କନକ ବ୍ୟୁରୋ : କଂଗ୍ରେସ ଲୋକସଭା ନିର୍ବାଚନ ପାଇଁ ବହୁ ଆସନରେ ପ୍ରାର୍ଥୀ ଘୋଷଣା କରିସାରିଥିବା ବେଳେ ଦୁଇଟି ଗୁରୁତ୍ୱପୂର୍ଣ୍ଣ ଆସନରେ ଏଯାଏଁ ପ୍ରାର୍ଥୀ ଘୋଷଣା କରିନାହିଁ । ଏହି ଦୁଇ ଆସନ ହେଲା ଆମେଠି ଓ ରାଏବରେଲି । ଉତରପ୍ରଦେଶର ଏହି ଦୁଇ ଆସନକୁ କଂଗ୍ରେସର ଗଡ଼ ବୋଲି କୁହାଯାଏ । ପିଢ଼ି ପରେ ପିଢ଼ି କଂଗ୍ରେସ ନେତା ବିଶେଷକରି ଗାନ୍ଧୀ ପରିବାରର ସଦସ୍ୟ ଏହି ଦୁଇ ଆସନରୁ ବିଜୟୀ ହୋଇଆସିଛି । ହେଲେ ଏଥର ଏହି ଦୁଇ ଆସନରୁ କିଏ ଲଢ଼ିବ, ତାକୁ ନେଇ ସସପେନ୍ସ ଜାରି ରହିଛି । ତେବେ ଶୁକ୍ରବାର ଏନେଇ ସ୍ପଷ୍ଟତା ଆସିଯିବାର ସମ୍ଭାବନା ରହିଛି ।
Kanak News is now on WhatsApp
Join and get latest news updates delivered to you via WhatsApp
ପ୍ରିୟଙ୍କା ଗାନ୍ଧୀ ଭଦ୍ରା କଂଗ୍ରେସର ମହାସଚିବ ଭାବେ କିଛି ବର୍ଷ ହେଲା କାର୍ଯ୍ୟ ତୁଲାଇ ଆସୁଥିଲେ ବି ଏଯାଏଁ ସିଧାସଳଖ ନିର୍ବାଚନ ଲଢ଼ି ନାହାନ୍ତି । ଆଉ ଯଦି କଂଗ୍ରେସ ତାଙ୍କୁ ଏଥର ପ୍ରାର୍ଥୀ କରିବାକୁ ଚାହେଁ, ତାହେଲେ ରାଏବରେଲି ଠାରୁ ଭଲ ଆସନ ଆଉ କ’ଣ ହୋଇପାରିବ? ରାଏବରେଲିରୁ ଲଗାତର ଭାବେ ଲଢ଼ି ଜିତିଆସୁଥିଲେ ସୋନିଆ ଗାନ୍ଧୀ । ହେଲେ ସେ ଏଥର ଲୋକସଭା ନିର୍ବାଚନ ଲଢ଼ିବେ ନାହିଁ ବୋଲି ସ୍ପଷ୍ଟ କରିସାରିଛନ୍ତି । ଏହାସହ ରାଜ୍ୟସଭାକୁ ନିର୍ବାଚିତ ହୋଇସାରିଛନ୍ତି । ତେଣୁ ଏହି ଆସନରେ କଂଗ୍ରେସ ପ୍ରିୟଙ୍କାକୁ ପ୍ରାର୍ଥୀ କରିପାରେ ବୋଲି କୁହାଯାଉଛି ।
ଅନ୍ୟପକ୍ଷରେ ଆମେଠି ଆସନରୁ ପୁଣି ଥରେ ରାହୁଲ ଗାନ୍ଧୀ ପ୍ରାର୍ଥୀ ହେବାର ଅଧିକ ସମ୍ଭାବନା ରହିଛି । ରାହୁଲ ଗତଥର ମଧ୍ୟ ଦୁଇଟି ଆସନରୁ ଲଢ଼ିଥିଲେ । ୟୁପିର ଆମେଠି ଓ କେରଳର ୱାଏନାଡରୁ ପ୍ରାର୍ଥୀ ହୋଇଥିଲେ ରାହୁଲ । ୱାଏନାଡରୁ ରାହୁଲ ବିଜୟୀ ହୋଇଥିଲେ, ହେଲେ ଆମେଠରେ ବିଜେପିର ସ୍ମୃତି ଇରାନୀଙ୍କ ଠାରୁ ହାରିଯାଇଥିଲେ । ଏଥର ମଧ୍ୟ ରାହୁଲ ୱାଏନାଡରୁ ଲଢ଼ୁଛନ୍ତି । ଏହାସହ ପୁଣି ଆମେଠିରୁ ରାହୁଲଙ୍କୁ ପ୍ରାର୍ଥୀ ଘୋଷଣା କରିପାରେ କଂଗ୍ରେସ ।
ଏପ୍ରିଲ ୨୬ରେ ଆମେଠି ଓ ରାଏବରେଲି ଆସନ ନେଇ କଂଗ୍ରେସ ଘୋଷଣା କରିପାରେ । ଏହି ଦୁଇ ଆସନରେ ମେ ୨୦ରେ ମତଦାନ ହେବ । ୟୁପିରେ ଏଥର ସମାଜବାଦୀ ପାର୍ଟି ସହ ଆସନ ବୁଝାମଣା କରିଛି କଂଗ୍ରେସ । ଏଥିର ୟୁପିରେ କଂଗ୍ରେସ ୧୭ଟି ଆସନରେ ଲଢ଼ୁଛି ।