ଟୋକିଓରେ ଲେଖାହେଲା ନୂଆ ଇତିହାସ । ୪୧ ବର୍ଷ ପରେ ଖୁସି ଆଣିଦେଲା ଶେଷ ୬ ସେକେଣ୍ଡର ଚମକପ୍ରଦ ହକି । ଜର୍ମାନୀକୁ ମାତ୍ ଦେଇ ବ୍ରୋଞ୍ଜ ଜିତିଲା ଟିମ୍ ଇଣ୍ଡିଆ ।
କନକ ବ୍ୟୁରୋ : ଯାହାକୁ ୪୧ ବର୍ଷ ଧରି ଚାହିଁ ରହିଥିଲେ ଦେଢ଼ ଶହ କୋଟି ଭାରତୀୟ । ଟୋକିଓ ଅଲିମ୍ପିକ୍ସରେ ବ୍ରୋଂଜ ପଦକ ହାସଲ କରି ନୂଆ ଇତିହାସ ରଚିଛି ଭାରତ । ୧୯୮୦ ମସ୍କୋ ଅଲିମ୍ପିକ୍ସରେ ଭାରତ ସ୍ୱର୍ଣ୍ଣ ପଦକ ପାଇଥିବା ବେଳେ ୪ ଦଶନ୍ଧି ଧରି ଜାତୀୟ ଖେଳ ହକିରେ ପଦକ ପାଇବାକୁ ସମର୍ଥ ହୋଇନଥିଲା ଦେଶ । ଟୋକିଓ ଅଲିମ୍ପିକ୍ସରେ ସେମିଫାଇନାଲରେ ବେଲଜିୟମ ଠାରୁ ହାରିଯିବା ପରେ ଆଜି ବ୍ରୋଞ୍ଜ ମେଡାଲ ପାଇଁ ଜର୍ମାନୀ ସହ ମୁକାବିଲା କରିଥିଲା ଭାରତ । ସଂଘର୍ଷପୂର୍ଣ୍ଣ ଓ ରୋମାଞ୍ଚରେ ଭରା ଏହି ମ୍ୟାଚକୁ ୫-୪ ଗୋଲରେ ଜର୍ମାନୀକୁ ହରାଇ ବ୍ରୋଞ୍ଜ ପଦକ ହାସଲ କରିଛି ଭାରତ ।
Kanak News is now on WhatsApp
Join and get latest news updates delivered to you via WhatsApp
୪୧ ବର୍ଷ ଧରି କୋଟି କୋଟି ଭାରତୀୟ ଯେଉଁ ସ୍ୱପ୍ନ ଦେଖି ଆସୁଥିଲେ, ତାହା ଯେତେବେଳେ ବାସ୍ତବର ରୂପ ନେଇଥିଲା, ଭାରତୀୟ ହକି ଦଳ ଅଧିନାୟକ ମନପ୍ରୀତ ସିଂଙ୍କ ଆଖିରୁ ଖୁସିରେ ଲୁହ ଝରିଆସିଥିଲା । ଟୋକିଓ ପଡିଆରେ ଭାରତୀୟ ଖେଳାଳି ଉତ୍ସବ ମନାଉଥିବା ବେଳେ ଜର୍ମାନୀ ଶିବିରରେ ନିରାଶା ଖେଳି ଯାଇଥିଲା । ବ୍ରୋଞ୍ଜ ବିଜୟ ପରେ ଗୋଲକିପର ପିଆର ଶ୍ରୀଜେଶ, ଆନନ୍ଦରେ ଏପରି ଅଧୀର ହୋଇଥିଲେ ଯେ ଗୋଲ ପୋଷ୍ଟ ଉପରେ ବସି ପଡିଥିବା ଦେଖିବାକୁ ମିଳିଥିଲା ।
କ୍ରିକେଟକୁ ଏକ ଧର୍ମ ଭାବେ ଗ୍ରହଣ କରିଥିବା ଭାରତୀୟଙ୍କ ଆଭିମୁଖ୍ୟ ଆଜି ବଦଳି ଯାଇଥିଲା । ଅଲିମ୍ପିକ୍ସ ହକି ବ୍ରୋଂଜ ମେଡାଲ ପାଇଁ ଜର୍ମାନୀ ସହ ପ୍ରତିଦ୍ୱନ୍ଦ୍ୱିତା ପାଇଁ ଓହ୍ଲାଇଥିଲା ଭାରତ । ଆଉ ସକାଳ ୭ଟାରୁ ଟିଭି ଲଗାଇ ଏହି ଐତିହାସିକ ମୁହୂର୍ତ୍ତର ସାକ୍ଷୀ ବନିଥିଲେ ଦେଶର କୋଟି କୋଟି ଜନତା । ଖେଳ ଆଗକୁ ବଢ଼ୁଥିଲା, ଭାରତୀୟଙ୍କ ହୃତସ୍ପନ୍ଦନର ଗତି କ୍ଷିପ୍ର ହେଉଥିଲା । ଖେଳର ମାତ୍ର ୨ ମିନିଟରେ ଭାରତକୁ ଜର୍ମାନୀ ଗୋଲ ଦେବା ପରେ ନିର୍ବାକ ହୋଇ ପଡିଥିଲେ ଭାରତୀୟ ହକିପ୍ରେମୀ । ତେବେ ଦଳର ଲଢୁଆ ପ୍ରଦର୍ଶନ, ଲୋକଙ୍କ ମନରେ ଆଶା ଭରି ଦେଇଥିଲା । ୧୭ ମିନିଟରେ ଭାରତ ଗୋଲ ଦେଇ ମ୍ୟାଚକୁ ସମାନ ସ୍ଥିତିକୁ ନେଇଥିଲା । ଦ୍ୱିତୀୟ କ୍ୱାଟରରେ ୨ଟି ଲଗାତର ଗୋଲ ଦେଇ ୩-୧ରେ ଆଗୁଆ ହୋଇ ଯାଇଥିଲା ଜର୍ମାନୀ ।
ଦ୍ୱିତୀୟ କ୍ୱାଟରର ଶେଷ କିଛି ମିନିଟ୍ ଓ ତୃତୀୟ କ୍ୱାଟରରେ ପ୍ରଭାବଶାଳୀ ପ୍ରଦର୍ଶନ କରି ୪-୩ରେ ଲିଡ ନେଇଥିଲା ଭାରତ । ଶେଷ କ୍ୱାଟରର ୧୫ ମିନିଟ ଏପରି ରୋମାଂଚକର ଥିଲା ଯେ ପ୍ରତ୍ୟେକ ଭାରତୀୟ ହୃଦୟର ଗତି ବଢ଼ି ଯାଇଥିଲା । ୫-୪ ଗୋଲରେ ଭାରତ ବିଜୟର ଦ୍ୱାର ଦେଶରେ ପହଁଚି ଯାଇଥିଲା । ହେଲେ ପ୍ରତ୍ୟେକ ମୁହୂର୍ତ ଥିଲା ଗୁରୁତ୍ୱପୂର୍ଣ୍ଣ । ବିଜୟ ଠାରୁ ମାତ୍ର ୬ ସେକେଣ୍ଡ ଦୂରତାରେ ଥିଲା ଭାରତ । ଆଉ ଏହି ସମୟରେ ଜର୍ମାନୀକୁ ମିଳିଲା ପେନାଲଟି କର୍ଣ୍ଣର । ଏହା ଯଦି ଗୋଲରେ ରୂପାନ୍ତରିତ ହୋଇଥାନ୍ତା, ତେବେ ପେନାଲ ସୁଟଆଉଟରେ ମ୍ୟାଚର ଭାଗ୍ୟ ନିର୍ଦ୍ଧାରିତ ହୋଇଥାନ୍ତା । ହେଲେ ଗୋଲକିପର ପିଆର ଶ୍ରୀଜେଶ ଭାରତ-ଜର୍ମାନୀ ମଧ୍ୟରେ ପାଚେରୀ ଭଳି ଛିଡା ହୋଇଥିଲେ । ତାଙ୍କର ଚମତ୍କାର ଗୋଲ ରକ୍ଷଣ ଭାରତକୁ ବହୁ ପ୍ରତୀକ୍ଷିତ ଓ ଐତିହାସିକ ବିଜୟ ଆଣି ଦେଇଥିଲା ।
ବିଜୟର ବଡ଼ ଶ୍ରେୟ ଯାଇଥିଲା ଶ୍ରୀଜେଶଙ୍କ ନିକଟକୁ । ଭାରତର ଫରୱାର୍ଡ ଖେଳାଳିଙ୍କ ଠାରୁ ଆରମ୍ଭ କରି ରକ୍ଷଣ ଭାଗ ପର୍ଯ୍ୟନ୍ତ, ସମସ୍ତଙ୍କ ପ୍ରଦର୍ଶନ ଥିଲା ଅତୁଳନୀୟ । ସତେଯେମିତି ଏହି ମ୍ୟାଚ ପାଇଁ ସବୁ ଯାକ ଶକ୍ତି ସାଇତି ରଖିଥିଲା ଭାରତୀୟ ଦଳ । ବିଜୟ ପରେ ଉତ୍ସବ ମୁଖର ହୋଇ ଯାଇଥିଲା ଟୋକିଓ ଗ୍ରାଉଣ୍ଡ । ସାରା ଭାରତରେ ଉତ୍ସବ ମନାଇଥିଲେ ଦେଶବାସୀ ।
ଆଉ ଏହି ବିଜୟ ଓଡ଼ିଶା ପାଇଁ ମଧ୍ୟ ବଡ଼ ଗୌରବ ଆଣିଦେଇଛି । ପ୍ରଥମ ଥର ପାଇଁ ଦୁଇ ଓଡ଼ିଆ ଖେଳାଳି ଅଲିମ୍ପିକ୍ସରେ ମେଡାଲ ଜିତିଛନ୍ତି । ଦଳଗତ ଇଭେଣ୍ଟରେ ବ୍ରୋଂଜ ପଦକ ପାଇ ଇତିହାସ ରଚିଥିବା ଏହି ଖେଳାଳି ହେଉଛନ୍ତି ବୀରେନ୍ଦ୍ର ଲାକ୍ରା ଓ ଅମିତ ରୋହି ଦାସ । ରାଜ୍ୟ ସରକାରଙ୍କ ଘୋଷଣା ମୁତାବକ ଉଭୟ ଖେଳାଳି ଅଢ଼େଇ କୋଟି ଲେଖାଏଁ ପୁରସ୍କାର ଜିତିବାକୁ ହକଦାର ହୋଇଛନ୍ତି ।