କନକ ବ୍ୟୁରୋ : ସମ୍ବଲପୁର ଫ୍ଲାଏଓଭର ଉଦଘାଟର କାର୍ଯ୍ୟକ୍ରମରେ ରାଜନୈତିକ ଡ୍ରାମା ଦେଖିବାକୁ ମିଳିଛି । ଉଦଘାଟକ ଭାବେ ଆସିଥିବା ପୂର୍ତ ମନ୍ତ୍ରୀ ପ୍ରଫୁଲ୍ଳ ମଲ୍ଲିକ ଚାହିଁ ରହିଥିବା ବେଳେ ବିରୋଧୀ ଦଳ ନେତା ତଥା ସ୍ଥାନୀୟ ବିଧାୟକ ଜୟ ନାରାୟଣ ମିଶ୍ର ସେଠାରେ ପହଞ୍ଚି ଫିତା କାଟି ଦେଇଛନ୍ତି । ଅବଶ୍ୟ ଏହା ପରେ ମନ୍ତ୍ରୀ ମନ୍ତ୍ରୀ ଉଦଘାଟନୀ ଫଳକର ପରଦା ଅନାବରଣ କରିଥିଲେ । ଜିଲ୍ଲାପାଳ କାର୍ଯ୍ୟାଳୟ ସମ୍ମୁଖରେ ଫ୍ଲାଏ ଓଭର ଉପରେ ଉଦଘାଟନୀ ମଞ୍ଚ ପ୍ରସ୍ତୁତ କରାଯାଇଥିଲା । ମଞ୍ଚ ନିକଟରେ ମନ୍ତ୍ରୀ, ବିଜେଡି ନେତା ଓ କର୍ମୀମାନେ ପହଞ୍ଚିଥିଲେ ।
Kanak News is now on WhatsApp
Join and get latest news updates delivered to you via WhatsApp
କିଛି ସମୟ ପରେ ସେହି ସ୍ଥାନରେ ପହଞ୍ଚିଥିଲେ ବିରୋଧୀ ଦଳ ନେତା ଜୟନାରୟାଣ ମିଶ୍ର, ସମ୍ବଲପୁର ସାଂସଦ ନିତେଶ ଗଙ୍ଗଦେବ, ରେଙ୍ଗାଲି ବିଧାୟକଙ୍କ ସମେତ ବିଜେପି ନେତା ଓ କର୍ମୀ । ଗାଡ଼ିରୁ ଓହ୍ଲାଇ ମଞ୍ଚ ନିକଟରେ ପହଞ୍ଚିବା ପରେ ବିରୋଧୀ ଦଳ ନେତା ସିଧାସଳଖ ଫ୍ଲାଏଓଭର ଉଦଘାଟନି ପାଇଁ ଥିବା ଫିତା କାଟିଦେଇଥିଲେ । ବିରୋଧୀ ନେତା ଫିତା କାଟିବା ନେଇ ଉପସ୍ଥିତ ବିଜେପି କର୍ମୀମାନେ ବେଶ ଉତ୍ସାହିତ ହୋଇଥିବା ବେଳେ ବିଜେଡି କର୍ମୀମାନେ ଅସନ୍ତୋଷ ବ୍ୟକ୍ତ କରିଥିଲେ । ପ୍ରୋଟୋକଲ ଅନୁସାରେ କ୍ୟାବିନେଟ ମନ୍ତ୍ରୀ ନା ବିରୋଧୀ ଦଳ ନେତା କିଏ ବଡ଼ ଏହାକୁ ନେଇ ସେଠାରେ ଉପସ୍ଥିତ କର୍ମୀ ଓ ନେତାଙ୍କ ମଧ୍ୟରେ ମୃଦୁ ତର୍କବିତର୍କ ମଧ୍ୟ ଚାଲିଥିଲା ।
ସମ୍ବଲପୁର ସହରର ନେଲ୍ସନ ମଣ୍ଡେଲା ଛକଠାରୁ ଧୁଚୁରାପଡ଼ା ଛକ ପର୍ଯ୍ୟନ୍ତ ୧୮୮୦ ମିଟର ଲମ୍ବା ଏହି ଫ୍ଲାଇଓଭର୍ ପାଇଁ ୧୧୮ କୋଟି ଟଙ୍କା ଖର୍ଚ୍ଚ ହୋଇ ସାରିଥିଲାବେଳେ କାମ କିନ୍ତୁ ଏପର୍ଯ୍ୟନ୍ତ ସରିନାହିଁ । ଆଉ କିଛି ଘର ଓ ଜମି ଅଧିଗ୍ରହଣ, କିଛି ଅଂଶ ସର୍ଭିସ୍ ରୋଡ୍ ନିର୍ମାଣ, ପୋଲ ଉପରୁ ଜଳ ନିଷ୍କାସନ ବ୍ୟବସ୍ଥା, ଫ୍ଲାଇଓଭର୍ ତଳେ ଡିଭାଇଡର୍ ନିର୍ମାଣ ଆଦି କାମ ଏବେ ବି ବାକି ରହିଛି । ତେଣୁ ଖର୍ଚ୍ଚ ଆହୁରି ବୃଦ୍ଧି ପାଇବ । ଭୁବନେଶ୍ବରର ପଣ୍ଡା ଇନ୍ଫ୍ରା ପ୍ରୋଜେକ୍ଟ ସଂସ୍ଥା ଏହି ଫ୍ଲାଇଓଭର୍ ନିର୍ମାଣ କରିଛି । ତେବେ ପାଉଣାକୁ ନେଇ ବିବାଦ ଉପୁଜିବାରୁ ଫ୍ଲାଇଓଭର୍ ନିର୍ମାଣ ପରେ ଏହି ସଂସ୍ଥାକୁ ନୋଟିସ୍ ଦେଇ ବିଦା କରାଯାଇଥିଲା । ପରେ ପୂର୍ତ୍ତ ବିଭାଗ ଅନ୍ୟ ଠିକା ସଂସ୍ଥାଗୁଡ଼ିକ ଜରିଆରେ ବକେୟା କାମ କରାଉଛି ।