ରାଜ୍ୟର ଜଙ୍ଗଲରେ ନିଆଁ ଲାଗିବା ପ୍ରସଙ୍ଗ । ବିଜେପିର ଅଭିଯୋଗ, କାମ୍ପା ଫଣ୍ଡ ଦୁର୍ନୀତି ଲୁଚାଇବା ପାଇଁ ଲଗାଯାଇଛି ନିଆଁ ।
କନକ ବ୍ୟୁରୋ: ଜଙ୍ଗଲରେ ଲାଗିଥିବା ନିଆଁକୁ ନେଇ କୁହୁଳୁଛି ରାଜନୀତି । ଆଉ ଶିମିଳିପାଳର ନିଆଁରେ ଘିଅ ଢ଼ାଳିଲା ଭଳି ବୟାନ ଦେଇ, ଉଭୟ ପ୍ରଶାସନ ଓ ସରକାରଙ୍କୁ ଟାର୍ଗେଟ୍ କରିଛି ବିଜେପି । କେବଳ ସେତିକି ନୁହେଁ, ନିଆଁ ପଛରେ ସରକାର ଷଡଯନ୍ତ୍ର କରୁଥିବା ଅଭିଯୋଗ କରିଛନ୍ତି ବିଜେପି ବିଧାୟକ । କାମ୍ପା ଫଣ୍ଡରେ ହୋଇଥିବା ଦୁର୍ନୀତି ଲୁଚାଇବା ପାଇଁ ଜଙ୍ଗଲରେ ନିଆଁ ଲଗାଯାଇଥିବା ଅଭିଯୋଗ କରିଛନ୍ତି ବାରିପଦାର ବିଜେପି ବିଧାୟକ ପ୍ରକାଶ ସୋରେନ୍ । ଯାହାକି ଶାସକ ଦଳକୁ ଘାଇଲା କରିଛି ।
Kanak News is now on WhatsApp
Join and get latest news updates delivered to you via WhatsApp
ଶିମିଳିପାଳ ସମେତ ରାଜ୍ୟର ବିଭିନ୍ନ ଜଙ୍ଗଲ ଜଳୁଥିବା ବେଳେ, ବିଳମ୍ବରେ ହେଲେ ସୁଦ୍ଧା ଜଙ୍ଗଲର ନିଆଁ ଏବେ ରାଜନୈତିକ ପ୍ରସଙ୍ଗ ହୋଇ ସାମ୍ନାକୁ ଆସିଛି । ଆଉ ଗୋଟିଏ ପାଦ ଆଗକୁ ଯାଇ ବିଜେପି ବିଧାୟକ ସୁବାସ ପାଣିଗ୍ରାହୀ ଅଭିଯୋଗ କରିଛନ୍ତି ଯେ, ଗୋଟିଏ ବିଭାଗ ନିଆଁ ଲଗାଏ, ଆଉ ଗୋଟିଏ ବିଭାଗ ନିଆଁ ଲିଭାଏ । ନୂଆ କେନ୍ଦୁପତ୍ର ପାଇଁ ନିଜେ ନିଆଁ ଲଗାନ୍ତି ଏବଂ ପରେ ନିଜେ ନିଆଁ ଲିଭାନ୍ତି ବୋଲି ରାଜ୍ୟ ସରକାରଙ୍କୁ ଆକ୍ଷେପ କରିଛନ୍ତି । ଏପଟେ ଜଙ୍ଗଲ ଓ ପରିବେଶ ମନ୍ତ୍ରୀ କିନ୍ତୁ କହିଛନ୍ତି- ବିରୋଧୀ ଦଳର ଅଭିଯୋଗରେ କୌଣସି ଭିତ୍ତିିନାହିଁ ।
ଅନ୍ୟପଟେ ମୁଖ୍ୟ ଶାସନ ସଚିବଙ୍କୁ ଭେଟି ଜଙ୍ଗଲରେ ଲାଗିଥିବା ନିଆଁକୁ ଆୟତ କରିବା ଦିଗରେ ପଦକ୍ଷେପ ନେବା ପାଇଁ ଲିଖିତ ଭାବରେ ଜଣାଛନ୍ତି ବିଜେପିର ୪ ଜଣିଆ ବିଧାୟକ ଦଳ । ରାଜ୍ୟରେ ଏପର୍ଯ୍ୟନ୍ତ ୯୧୯ଟି ଜଙ୍ଗଲରେ ନିଆଁ ବ୍ୟାପିଥିବା, ବିଜେପି ବିଧାୟକମାନେ ମୁଖ୍ୟ ଶାସନ ସଚିବଙ୍କୁ ଜଣାଇଛନ୍ତି । ଏହାରି ଭିତରେ କିନ୍ତୁ ଜୈବ ବିଭିଧତା ପୂର୍ଣ୍ଣ ଶିମିଳିପାଳ ଜଙ୍ଗଲ ଜଳୁଛି । ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ପିସିସିଏଫ୍ ଯାଇ ଘଟଣାସ୍ଥଳରେ ଅନୁଧ୍ୟାନ କରିବା ପରେ ଯେଉଁ ବୟାନ ରଖିଥିଲେ, ତାହା ସମସ୍ତଙ୍କୁ ଆଶ୍ଚର୍ଯ୍ୟ କରୁଛି । କାରଣ, ଅଭୟାରଣ୍ୟର କୋର୍ ଅଂଚଳରେ ନିଆଁ ଲାଗିଥିବା ବେଳେ ବଡ଼ ଗଛ ଜଳି ନାହିଁ କିମ୍ବା କୋର ଅଂଚଳରେ ନିଆଁ ଲାଗିନାହିଁ । ଆଉ ଏସବୁ ଭିତରେ କିନ୍ତୁ ଶିମିଳିପାଳ ପାଇଁ ସଂକଟ ବଢ଼ି ଚାଲିଛି ।