କନକ ବ୍ୟୁରୋ: ପୁଅ ମାଟି ମା’ ପାଇଁ ପ୍ରାଣବଳି ଦେଇଛି । ବାପା-ମାଆଙ୍କୁ ବି ବୀରପୁଅର ବାପା-ମାଆ ବୋଲି ନୂଆ ପରିଚୟ ମିଳିଛି । କୋହଭରା କଣ୍ଠ ଆଉ ଓଦା ହୋଇଥିବା ପଣତରେ ସହିଦ ପୁଅର ଫଟୋକୁ ପୋଛି ଦେଇ, ଲୁହକୁ ଛାତିରେ ଚାପିଦେଉଛନ୍ତି ଚଳନ୍ତି ପ୍ରତିମା । ସୁନ୍ଦର ସଂସାର ସ୍ୱପ୍ନ ଦେଖିଥିବା ପୁଅ ସହିଦ ହେବା ପରେ, ଦୁଃଖ ସହ ଦଇବର ଦାରୁଣ ଯନ୍ତ୍ରଣା ଭୋଗୁଛନ୍ତି ବୀର ଯବାନ ମନୋଜ ବେହେରାଙ୍କ ପରିବାର ।
Kanak News is now on WhatsApp
Join and get latest news updates delivered to you via WhatsApp
ସାହାସୀ ସିପାହୀ ସହିଦ ହେବା ପରେ କେମିତି ପେଟର ଭୋକକୁ ମାରନ୍ତି ସେମାନଙ୍କ ପରିବାର? କେମିତି ଲୁହକୁ ଲକ୍ଷ୍ମଣରେଖା ଭିତରେ ରଖି ବଞ୍ଚିଥାନ୍ତି ପରିଜନ? ନିଆଳିର ସହିଦ ବୀର ମନୋଜ ବେହେରାଙ୍କ ପରିବାରର ଦୟନୀୟ କାହାଣୀ ଆପଣଙ୍କୁ କନ୍ଦାଇଦେବ ।
ଚାହୁଁ ଚାହୁଁ ପୁଅ ସହିଦ ହେବାର ୫ ବର୍ଷ ବିତିଲାଣି । ପୁଲୱାମା ଆତଙ୍କୀ ହମଲାରେ ପୁଅ ପ୍ରାଣବଳୀ ଦେଇଥିଲା, ଆଉ ତା’ର କିଛିମାସ ପରେ ଦୟନୀୟ ଅବସ୍ଥାରେ କଟୁଛି ତାଙ୍କ ପରିବାର ଦିନ । ଏମିତିକି ପେଟକୁ ଦାନା ଗଣ୍ଡେକ ପାଇଁ କୌଳିକ ବୃତ୍ତିକୁ ଆପଣାଇଛନ୍ତି, ତାଳପତ୍ରରେ ତିଆରି ଭୋଗେଇ, ଝାଡୁ, ଇତ୍ୟାଦି କରି ବଜାରରେ ବିକୁଛନ୍ତି ସହିଦଙ୍କ ବାପା ମାଆ ।
ପୁଅର ପିଲାଦିନର ପ୍ରତିଟି ସ୍ମୁତିକୁ ମନେ ପକେଇ ପୁଅର ଫେରିବା ବାଟକୁ ଘର ଦୁଆର ମୁହଁରେ ଚାହିଁ ବସିଛନ୍ତି ବାପା । କେବେ ଫେରିବ ମୋ ପୁଅ ..କଥା ଦେଇ ଯାଇଥିଲା ଶୀଘ୍ର ଫେରିବ ବୋଲି । କଥା ନରଖି ଠକିଦେଲା ମୋତେ । ଧନ ତୁ ଗଲା ପରେ ଆମେ ବୁଢ଼ା, ବୁଢ଼ୀ ଦୁହେଁ କେମିତି ଅଛୁ ଦେଖି ଯାଆ ବୋଲି ମନେ ମନେ ବାହୁନୁଛନ୍ତି ।
ମନୋଜ ବେହେରା ନିଆଳି ରତନପୁର ଗାଁର ବୀର ଯବାନ । ସହୀଦ ସାଙ୍ଗ ସହ ବିତେଇ ଥିବା ସମୟକୁ ପ୍ରତି ମୁହୁର୍ତରେ ମନେ ପକାଇ ମନୋଜକୁ ଝୁରୁଛନ୍ତି ତାଙ୍କ ଗ୍ରାମବାସୀମାନେ । ଆଉ ମନୋଜ ପଢିଥିବା ସ୍ଲୁଲରେ ବି ସେହି ସମାନ ସ୍ଥିତି । କୁନି କୁନି ପିଲାମାନେ ବଡ଼ ଭାଇଙ୍କୁ ହରାଇ ଭାଙ୍ଗି ପଡିଥିବା ବେଳେ ବଡ ହୋଇ ମନୋଜଙ୍କ ପରି ହେବେ ବୋଲି ସପଥ ନେଇଛନ୍ତି । ସହିଦ ପୁଅ ମାଆ କୋଳକୁ ଫେରିବନି କି ଗାଁକୁ ଫେରିବନି । ଆଉ ମୃତ୍ୟୁ ଚିର ସତ୍ୟ ଜାଣି ବି ସୁଖି ଯାଇଥିବା ଘାଆ ତଳୁ ଦରଜକୁ ଭୁଲି ପାରୁନି ମାଆ, ଭୁଲି ପାରୁନି ଗାଁ ।