ବେଙ୍ଗାଲୁରୁରେ ବିରୋଧୀଙ୍କ ମହାବୈଠକ । ନୂଆ ନାଁରେ ମୋଦୀ ସରକାରଙ୍କୁ ଦେବେ ଟକ୍କର, ୨୦୨୪ରେ ‘ଏନଡିଏ’ ବନାମ ‘ଇଣ୍ଡିଆ’ ଲଢେଇ!
କନକ ବ୍ୟୁରୋ : ୨୦୨୪ ନିର୍ବାଚନ ପାଇଁ ନୂଆ ନାଁ ଓ ନୂଆ ଉତ୍ସାହ ନେଇ ମଇଦାନକୁ ଓହ୍ଲାଇବ ବିରୋଧୀ । ବେଙ୍ଗାଲୁରୁରେ ଚାଲିଥିବା ବୈଠକରେ ବିରୋଧୀ ଦଳର ନୂଆ ନାଁ ‘ଇଣ୍ଡିଆ’ ରଖାଯାଇଥିବା ସୂଚନା ମିଳିଛି । ଅର୍ଥାତ୍ ୨୦୨୪ ସାଧାରଣ ନିର୍ବାଚନରେ ଏନଡିଏକୁ ଟକ୍କର ଦେବ ‘ଇଣ୍ଡିଆନ ନ୍ୟାଶନାଲ ଡେଭଲମେଣ୍ଟାଲ ଆଲାଏନ୍ସ’ ବା ଇଣ୍ଡିଆ । କଂଗ୍ରେସ ନେତୃତ୍ୱାଧୀନ ବିରୋଧୀ ଗୋଷ୍ଠୀଙ୍କ ପୁରୁଣା ନାଁ ୟୁପିଏ ଥିଲା । ଏବେ ସବୁ ବିରୋଧୀ ଦଳ ଇଣ୍ଡିଆ ମେଂଟର ଭାଗିଦାରୀ ହେବେ । ପାଟନା ପରେ ବେଙ୍ଗାଲୁରୁରେ ବିରୋଧୀ ଦଳଙ୍କ ଆୟୋଜିତ ହୋଇଛି ଦୁଇ ଦିନିଆ ବୈଠକ । ସୋମବାର ବୈଠକର ପ୍ରଥମ ଦିନ ଅନଔପଚାରିକ ଥିଲା । ମଙ୍ଗଳବାର ଓøପଚାରିକ ବୈଠକ ହୋଇଛି, ଯେଉଁଥିରେ ମହାମେଂଟର ନାମକରଣ ଉପରେ ବିଚାରବିମର୍ଶ ହୋଇଛି । ସେପଟେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ବୈଠକ ପରେ ଏକଥା ସ୍ପଷ୍ଟ କରିଛନ୍ତି ୨୬ ଦଳ ମନ ମିଶାଇ ଏକାଠି କାମ କରିବେ । କ୍ଷମତା କି ପ୍ରଧାନମନ୍ତ୍ରୀ ପଦ ହାତେଇବାକୁ କଂଗ୍ରେସର କୌଣସି ଉଦ୍ଦେଶ୍ୟ ନାହିଁ । ବରଂ ଲୋକତନ୍ତ୍ର, ଧର୍ମନିରପେକ୍ଷ, ସାମାଜିକ ନ୍ୟାୟ ରକ୍ଷା କରିବା ମୁଖ୍ୟ ଲକ୍ଷ୍ୟ । ଦେଶର ପ୍ରଗତି, ବିକାଶ, କଲ୍ୟାଣ ପାଇଁ ବିରୋଧୀ ଏକଜଜୁଟ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ବିରୋଧୀଙ୍କ ମେଳିକୁ ଟାର୍ଗେଟ କରି ପ୍ରଧାନମନ୍ତ୍ରୀ କହିଛନ୍ତି ପରିବାରବାଦର କଟ୍ଟର ସମର୍ଥକ ଗୋଟିଏ ମଂଚରେ ଏକତ୍ରିତ ହୋଇଛନ୍ତି । ଏହା ଏକ ଭଷ୍ଟ୍ରାଚାର ସମ୍ମିଳନୀ । ଏମାନେ ପରିବାର ପାଇଁ ଭଷ୍ଟ୍ରାଚାରକୁ ବୃଦ୍ଧି କରିବାରେ ଲାଗିପଡିଛନ୍ତି । କିଛି ବିରୋଧୀ ନେତା ନିିଜ ନିଜର ଦୁର୍ନିତି ଲୁଚାଇବା ପାଇଁ ପରସ୍ପର ସହ ହାତ ମିଳାଇଛନ୍ତି ।
ବର୍ତମାନର ରାଜନୈତିକ ପରିସ୍ଥିିତିକୁ ଦେଖିଲେ ୨୦୨୪ରେ ଏନଡିଏ ସମ୍ମୁଖରେ ବିରୋଧୀ ମେଂଟ ନୂଆ ଆହ୍ୱାନ ସୃଷ୍ଟି କରିପାରେ । ବେଙ୍ଗାଲୁରୁ ବୈଠକରେ ଯଦିଓ ସମସ୍ତ ବିରୋଧୀ ଦଳ ଗୋଟିଏ ମନ ନେଇ କାମ କରିବେ ବୋଲି କହୁଛନ୍ତି କିନ୍ତୁ ନିର୍ବାଚନ ପୂର୍ବରୁ ଆସନ ଭାଂଗବଂଟାବେଳେ ଏହି ଏକତା ସତରେ କାମ ଦେବ ନା ନାହିଁ ସେକଥା ଆଗାମୀ ଦିନରେ ଜଣାପଡିବ ।