ଗୋଟିଏ ପଟେ ମହାମାରୀ, ଅନ୍ୟପଟେ ମହଙ୍ଗା ମାଡ଼ । ଏହାରି ଭିତରେ ସନ୍ତୁଳି ହେଉଛି ମଧ୍ୟବିତ୍ତ ।
କରୋନା କଟକଣା ଯୋଗୁଁ ବ୍ୟବସାୟ ବନ୍ଦ, ଚାକିରିଆଙ୍କ କଟୁଛି ଦରମା
କନକ ବ୍ୟୁରୋ: ନାଗଫାଶରେ ଫସି ଯାଇଛନ୍ତି ମଧ୍ୟବିତ୍ତ । ମହଙ୍ଗା ମାଡରେ ଭାଙ୍ଗି ଯାଇଛି ମଧ୍ୟବିତ୍ତ ମେରୁଦଣ୍ଡ । କରୋନା କଟକଣା ଓ ଭୂତାଣୁର ଭିଡ ଭିତରେ ଭୁଷୁଡି ଯାଇଛି ସେମାନଙ୍କ ଆର୍ଥିକ ସ୍ଥିତି । ରୋଜାଗର ସିନା ଠପ୍ ହୋଇଯାଇଛି, କିନ୍ତୁ ଖର୍ଚ୍ଚ ବଢିଛି । ରୋଷେଇ ଗ୍ୟାସ ଠାରୁ ଆରମ୍ଭ କରି ଖାଇବା ତେଲ, ସବୁ ଦର ବଢିଛି । ଏହାରି ଭିତରେ ମଧ୍ୟବିତ୍ତ ମଣିଷ ଟିଏ ଖାଇବ କଣ, ପିଲାର ପଢା ଖର୍ଚ୍ଚ ତୁଲାଇବ କେମିତି ତାକୁ ନେଇ ଚିନ୍ତାରେ ପଡିଛି । ଯାହାର ଚିତ୍ର ଏବେ ସାରା ରାଜ୍ୟରୁ ଆସିଛି…
Kanak News is now on WhatsApp
Join and get latest news updates delivered to you via WhatsApp
ଭୁବନେଶ୍ୱରର ଜିତେନ୍ଦ୍ର କୁମାର ଦାସ ଜୟଦେବ ବିହାରରେ ଥିବା ଏକ କୋରିୟର କମ୍ପାନୀରେ କାମ କରନ୍ତି । କରୋନା ପୂର୍ବରୁ ସବୁ କିଛି ଠିକ ଠାକ୍ ଥିଲା । ଏବେ ନା ସେ ଦେଇ ପାରୁଛନ୍ତି କାର ଇଏମଆଇ, ନା ଦେଇ ପାରୁଛନ୍ତି ପୁଅର ସ୍କୁଲ ଫି’ । ଭୁବନେଶ୍ୱରରେ ଯେଉଁ ଅବସ୍ଥା ସମ୍ବଲପୁରରେ ବି ସେହି ଅବସ୍ଥା । କରୋନା କଟକଣା ଯୋଗୁଁ ଧିମେଇ ଯାଇଛି ବେପାର । ତେଜରାତି ଦୋକାନ କରିଥିବା ସୁବାସ ସାହୁ ଓ ତାଙ୍କ ପତ୍ନୀ, ଏବେ କିପରି ପରିବାର ଚଳାଇବେ ଏହି ଚିନ୍ତା ସେମାନଙ୍କୁ ଘାରିଛି । ରନ୍ଧନ ଗ୍ୟାସ ଠାରୁ ଆରମ୍ଭ କରି ପେଟ୍ରୋଲ ଦର ବୃଦ୍ଧି ବୋଝ ଉପରେ ନଳିତା ବିଡ଼ା ସଦୃଶ ହୋଇଛି ।
- କରୋନା କାଳରେ ବଢୁଛି ମଧ୍ୟବିତ୍ତଙ୍କ ଦୁଃଖ
- ରୋଜଗାର କମୁଛି, ଖର୍ଚ୍ଚ ବଢ଼ୁଛି
- ପେଟ୍ରୋଲ ଲିଟର ଶହେ, ଗ୍ରୋସରି ପ୍ରାୟ ୪୦% ମହଙ୍ଗା
- ମଧ୍ୟବିତ୍ତଙ୍କ ଉପରେ ପଡ଼ିଛି ମହଙ୍ଗା ମାଡ଼
ଖାଇବା ତେଲ ଦର ପ୍ରାୟ ୫୦ ପ୍ରତିଶତ ବଢ଼ିଯାଇଥିବା ବେଳେ ପେଟ୍ରୋଲ ଲିଟର ଦାମ ଶହେ ଉପରେ । ମଧ୍ୟବିତ ପରିବାରର ଗୃହିଣୀ, ରୋଷେଇ କରୁଥିବା ବେଳେ ଚିନ୍ତାରେ ପଡିଯାଉଛି । ମହାଙ୍ଗା କାଳରେ କିପରି ପରିବାର ଚଳାଇବେ ଚିନ୍ତାରେ ପଡିଛନ୍ତି କଟକ ଛତ୍ରବଜାର ଅଂଚଳରେ ରହୁଥିବା ବିଭୂତି ରଣା ଓ ତାଙ୍କ ପତ୍ନୀ । ଘରୋଇ କଂପାନୀରେ ଚାକିରି କରୁଥିବା ବିଭୂତିଙ୍କ ଦରମା କଟୁଥିବାରୁ ବାଇକ ବଦଳରେ ସାଇକେଲରେ ଯିବାଆସିବା କରୁଛନ୍ତି ।
ଅନ୍ୟପଟେ ଲାଲମୋହନ ପଟ୍ଟନାୟକ ମାଲକାନଗିରି ଡିଏନକେ ଛକରେ ଏକ ଖେଳନା ଦୋକାନ କରି ପରିବାର ପୋଷନ୍ତି । ଘରେ ସ୍ତ୍ରୀ, ଗୋଟିଏ ପୁଅ ସହ ବୁଢା ମାଁଙ୍କୁ ନେଇ ୪ ପ୍ରାଣୀ କୁଟୁମ୍ବ । ଯାହା କଣ୍ଡେଇ ଦୋକାନରୁ ମିଳୁଥିଲା, ସେଥିରୁ କଷ୍ଟେ ମଷ୍ଟେ ପରିବାର ଚଳୁଥିଲା । କରୋନା କଟକଣା ଯୋଗୁଁ ଦୋକାନରେ ତାଲା ପଡିବା ପରେ ଜୀବନ ସଂଘର୍ଷ କରୁଛନ୍ତି ଲାଲମୋହନ । ନା ବ୍ୟାଙ୍କ ରୁଣ ସୁଝି ପାରୁଛନ୍ତି, ନା ବୁଢ଼ି ମାଆ ପାଇଁ ଔଷଧ କିଣି ପାରୁଛନ୍ତି ।
ଗୋଟିଏ ପଟେ ମହାମାରୀ, ଅନ୍ୟପଟେ ମହଙ୍ଗା ମାଡ଼ । ଆଉ ଏହାରି ଭିତରେ ସନ୍ତୁଳି ହୋଇଯାଉଛି ମଧ୍ୟବିତ୍ତଙ୍କ ଜୀବନ । କରୋନା କଟକଣା ଯୋଗୁଁ ବ୍ୟବସାୟ ବନ୍ଦ, ଘରୋଇ କଂପାନିରେ ଦରମା କାଟ ଭିତରେ ଆକାଶ ଛୁଆଁ ହୋଇଛି ବଜାର ଦର । କିପରି ପରିବାର ଚଳାଇବ, ଏହି ଚିନ୍ତାରେ ପଡିଛି ମଧ୍ୟବିତ ପରିବାର ।