ଶରଦ ପାୱାର ଓ ଅଜିତ ପାୱାରଙ୍କ ମଧ୍ୟରେ ଗୁପ୍ତ ବୈଠକ, ମହାରାଷ୍ଟ୍ର ରାଜନୀତି ସରଗରମ
କନକ ବ୍ୟୁରୋ : ମହାରାଷ୍ଟ୍ର ଏନସିପି ଅଧ୍ୟକ୍ଷ ଶରଦ ପାୱାର ଓ ବିଦ୍ରୋହୀ ଗୋଷ୍ଠୀର ନେତୃତ୍ୱ ଅଜିତ ପାୱାରଙ୍କ ମଧ୍ୟରେ ଶନିବାର ପୁଣେ ଠାରେ ଏକ ବ୍ୟବସାୟୀକ ପ୍ରତିଷ୍ଠାନ ମଧ୍ୟରେ ଭେଟ ହୋଇଛି । ଏହି ଭେଟ ବେଳେ ଉଭୟଙ୍କ ମଧ୍ୟରେ ଗୁପ୍ତ ବୈଠକ ହୋଇଥିବା କୁହାଯାଉଛି । ଏହି ଗୁପ୍ତ ବୈଠକର ଖବର ଆସିବା ପରେ ମହାରାଷ୍ଟ୍ର ରାଜନୀତି ସରଗରମ ହୋଇଛି । ଏହାକୁ ନେଇ ଏନସିପି ନେତା ଅମୋଲ ମିଟକରୀ କହିଛନ୍ତି କି, ଏହା ପାରିବାରିକ ସମସ୍ୟା ସଂପର୍କରେ ଆଲୋଚନା ହୋଇଥାଇପାରେ ।
Kanak News is now on WhatsApp
Join and get latest news updates delivered to you via WhatsApp
ମହାରାଷ୍ଟ୍ରର ଏକ ଗଣମାଧ୍ୟମ ଦ୍ୱାରା ପ୍ରସାରିତ ହୋଇଥିବା ଖବର ମୁତାବକ ଶନିବାର ଦିନ ୧ଟା ବେଳେ କୋରେଗାଓଁ ପାର୍କ ସ୍ଥିତ ଏକ ବ୍ୟବସାୟ ପ୍ରତିଷ୍ଠାନ ନିକଟରେ ଶରଦ ପାୱାର ପହଂଚିଥିଲେ । ସେଠାରେ ସେ ସନ୍ଧ୍ୟା ୭ଟା ପର୍ଯ୍ୟନ୍ତ ରହିଥିଲେ । ସନ୍ଧ୍ୟା ୭ଟା ବେଳେ ଶରଦ ପାୱାର ଓ ଅଜିତ ପାୱାର ଗଣମାଧ୍ୟମକୁ ଲୁଚି ଏକ କାରରେ ବାହାରକୁ ବାହାରିଯାଇଥିଲେ ।
ଅନୁମାନ କରାଯାଉଛି କି ଏହି ବୈଠକରେ ଏନସିପିର ମହାରାଷ୍ଟ୍ର ଅଧ୍ୟକ୍ଷ ଜୟନ୍ତ ପାଟିଲ ବି ବୈଠକରେ ସାମିଲ ହୋଇଥିଲେ । ଶରଦ ପାୱାର ଓ ଅଜିତ ପାୱାର ଭିନ୍ନ ଭିନ୍ନ କାର୍ଯ୍ୟକ୍ରମରେ ଯୋଗ ଦେବାକୁ ଗତକାଲି ପୁଣେରେ ଥିଲେ ।
ସୂଚନା ଥାଉକି ଗତମାସରେ ମହାରାଷ୍ଟ୍ର ରାଜନୀତିର ଘଟଣାକ୍ରମରେ ଅଜିତ ପାୱାର ଶିବସେନରୁ ବିଦ୍ରୋହ କରି କିଛି ବିଧାୟକ ଓ ସାଂସଦଙ୍କ ସହ ଆସି ବିଜେପି ଓ ସିନ୍ଦେ ମେଣ୍ଟ ସରକାରରେ ସାମିଲ ହୋଇଥିଲେ । ଏହାପରେ ଅଜିତ ପାୱାର ମହାରାଷ୍ଟ୍ରର ଉପ ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ ।