କନକ ବ୍ୟୁରୋ : ଦଳ ବିରୋଧୀ କାର୍ଯ୍ୟ ଅଭିଯୋଗରେ ବିଧାୟକ ମହମ୍ମଦ ମୋକିମ ଓ ପୂର୍ବତନ ବିଧାୟକ ଚିରଞ୍ଜୀବ ବିଶ୍ୱାଳଙ୍କ ଭଳି ବରିଷ୍ଠ ନେତାଙ୍କୁ ଦଳରୁ ନିଲମ୍ବନ କରାଯିବା ପରେ, ଆରମ୍ଭ ହୋଇଛି ଅଙ୍କକଷା । ଦଳର ବରିଷ୍ଠ ନେତାମାନଙ୍କୁ ବାଦ ଦେଇ କଂଗ୍ରେସ ୨୦୨୪ରେ କେମିତି ମିଶନ ୯ରୁ ୯୦ରେ ସଫଳ କରିବ ସେ ନେଇ ଆଶଙ୍କା ସୃଷ୍ଟି ହୋଇଛି । ଆଉ ପ୍ରତିକ୍ରିୟାଶୀଳ ହୋଇ ପଡିଛନ୍ତି କଂଗ୍ରେସ ନେତା । କିଏ ସପକ୍ଷରେ ବାହାରୁଛନ୍ତି ଆଉ କିଏ ବିପକ୍ଷରେ ମତ ରଖୁଛନ୍ତି । ଏହି କାର୍ଯ୍ୟାନୁଷ୍ଠାନ ପରେ ଦଳରେ ଶୃଙ୍ଖଳା ବଜାୟ ରହିବ ବୋଲି କିଛି ନେତା କହୁଥିବାବେଳେ ଆଉ କିଛି ନେତା କହିଛନ୍ତି, ଆଲୋଚନା ନକରି ନେତାଙ୍କ ଉପରେ କାର୍ଯ୍ୟାନୁଷ୍ଠାନ ଦଳକୁ ଭାରି ପଡିବ ।
Kanak News is now on WhatsApp
Join and get latest news updates delivered to you via WhatsApp
୨୦୧୭ ପରଠାରୁ ରାଜ୍ୟରେ ତୃତୀୟ ସ୍ଥାନକୁ ଚାଲି ଆସିଥିବା କଂଗ୍ରେସ ନିଜର ସ୍ଥିତି ବଜାୟ ରଖିବା ପାଇଁ ସଂଘର୍ଷ କରୁଥିବାବେଳେ, ବରିଷ୍ଠ ନେତାଙ୍କୁ ନିଲମ୍ବନ କରାଯିବା ଅନେକ ପ୍ରଶ୍ନବାଚୀ ସୃଷ୍ଟି କରିଛି । କଟକରେ କଂଗ୍ରେସର ସ୍ଥିତି ଭଲ ଥିବାବେଳେ ବିଧାୟକ ମୋକିମଙ୍କୁ ନିଲମ୍ବନ କରାଯିବା, ଜଗତସିଂହପୁରରେ କଂଗ୍ରେସର ଭୋଟ ହାର ଅଧିକ ଥିବାବେଳେ ଚିରଞ୍ଜୀବଙ୍କୁ ନିଲମ୍ବନ କରାଯିବା ଓ ଜୟପୁରରେ ତାରା ବାହିନୀପତିଙ୍କ ସଂଗଠନ ମଜବୁତ ଥିବାବେଳେ ତାଙ୍କ ପତ୍ନୀ ମିନାକ୍ଷୀ ବାହିନୀପତିଙ୍କୁ କୋରାପୁଟ ଜିଲ୍ଲା ସଭାପତି ପଦରୁ ହଟାଯିବା ସନ୍ଦେହକୁ ବଢ଼ାଇ ଦେଇଛି ।
ତେବେ ଏସବୁ ଭିତରେ ଆସନ୍ତା ୨୨ ତାରିଖରେ କଂଗ୍ରେସ ଭବନରେ ବସିବାକୁ ଯାଉଛି ବରିଷ୍ଠ ନେତାଙ୍କ ବୈଠକ । ଏହି ବୈଠକରେ ଦଳର ବରିଷ୍ଠ ନେତାଙ୍କ ଉପରେ କାର୍ଯ୍ୟାନୁଷ୍ଠାନ ପ୍ରସଙ୍ଗ ଉଠିବ ବୋଲି ଚର୍ଚ୍ଚା ହେଉଛି । ତେବେ ବୈଠକ ପରେ କଂଗ୍ରେସର ଆଗାମି ରଣନୀତି କଣ ରହୁଛି ତାହା ସ୍ପଷ୍ଟ ହେବ ।