୪ ଦିନ ହେଲାଣି ଗୁମ୍ଫାରେ ଫସି ରହିଛନ୍ତି ୧୨ଜଣ ଛୁଆ ! ୧୦୦୦ ରୁ ଅଧିକ ଲୋକ କରୁଛନ୍ତି ଉଦ୍ଧାର, ବର୍ଷା ସାଜୁଛି ବାଧକ ।
ଉତ୍ତର ଥାଇଲାଣ୍ଡର ଏକ ଗୁମ୍ଫାରେ ୧୨ଜଣ କନିଷ୍ଠ ଫୁଟବଲ ଖେଳାଳୀ ଏବଂ ସେମାନଙ୍କର କୋଚ ଦୀର୍ଘ ୪ ଦିନରୁ ଅଧିକ ହେବ ଫସି ରହିଛନ୍ତି । କିନ୍ତୁ ଏପର୍ଯ୍ୟନ୍ତ ତାଙ୍କ ସହ କୌଣସି ସମ୍ପର୍କ କିମ୍ବା ଯୋଗାଯୋଗ ହୋଇପାରୁନାହିଁ । ସେମାନଙ୍କ ପରିବାରବର୍ଗ ଚିନ୍ତାରେ ରହିଥିବା ବେଳେ ଭଗବାନଙ୍କୁ ହିଁ ଏବେ ଏକମାତ୍ରା ସାହାରା ମାନି ନେଇଛନ୍ତି । ତେବେ ସେମାନଙ୍କୁ ଉଦ୍ଧାର କରିବା ପାଇଁ ସୈନିକମାନଙ୍କ ସହ ୧ ହଜାର ଲୋକଙ୍କୁ ନିୟୋଜିତ କରାଯାଇଛି । ବର୍ଷା ବାଧକ ସାଜୁଥିବାରୁ ଉଦ୍ଧାର କାର୍ଯ୍ୟରେ ଅନେକ ବାଧା ଉପୁଜୁଛି ।
Kanak News is now on WhatsApp
Join and get latest news updates delivered to you via WhatsApp
ଶନିବାର ଦିନ ଚିୟାଙ୍ଗ ରାଇରେ ଥାମ୍ ଲୁଆଂଗ ଗୁମ୍ଫାର ପ୍ରବେଶ ଦ୍ୱାର ପାଖରେ ଖେଳାଳୀ ମାନଙ୍କର ସାଇକେଲ, ଜୋତା ଏବଂ ଅନ୍ୟ କେତେକ ସାମଗ୍ରୀ ମିଳିଥିଲା । ତେବେ ସେମାନେ ଗୁମ୍ଫା ଭିତରେ ଫସି ରହିଥିବା ଜଣାପଡିଛି । ଏହି ଟିମରେ ୧୨ଜଣ ଖେଳାଳୀଙ୍କ ବୟସ ୧୧ରୁ ୧୬ ବର୍ଷ ମଧ୍ୟରେ ରହିଛି । ସେମାନେ ସମସ୍ତେ ଯୁବ ଫୁଟବଲ୍ ଦଳର ସଦସ୍ୟ ବୋଲି ଜଣାପଡିଛି । ଏବଂ ସେମାନେ ନିଜର ୨୫ ବର୍ଷୀୟ କୋଚଙ୍କ ସହ ଗୁମ୍ଫାକୁ ଯାଇଥିଲେ ।
ଉଦ୍ଧାରକାର୍ଯ୍ୟ ଟିମର ପ୍ରବକ୍ତା ରୁଏତେବାନ୍ ପେତିସେନ୍ କହିଛନ୍ତି ଯେ, ତାଙ୍କୁ ବିଶ୍ୱାସ ରହିଛି ଗୁମ୍ଫାରେ ନିଖୋଜ ଥିବା ସମସ୍ତ ବ୍ୟକ୍ତି ଏବେ ବି ଜୀବିତ ଅଛନ୍ତି । ତେବେ ଥାଇଲାଣ୍ଡ ସେନାର ଉଚ୍ଚସ୍ତରୀୟ ଟିମ ଉନ୍ନତଧରଣର ଉପକରଣ ସହ ଖେଳାଳୀ ଏବଂ କୋଚଙ୍କୁ ଖୋଜୁଛି । ତେବେ ଉଦ୍ଧାରକାରୀ ଦଳର କହିବା ଅନୁଯାୟୀ, ବର୍ଷା କାରଣରୁ ଗୁମ୍ଫା ଭିତରକୁ ଯିବାର ସମସ୍ତ ରାସ୍ତା ବନ୍ଦ ହୋଇଯାଇଛି । ଏବେ ପାଣି ଜମା ହୋଇଯିବା କାରଣରୁ ସେମାନେ ବାହାରକୁ ଆସିପାରୁନାହାନ୍ତି ।