କନକ ବ୍ୟୁରୋ: ସଫଳ ଚାଷୀଙ୍କ କ୍ଷେତରେ ହସୁଛି ସୁନା ଫସଲ । ପିଜୁଳି, ଆମ୍ବ, ଲେମ୍ବୁ, ଅମୃତଭଣ୍ଡା, ସଜାନା ଗଛରେ ଭର୍ତି ହୋଇଛି ବଗିଚା । ପାଖାପାଖି ୧୦ ପ୍ରକାରର ଆମ୍ବଗଛ ଏହି ବଗିଚାରେ ଥିବାବେଳେ ଚଳିତ ବର୍ଷ ଭଲ ଅମଳ ଆଶା ରଖିଛନ୍ତି ଚାଷୀ । ୪ ଏକର ଚାଷ ଜମିରେ ଜୈବିକ ପଦ୍ଧତିରେ ଚାଷ କରି ନିଜେ ରୋଜଗାର କରିବା ସହ ୫୦ଜଣଙ୍କୁ କର୍ମନିଯୁକ୍ତି ଯୋଗାଇଛନ୍ତି ରାୟଗଡ଼ା ଆମଲାଭଟା ଗାଁର ଦୋଡାଲା ଶ୍ରୀନିବାସ । ଏହି ଚାଷ ଯୋଗୁଁ ସେ ବାର୍ଷିକ ୨ରୁ ୩ଲକ୍ଷ ଟଙ୍କା ରୋଜଗାର କରୁଛନ୍ତି । କେବଳ ଫଳ ଓ ପନିପରିବା ନୁହେଁ ଗୋପାଳନ ମଧ୍ୟ କରୁଛନ୍ତି ଶ୍ରୀନିବାସ । ପାଖାପାଖି ୪୦ରୁ ଅଧିକା ଗାଇ ରଖି ସେଥିରୁ ମିଳୁଥିବା କ୍ଷୀର ବ୍ୟବସାୟ କରୁଛନ୍ତି । ଏହା ସହ ଗାଇ ଗୋବରକୁ ଖତ ଭାବେ ବ୍ୟବହାର କରି ଜୈବିକ ପଦ୍ଧତିରେ ଚାଷ କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସବୁଠାରୁ ବଡ଼ କଥା ହେଉଛି ଫସଲ ଅମଳ ପରେ ମାଲ ପରିବହନ ପାଇଁ ଅନ୍ୟ ଗାଡ଼ି ଉପରେ ନିର୍ଭର କରନ୍ତି ନାହିଁ ଶ୍ରୀନିବାସ । ଶଗଡ଼ ଗାଡ଼ିରେ ବଗିଚାରୁ ଉତ୍ପାଦନ ହେଉଥିବା ଫଳ ପନିପରିବା ଲଦି ୧୨ କିଲୋମିଟର ଦୁର ରାୟଗଡ଼ା ସହରରେ ବିକ୍ରି କରନ୍ତି । ଏହା ସହିତ ଚାଷୀଙ୍କୁ ମାଗଣାରେ ଚାରା ଯୋଗାଇ ଜୈବିକ ପଦ୍ଧତିରେ ଚାଷ କରିବା ପାଇଁ ପ୍ରେରଣା ଦିଅନ୍ତି । ଏହାଦ୍ୱାରା ଚାଷୀଙ୍କୁ ପନିପରିବା ପାଇଁ ଆନ୍ଧ୍ର ଉପରେ ନିର୍ଭର କରିବାକୁ ପଡ଼ିବ ନାହିଁ । ଚାଷୀ ଚାହିଁଲେ ଅଧିକ ରୋଜଗାର କରିପାରିବେ ବୋଲି ସେ କୁହନ୍ତି। ୪୦ ବର୍ଷ ପୁର୍ବେ ଆନ୍ଧ୍ରପ୍ରଦେଶରୁ ରାୟଗଡା ଚାଲିଆସିଥିଲେ ଶ୍ରୀନିବାସଙ୍କ ପରିବାର । ଆମଲଭଟା ଗାଁରେ ୪ ଏକର ଜମି କିଣି ସେଥିରେ ବିଭିନ୍ନ ପ୍ରକାରର ଫସଲ କରିଛନ୍ତି । ରାୟଗଡା ଜିଲ୍ଲାର ମୃତିକା ଓ ଜଳବାୟୁ କୃଷି ଉପଯୋଗୀ ହୋଇଥିବାରୁ ପନିପରିବା ଫସଲ ଚାଷୀଙ୍କୁ ଲାଭ ଦେଉଛି । ଚାଷ ପାଇଁ ରାଜ୍ୟ ଓ କେନ୍ଦ୍ର ସରକାରଙ୍କ ପକ୍ଷରୁ ଆର୍ଥୀକ ସହାୟତା ପାଇବା ସହ କୃଷି ଉପକରଣ ପାଇଛନ୍ତି ମଧ୍ୟ ପାଇଛନ୍ତି ଶ୍ରନିବାସ ।