କାଲିମେଳାରେ ଏସଏଚଜି ମହିଳାଙ୍କ ନିଆରା ପ୍ରୟାସ । କାଜୁ ଚାରା ନର୍ସରୀ କରି ଲାଭପାଉଛନ୍ତି ମହିଳା
କନକ ବ୍ୟୁରୋ: ମାଲକାନଗିରି କାଲିମେଳାରେ ରୋଜଗାର କରିବା ପାଇଁ ନୂତନ ପଦ୍ଧତି ଆପଣାଇଛନ୍ତି ମହିଳା । କାଜୁ ଚାରା ନର୍ସରୀ କରି ବେଶ ଦୁଇ ପଇସା ରୋଜଗାର କରୁଛନ୍ତି ସ୍ୱୟଂ ସହାୟକ ଗୋଷ୍ଠୀର ସଦସ୍ୟା । ଘର କାମ ସାରି ନିର୍ଦ୍ଧିଷ୍ଟ ଏକ ସମୟରେ ନର୍ସରୀରେ ଏକାଠି ହୋଇ ଚାରା ଗଛ ଗୁଡ଼ିକର ଯତ୍ନ ନେଉଛନ୍ତି ମହିଳା । କିଏ ଚାରା ଗଛରେ ପାଣି ସିଂଚନ କରୁଛି ତ ପୁଣି କିଏ ଚାରା ଗଛ ପାଇଁ ପଲିଥିନ୍ରେ ମାଟି ଭର୍ତି କରୁଛି । ମିଶନ ଶକ୍ତି ସହଯୋଗରେ ଏମଭି-୭୩ ଗାଁର ପାଖାପାଖି ୧୦ ଜଣ ମହିଳା କାଜୁ ଚାରା ନର୍ସରୀ କରି ରୋଜଗାରକ୍ଷମ ହୋଇପାରିଛନ୍ତି । ଓଡ଼ିଶା ଜୀବିକା ମିଶନ ସହାୟତାରେ ୧ ଲକ୍ଷ ଟଙ୍କା ରୁଣ କରି ମହିଳା ମାନେ ଏପରି ନୂତନ ବ୍ୟବସାୟକୁ ଆପଣାଇଛନ୍ତି । ବାଉଁଶ ବାଡ଼ କରି ପ୍ରଥମେ ୧୪ହଜାର କାଜୁ ଚାରା ଲଗାଇଥିଲେ । ପରେ ୫ ହଜାର ଚାରା ପକାଇବା ପାଇଁ ବେଡ଼ ପ୍ରସ୍ତୁତ କରି ମଂଜି ଲଗାଇଛନ୍ତି । ଗୋଟିଏ କାଜୁ ଗଛ ପିଛା ୧୫ଟଙ୍କାରେ ବିକ୍ରି କରି ବେଶ ଦୁଇ ପଇସା ଲାଭ ପାଉଥିବା କହିଛନ୍ତି ମହିଳା ସ୍ୱୟଂ ସହାୟକ ଗୋଷ୍ଠୀର ସଦସ୍ୟା ।
Kanak News is now on WhatsApp
Join and get latest news updates delivered to you via WhatsApp
ପ୍ରଥମେ କାଜୁ ମଂଜି ସଂଗ୍ରହ କରିବା ପରେ ପଲିଥିନରେ ମାଟି ଭର୍ତି କରି ସେଥିରେ କାଜୁ ମଂଜି ପୋତି ପାଣି ଦେଇଥାନ୍ତି । ୨ ରୁ ୩ ମାସ ପରେ କାଜୁ ଚାରା ପ୍ରାୟ ୬ ରୁ ୮ ଇଂଚ ବଢିଥାଏ । ଏଥିପାଇଁ ମହିଳା ମାନେ ନର୍ସରୀରେ ପାଣି ଦେବା ସହ ଘାସ ଉପୁଡ଼ାଇଥାଆନ୍ତି । ଗଛ ଗୁଡ଼ିକ ବିକ୍ରି ଉପଯୋଗୀ ହେବା ପରେ ବିଭିନ୍ନ ସରକାରୀ ଓ ବେସରକାରୀ ସଂସ୍ଥାକୁ କାଜୁ ଚାରା ଯୋଗାଣ କରାଯାଇଥାଏ । ମହିଳାଙ୍କ ଏହି ନର୍ସରୀରୁ କାଜୁ ଚାରା କିଣି ଅଧିକାଂଶ ସ୍ଥାନରେ ଚାରା ଗଛ ଲଗାଇବା ଆରମ୍ଭ ହୋଇଛି । ମହିଳା ମନେ ମଧ୍ୟ ବେଶ ଦୁଇ ପଇସା ରୋଜଗାର କରିପାରୁଛନ୍ତି । କାଜୁ ଏକ ଲାଭଦାୟକ ବ୍ୟବସାୟ ହୋଇଥିବା ବେଳେ ସଚେତନତା ଅଭାବରୁ କାଲିମେଳା ଅଂଚଳରେ ଏହା ସେତେଟା ଆଦୃତି ଲାଭ କରିନାହିଁ । ଏହି ବ୍ୟବସାୟ ପ୍ରତି ଲୋକଙ୍କୁ ସଚେତନ କରିବା ସହ ଆର୍ଥିକ ଓ ବୈଷୟିକ ସୟାହତା ଯୋଗାଇଦେବାକୁ ସାଧାଣରେ ଦାବି ହୋଇଛି ।