ମୋଦୀ ଓ ରାହୁଲଙ୍କ ପାଇଁ ନୋଟିସ । ନିର୍ବାଚନ ଆଚରଣ ବିଧି ଉଲଂଘନ ନେଇ ବିଜେପି ଓ କଂଗ୍ରେସକୁ ନୋଟିସ୍ ପଠାଇଲେ ନିର୍ବାଚନ ଆୟୋଗ
କନକ ବ୍ୟୁରୋ : ନିର୍ବାଚନୀ ରୁତୁରେ ରାଜନୈତିକ ମାହୋଲ ସରଗରମ ହୋଇପଡ଼ିଛି । ଏ ଭିତରେ ନିର୍ବାଚନୀ ଆଚରଣ ବିଧି ଉଲଂଘନ ଅଭିଯୋଗ ମଧ୍ୟ ଆସୁଛି । ଏବେ ପ୍ରଧାନମନ୍ତ୍ରୀ ମୋଦୀ ଓ କଂଗ୍ରେସର ସବୁଠୁ ବଡ଼ ଚେହେରା ରାହୁଲ ଗାନ୍ଧୀଙ୍କ ବିରୋଧରେ ଏପରି ଅଭିଯୋଗ ଆସିଛି । ଏହା ନିର୍ବାଚନ ଆୟୋଗଙ୍କ ଦୃଷ୍ଟିକୁ ଆସିଛି । ଏନେଇ ନିର୍ବାଚନ ଆୟୋଗ ପଦକ୍ଷେପ ନେଇଛନ୍ତି । ଉଭୟ ବିଜେପି ଓ କଂଗ୍ରେସ ଠାରୁ ଜବାବ ମାଗିଛନ୍ତି ଇସି । ଏପ୍ରିଲ ୨୯ ଦିନ ୧୧ ସୁଦ୍ଧା ଏହି ଜବାବ ରଖିବାକୁ ପଡ଼ିବ । ବିଜେପି ଅଧ୍ୟକ୍ଷ ଜେପି ନଡ୍ଡା ଓ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କୁ ଇସିଙ୍କ ପକ୍ଷରୁ ନୋଟିସ୍ ପଠାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ନିର୍ବାଚନ ଆୟୋଗଙ୍କ କହିଛନ୍ତି ଯେ, “ଦଳୀୟ ପ୍ରଚାରକ, ବିଶେଷକରି ଷ୍ଟାର ପ୍ରଚାରକଙ୍କ ବ୍ୟବହାର ନେଇ ସମ୍ପୃକ୍ତ ଦଳଙ୍କୁ ଦାୟିତ୍ୱ ନେବାକୁ ହେବ । ନିର୍ବାଚନୀ ପ୍ରଚାର ବେଳେ ଭାଷଣ ଗୁରୁତ୍ୱ ରଖେ । ବଡ଼ ବଡ଼ ଦାୟିତ୍ୱରେ ଥିବା ବ୍ୟକ୍ତିଙ୍କ ଭାଷଣର ଢେର ପ୍ରଭାବ ଓ ଗୁରୁତ୍ୱ ରଖିଥାଏ’ । ଉଭୟ ବିଜେପି ଓ କଂଗ୍ରେସ ପରସ୍ପର ବିରୋଧରେ ନିର୍ବାଚନ କମିଶନଙ୍କ ନିକଟରେ ଅଭିଯୋଗ କରିଥିଲେ । ଏହାପରେ ପଦକ୍ଷେପ ନେଇଛନ୍ତି ନିର୍ବାଚନ ଆୟୋଗ ।
ତେବେ ମୋଦୀ ଓ ରାହୁଲଙ୍କ ଯେଉଁ ଭାଷଣ ପାଇଁ ନିର୍ବାଚନ କମିଶନ ବଜେପି ଓ କଂଗ୍ରେସକୁ ଉତର ରଖିବାକୁ କହିଛନ୍ତି, ସେହି ଭାଷଣରେ କ’ଣ ଥିଲା? କାହିଁକି ଏହାକୁ ନେଇ ବିବାଦ ସୃଷ୍ଟି ହୋଇଛି । ରାଜସ୍ଥାନରେ ମୋଦୀ ଭାଷଣ ଦେଇ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କ ଏକ ଭାଷଣ ଆଧାରରେ କଂଗ୍ରେସକୁ ଟାର୍ଗେଟ କରିଥିଲେ । ମୋଦୀ କହିଥିଲେ ଯଦି କଂଗ୍ରେସ କ୍ଷମତାକୁ ଆସେ ତାହେଲେ ଦେଶର ସମ୍ପତି ଅନୁପ୍ରବେଶକାରୀ ଓ ଆଉ ଯେଉଁମାନଙ୍କ ଅଧିକ ପିଲା ଅଛନ୍ତି, ସେମାନଙ୍କ ଭିତରେ ବାଂଟିଦେବ । ମୋଦୀ ଏପରି ମନ୍ତବ୍ୟ ଦ୍ୱାରା ଘୃଣା ସୃଷ୍ଟି କରୁଥିବା କଂଗ୍ରେସ ଅଭିଯୋଗ କରିଥିଲା । ସେପଟେ ବିଜେପି ରାହୁଲଙ୍କ ବିରୋଧରେ ଅଭିଯୋଗ କରିଛି ଯେ, ରାହୁଲ ଦେଶରେ ଦାରିଦ୍ର୍ୟ ବଢ଼ୁଛି ବୋଲି ମିଛ କଥା କହି ଲୋକଙ୍କୁ ଭ୍ରମିତ କରୁଛନ୍ତି । ଏହାସହ କଂଗ୍ରେସ ନେତା ଉତର ଓ ଦକ୍ଷିଣ ଭାରତ ମଧ୍ୟରେ ବିଭେଦ ବଢ଼ାଇବାକୁ ଚେଷ୍ଟା କରୁଛନ୍ତି ।
ଦେଶରେ ଏବେ ୭ଟି ପର୍ଯ୍ୟାୟରେ ଲୋକସଭା ନିର୍ବାଚନ ହେବାର ଅଛି । ଏପ୍ରିଲ ୧୯ରେ ୧୦୨ ଆସନରେ ପ୍ରଥମ ପର୍ଯ୍ୟାୟ ମତଦାନ ହୋଇଥିବା ବେଳେ ଏପ୍ରିଲ ୨୬ରେ ଦ୍ୱିତୀୟ ପର୍ଯ୍ୟାୟ ନିର୍ବାଚନ ହେବ । ଜୁନ୍ ୧ରେ ଶେଷ ପର୍ଯ୍ୟାୟ ନିର୍ବାଚନ ଥିବା ବେଳେ ଜୁନ୍ ୪ରେ ଫଳାଫଳ ପ୍ରକାଶ ପାଇବ ।