳ ହୋଇଛନ୍ତି ଦୁଇ ଭାଇ ସୁଜିତ ଓ ଅଜିତ । ନିଜ ଘର ପଛ ପଟ ଥିବା କୋଡିଏ ଡେସିମିଲ ଜମିରେ ଏକ ପୋଲି ହାଉସ ତିଆରି କରି ଷ୍ଟବେରୀ ଚାଷ କରିଛନ୍ତି । ବାହାର ରାଜ୍ୟରୁ ୧୫୦୦ ଚାରା ଆଣି ଏହି ଚାଷ ଆରମ୍ଭ କରିଛନ୍ତି ସୁଜିତ ଓ ଅଜିତ । ଷ୍ଟବେରୀ ଚାଷ ପାଇଁ ଥଣ୍ଡା ଜଳବାୟୁର ଆବଶ୍ୟକତା ରହିଥାଏ ।
ତେଣୁ ନୂତନ ଜ୍ଞାନ କୌଶଳ ବ୍ୟବହାର କରି ପୋଲିହାଉସରେ ଧାଡି ପ୍ରଣାଳୀରେ ଚାଷ କରାଯାଇଛି । ବୁନ୍ଦା ଜଳ ସେଚନ ମାଧ୍ୟମରେ ଏହି ଚାଷ କରାଯାଉଥିବା ଜଣାପଡ଼ିଛି । ଗତ ନଭେମ୍ବର ମାସରୁ ଏହି ଚାଷ ଆରମ୍ଭ କରି ବର୍ତମାନ ଯାଏଁ ଷ୍ଟବେରୀ ଉତ୍ପାଦନ କରି ବିକ୍ରି କରୁଛନ୍ତି । ସୁଜିତ ଅଜିତଙ୍କ କହିବା ମୁତାବକ ଏହି ଫଳ ଚାରି ମାସ ପର୍ଯ୍ୟନ୍ତ ଅମଳ ହୋଇଥାଏ । ବର୍ତମାନ ପଦ୍ମପୁର ଅଂଚଳରେ ଷ୍ଟବେରୀର ଚାହିଦା ରହିଛି । ପଦ୍ମପୁର ବଜାରରେ ଷ୍ଟବେରୀ କେଜି ପ୍ରତି ୫୦୦ ଟଙ୍କାରୁ ଅଧିକ ମୂଲ୍ୟରେ ବିକ୍ରି କରାଯାଉଛି । ପ୍ରତ୍ୟେକ ଷ୍ଟବେରୀ ଗଛରୁ ଚାରି ମାସ ମଧ୍ୟରେ ୫୦୦ ଗ୍ରାମରୁ ଅଧିକ ଫଳ ଅମଳ ହୋଇଥାଏ , ଏହି ହିସାବରେ ଏହି ଦୁଇ ଭାଇ ଚାରି ଲକ୍ଷରୁ ଅଧିକ ଟଙ୍କା ରୋଜଗାର କରି ପାରିବେ ବୋଲି କହିଛନ୍ତି ।
ସୁଜିତ ଓ ଅଜିତ ବିଶ୍ୱାଳଙ୍କ ବାପା ଜଣେ ସଫଳ ଚାଷୀ ଭାବେ ସେହି ଅଂଚଳରେ ବେଶ ପରିଚିତ । ସେ ମଧ୍ୟ ବିଭିନ୍ନ ପ୍ରକାର ଫଳ, ପନିପରିବା ଚାଷ କରି ସୁନାମ ଅର୍ଜନ କରିବା ସହ ରାଜ୍ୟସ୍ତରରେ ପୁରସ୍ମୃତ ହୋଇଛନ୍ତି । ସୁଜିତ ଓ ଅଜିତ ତାଙ୍କ ବାପାଙ୍କ ଠାରୁ ପ୍ରେରଣା ପାଇ ଚାଷ ପ୍ରତି ଆକୃଷ୍ଟ ହୋଇ ନୂତନ ଜ୍ଞାନ କୌଶଳରେ ଚାଷ କରିବା ଆରମ୍ଭ କରିଛନ୍ତି । ଷ୍ଟ୍ରବେରୀ ଚାଷ ସମ୍ପୁର୍ଣ ନୂଆ ହୋଇଥିବା ବେଳେ ଏଥିରେ ସଫଳ ହେବେ ନା ନାହିଁ ସନ୍ଦେହ କରି ଚାଷ ଆରମ୍ଭ କରିଥିଲେ । କିନ୍ତୁ ଦୁଇ ଭାଇଙ୍କ ମନୋବଳ ଓ ପରିଶ୍ରମ ଯୋଗୁଁ ଏହି ଚାଷ ସଫଳ ହୋଇଛି । ଯାହାକୁ ଦେଖି ପରିବାର ଲୋକ ତଥା ଅଂଚଳବାସୀ ବେଶ ଖୁସି ପ୍ରକାଶ କରିଛନ୍ତିି । ଷ୍ଟବେରୀ ତୋଳିବା ଏବଂ ପ୍ୟାକିଙ୍ଗ କରିବାରେ ସହଯୋଗ କରୁଛନ୍ତି ପରିବାର ଲୋକ । ୨୦୦ ଗ୍ରାମ ଭର୍ତୀ ଏକ ପ୍ଲାଷ୍ଟିକ ଡବାରେ ପ୍ୟାକିଙ୍ଗ କରି ବଜାରକୁ ବିକ୍ରୟ ପାଇଁ ପଠାଉଛନ୍ତି । ତେବେ ଦୁଇ ଭାଇଙ୍କ ଏହି ଚାଷ ଏବେ ଅନ୍ୟମାନଙ୍କ ପାଇଁ ପ୍ରେରଣା ହୋଇଛି ।
ପଦ୍ମପୁର ଭଳି ମରୁଡି ଅଂଚଳରେ ଷ୍ଟବେରି ଚାଷ କରି ନିଜେ ଲାଭବାନ ହେବା ସହ ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛନ୍ତି ଏହି ଦୁଇ ଭାଇ । ଆଗକୁ ଅନ୍ୟ ଚାଷୀ ମାନେ ଏହି ଉପାୟ ଅବଲମ୍ବନ କଲେ ସ୍ଥାନୀୟ ଅଂଚଳରୁ ବାହାର ରାଜ୍ୟକୁ ଦାବନ ଖଟିବାକୁ ଯାଉଥିବା ଲୋକଙ୍କ ସଂଖ୍ୟା କମିପାରନ୍ତା ବୋଲି ସାଧାରଣରେ ଚର୍ଚ୍ଚା ହେଉଛି ।