ଜନସମ୍ପର୍କ ଯାତ୍ରାରେ ସଞ୍ଜୟ ଦାସବର୍ମାଙ୍କ ବିସ୍ଫୋରକ ବୟାନ। କହିଲେ, ଚାଲିଛି ଷଡ଼ଯନ୍ତ୍ର, କିଛି ଲୋକ ଭାବୁଛନ୍ତି ଯାହା ନିଷ୍ପତି ନେବେ, ସମସ୍ତେ ମାନିବେ।
କନକ ବ୍ୟୁରୋ: ଶାସକ ବିଜେଡି ଦଳର ବରିଷ୍ଠ ନେତା ସଞ୍ଜୟ ଦାସବର୍ମାଙ୍କ ବିସ୍ଫୋରକ ବୟାନ । କେବଳ ଏହା ଓଡ଼ିଶା ରାଜନୀତିକୁ ଦୋହଲାଇ ଦେଇଛି ତାହା ନୁହେଁ ବରଂ ଛିଡ଼ା କରିଛି ପ୍ରଶ୍ନର ପାହାଡ଼ ।
Kanak News is now on WhatsApp
Join and get latest news updates delivered to you via WhatsApp
କିଏ କରୁଛି ଷଡ଼ଯନ୍ତ୍ର?
କାହା ଉଦ୍ଦେଶ୍ୟରେ ସଞ୍ଜୟଙ୍କ ଏହି ବୟାନ?
ନା’ ନନେଇ କାହାକୁ ଟାର୍ଗେଟ୍ କଲେ ସଞ୍ଜୟ ?
ସଞ୍ଜୟ-ବିଜେଡି ବଢ଼ୁଛି କି ଦୂରତା ?
ପୂର୍ବତନ ମନ୍ତ୍ରୀ ତଥା ବିଧାୟକ ସଞ୍ଜୟ ଦାସ ବର୍ମାଙ୍କ ଏଭଳି ବୟାନ୍, ଠିକ୍ ସେତେବେଳେ ଆସିଛି ଯେତେବେଳେ ରାଜନୀତିର ମାହୋଲ ସରଗରମ ରହିଛି । ସଞ୍ଜୟ କହିଛନ୍ତି- ଏହି ଷଡ଼ଯନ୍ତ୍ର ଭୁବନେଶ୍ୱରରୁ ଆରମ୍ଭ ହୋଇ ପୁରୀ ଯାଏଁ ପହଞ୍ଚିଯାଇଛି । କିଛି ଲୋକ ଭାବୁଛନ୍ତି ଆମେ ଯାହା ନିଷ୍ପତି ନେବୁ, ତାହା ସମସ୍ତେ ଗ୍ରହଣ କରିନେବେ । ଆମେ ମରିଯିବୁ ସିନା, ବ୍ରହ୍ମଗିରିକୁ ଭସାଇ ଦେବୁ ନାହିଁ ବୋଲି ଖୋଲାଖୋଲି ଚ୍ୟାଲେଞ୍ଜ କରିଛନ୍ତି ସଞ୍ଜୟ ।
ତେବେ କିଏ ଏହି ନିଷ୍ପତି ନେଉଛନ୍ତି ଏବଂ କାହାକୁ ଗ୍ରହଣ କରିବାକୁ ବାଧ୍ୟ କରାଯାଉଛି, ସେ ନେଇ କୌଣସି ସୂଚନା ଦେଇନାହାନ୍ତି । ପୁରୀ ଜିଲ୍ଲାରେ ବିଜେଡିର ଜନସମ୍ପର୍କରେ ଯାତ୍ରାକୁ ସମ୍ବୋଧନ କରି ସଞ୍ଜୟ ଆହୁରି କହିଛନ୍ତି- କିଛି ବିଦେଶୀ ଶକ୍ତି, ଓଡ଼ିଶାର ଖଣିଜ ସମ୍ପଦ ଓ ଓଡ଼ିଶାର ରତ୍ନଭଣ୍ଡାରକୁ ଲୁଣ୍ଠନ କରି ପଳେଇବାକୁ ଉଦ୍ୟମ କରୁଛନ୍ତି ।
ଏକଦା ବିଜେଡିର ପାୱାରଫୁଲ ନେତା ଥିବା ସଞ୍ଜୟ ଦାସବର୍ମା ହୁଏତ ଏକପ୍ରକାର କୋଣଠେସା ହୋଇଯାଇଛନ୍ତି । ଦିନେ ଦୁଇ ଦୁଇଟି ଜିଲ୍ଲାର ପର୍ଯ୍ୟବେକ୍ଷକ ଥିବା ସଞ୍ଜୟଙ୍କ ହାତରୁ ପର୍ଯ୍ୟବେକ୍ଷକ ପଦ ହଟାଇ ନିଆଯାଇଥିଲା । କେବଳ ସେତିକି ନୁହେଁ ଛାତ୍ର ଓ ଯୁବ ରାଜନୀତିରେ ସକ୍ରିୟ ଭୂମିକା ନେଉଥିବା ସଞ୍ଜୟଙ୍କୁ ଏଥିରୁ ବି ଧୀରେ ଧୀରେ ଆଉଟ୍ କରିଦିଆଯାଇଛି । ନିର୍ବାଚନ ହାରିବା ପରେ ସନ୍ତୁଷ୍ଟ କରିବା ପାଇଁ ତାଙ୍କୁ ଯୋଜନା ବୋର୍ଡର ଉପାଧ୍ୟକ୍ଷ ପଦ ଦିଆଯାଇଥିଲା, ସତ ହେଲେ ମମ୍ପ୍ରସାରଣ ସମୟରେ ଉପାଧ୍ୟକ୍ଷ ପଦରୁ ବି ସଞ୍ଜୟ ଦାସଙ୍କୁ ହଟାଇ ଦିଆଯାଇଥିଲା । ତେବେ ଏହି ସବୁ ପଛରେ କିଛି ଷଡ଼ଯନ୍ତ୍ର ଥିଲା କି? ଯେଉଁ ଷଡ଼ଯନ୍ତ୍ର କଥା ଏବେ କହୁଛନ୍ତି ସଞ୍ଜୟଦାସବର୍ମା । ବଡ଼ କଥା ହେଉଛି, ସଂଜୟ ଦାସବର୍ମାଙ୍କ ଏହି ବୟାନର ପ୍ରଭାବ ଦଳ ଉପରେ କ’ଣ ପଡ଼ୁଛି ଏବଂ ପଦ୍ମପୁର ଉପ-ନିର୍ବାଚନ ଉପରେ କ’ଣ ପଡୁଛି ତାହା ଦେଖିବାକୁ ଅପେକ୍ଷା ରହିଛି ।