ଆରମ୍ଭ ହେଲା ରତ୍ନଭଣ୍ଡାର ଚାବି ଖୋଜା? ଜୁଲାଇ ୨୫ ତାରିଖ ଯାଏଁ ତଦନ୍ତ କମିଶନଙ୍କ ନିକଟରେ ଦାଖଲ ହେବ ସତ୍ୟପାଠ
କନକ ବ୍ୟୁରୋ : ରତ୍ନଭଣ୍ଡାର ଚାବି ହଜିବା ପ୍ରସଙ୍ଗକୁ ନେଇ ସାରା ରାଜ୍ୟରେ ଚର୍ଚ୍ଚା ଲାଗି ରହିଥିବା ବେଳେ ଆଜିଠାରୁ ବିଚାର ବିଭାଗୀୟ ତଦନ୍ତ ପ୍ରକ୍ରିୟା ଆରମ୍ଭ ହୋଇଛି । ରତ୍ନଭଣ୍ଡାର ଚାବି ହଜିବା ପରେ ଏହାର ବିଚାର ବିଭାଗୀୟ ତଦନ୍ତ ପାଇଁ ଏକ କମିଶନ ଗଠନ କରିଥିଲେ । ଯେଉଁଥିରେ ଅଧ୍ୟକ୍ଷ ଭାବେ ନିଯୁକ୍ତି ପାଇଥିବା ହାଇକୋର୍ଟର ଅବସରପ୍ରାପ୍ତ ବିଚାରପତି ଜଷ୍ଟିସ ରଘୁବୀର ଦାସ ଆଜି ଠାରୁ ତଦନ୍ତ କାର୍ଯ୍ୟ ଆରମ୍ଭ କରିଛନ୍ତି । କଟକ ସ୍ଥିତ କମିଶନଙ୍କ ମୁଖ୍ୟ କାର୍ଯ୍ୟାଳୟରେ ଆଜିଠାରୁ ତଦନ୍ତ ପ୍ରକିୟା ଆରମ୍ଭ ହୋଇଛି । ଏହି ବିଚାର ବିଭାଗୀୟ ତଦନ୍ତ ଆସନ୍ତା ଜୁଲାଇ ୨୫ ତାରିଖ ଯାଏଁ ଚାଲିବ । ଏହି ସମୟ ମଧ୍ୟରେ ତଦନ୍ତ କମିଶନ ଅଧ୍ୟକ୍ଷଙ୍କ ନିକଟରେ ସତ୍ୟପାଠ ଦାଖଲ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ବାସ୍ତବରେ ଚାବି କେଉଁଆଡେ ଗାଏବ ହୋଇଗଲା, କାହା ସମୟରେ ଚାବି ହଜିଲା ଏବଂ ଏଥିପାଇଁ କିଏ ଦାୟୀ ସେ ବାବଦରେ ତଦନ୍ତ କରି ତିନିମାସ ମଧ୍ୟରେ ରିପୋର୍ଟ ଦେବେ ଜୁଡିସିଆଲ କମିସନ୍ । ଏହାଛଡ଼ା ଆଗକୁ ଯେପରି ଏଭଳି ଘଟଣାର ପୁନରାବୃତି ନଘଟେ ତାହାର ରିପୋର୍ଟ ଦେବେ ତଦନ୍ତ କମିଶନ । ଗତ ଏପ୍ରିଲ ୪ ତାରିଖରେ ରତ୍ନଭଣ୍ଡାର ଖୋଲିବା ଦିନ ଚାବି ନମିଳିବାରୁ ରତ୍ନଭଣ୍ଡାର ଖୋଲାଯାଇନଥିବା କଥା ପରିଚାଳନା ବୈଠକ ବିବରଣୀରେ ସ୍ପଷ୍ଟ କରାଯାଇଥିଲା। ଫଳରେ ଗ୍ରୀଲ ଦ୍ୱାର ବାଟେ ସର୍ଚ ଲାଇଟରେ ଭଣ୍ଡାର ଯାଂଚ ହୋଇଥିଲା । ଚାବି ନ ମିଳିବାରୁ ପରିଚାଳନା କମିଟିର ବିନା ଅନୁମତିରେ ଚାବି ଭାଙ୍ଗିବା ଠିକ୍ ନଥିଲା ବୋଲି ଭଣ୍ଡାର ଖୋଲିବା ସମୟରେ ସମସ୍ତ ସଭ୍ୟ ମତ ରଖି ଫେରିଆସିଥିବା ମନ୍ଦିର ପ୍ରଶାସକ ବୈଠକରେ କହିଥିଲେ । ପରେ ରତ୍ନଭଣ୍ଡାର ଚାବି ହଜିବା ନେଇ ଜଣା ପଡ଼ିବା ପରେ ରାଜ୍ୟ ସରକାରଙ୍କୁ ସିଧାସଳଖ ଟାର୍ଗେଟ କରିଥିଲେ ବିରୋଧୀ । ଏପରିକି ଏହି ଘଟଣା ପାଇଁ ସରକାରୀ ଦଳକୁ ସମ୍ପୂର୍ଣ୍ଣ ଭାବେ ଦାୟୀ କରାଯାଇଥିଲା । ସବୁ ଦୋଷ ସରକାରଙ୍କ ମୁଣ୍ଡରେ ବୋଳିଥିଲେ ବିରୋଧୀ । ତେଣୁ ଏହାର ବିଚାର ବିଭାଗୀୟ ତଦନ୍ତ କରିବାକୁ ନିର୍ଦ୍ଦେଶ ଦେଇଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଉ ତିନି ମାସ ମଧ୍ୟରେ ଏହାର ରିପୋର୍ଟ ଦେବାକୁ ନିର୍ଦ୍ଦେଶ ଦେଇଥିଲେ । ଯାହା ଆଜି ଠାରୁ ଆରମ୍ଭ ହୋଇଛି ।