ଆଖି ବୁଜିଲେ ଭାସ୍କର ସାର୍ । ରାଷ୍ଟ୍ରପତି ପୁରସ୍କାରପ୍ରାପ୍ତ ପ୍ରଧାନ ଶିକ୍ଷକଙ୍କୁ ହରାଇ କାନ୍ଦୁଛନ୍ତି ଛାତ୍ରଛାତ୍ରୀ ।
କନକ ବ୍ୟୁରୋ: ଆଖିବୁଜିଲେ ରାଷ୍ଟ୍ରପତି ପୁରସ୍କାର ପ୍ରାପ୍ତ ପ୍ରଧାନ ଶିକ୍ଷକ ଭାସ୍କର ଚନ୍ଦ୍ର ଦାସ । ୟୁନିଭରସିଟି ହାଇସ୍କୁଲ,ବାଣୀବିହାରର ରାଷ୍ଟ୍ରପତି ପୁରସ୍କାର ପ୍ରାପ୍ତ ଅବସରପ୍ରାପ୍ତ ପ୍ରଧାନ ଶିକ୍ଷକ ଭାବେ ବେଶ୍ ଖ୍ୟାତି ଅର୍ଜନ କରିଥିଲେ ଭାସ୍କର ସାର୍ । ସୂଚନା ମୁତାବକ ଆଜି ସକାଳ ପ୍ରାୟ ୧୦ଟାରେ ବୁଦ୍ଧେଶ୍ୱରି କଲୋନୀ ସ୍ଥିତ ତାଙ୍କ ବାସଭବନରେ ଭାସ୍କର ସାରଙ୍କ ଦେହାନ୍ତ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
୧୯୨୩ ମସିହାରେ ଆଠଗଡ଼ ରାଧାଦର୍ଶନପୁର ଗ୍ରାମରେ କୁଳୀନ ବ୍ରାହ୍ମଣ ପରିବାରରେ ଜନ୍ମ ଗ୍ରହଣ କରିଥିବା ଭାସ୍କର ସାର୍ ଜୀବନରେ ବହୁ ଘାତ ପ୍ରତିଘାତ ମଧ୍ୟ ଦେଇ ସମସ୍ତଙ୍କ ଆଦର୍ଶ ପାଲଟିଥିଲେ । ପ୍ରଥମେ ବିବେକାନନ୍ଦ ବିଦ୍ୟାପୀଠ, ବହୁଗ୍ରାମ ଓ ପରେ ୟୁନିଭରସିଟି ହାଇସ୍କୁଲ, ବାଣୀବିହାରର ପ୍ରଧାନ ଶିକ୍ଷକ ପଦରୁ ୧୯୮୬ ରେ ଅବସର ଗ୍ରହଣ କରିଥିଲେ । ଜଣେ ବିଶିଷ୍ଟ ଶିକ୍ଷାବିତ୍ ଭାବେ ସମାଜ ରେ ବହୁତ୍ ସମ୍ମାନ ଥିଲା । ଇଂରାଜୀ ବ୍ୟାକରଣ, ଅନୁବାଦ,ଅନ୍ୟାନ୍ୟ ପୁସ୍ତକ ପ୍ରକାଶ କରିବା ସହ ମାଧ୍ୟମିକ ଶିକ୍ଷା ପରିଷଦର ଇଂରାଜୀ ପୁସ୍ତକର ଏଡିଟୋରିଆଲ ବୋର୍ଡର ସଭ୍ୟ ମଧ୍ୟ ଥିଲେ ।
କେବଳ ଶିକ୍ଷା ନୁହେଁ ସାମାଜ ସେବା କାର୍ଯ୍ୟରେ ମଧ୍ୟ ସେ ନିଜକୁ ନିୟୋଜିତ କରିଥିଲେ । ଜଣେ ଛାତ୍ର ବତ୍ସଳ ଶିକ୍ଷକ ଓ ସଚ୍ଚୋଟ ମଣିଷଙ୍କର ବନ୍ଧୁ ହିସାବରେ ସେ ସୁପରିଚିତ ଥିଲେ । ବିଭିନ୍ନ ଅନୁଷ୍ଠାନ ତରଫରୁ ତାଙ୍କୁ ବହୁ ସମ୍ମାନରେ ସମ୍ମାନିତ କରାଯାଇଥିଲା। ତାଙ୍କର ଅବର୍ତ୍ତମାନରେ ଛାତ୍ର ସମାଜ ଶୋକାଭିଭୂତ ।