ବେଙ୍ଗାଲୁରରେ ଶବ, ଓଡିଶାରେ ଧାରଣା ଦେଇଛନ୍ତି ବାପା ମା । ଅର୍ଥ ଅଭାବରୁ ଆଣିପାରୁନାହାନ୍ତି ଝିଅର ମୃତଦେହ
କନକ ବ୍ୟୁରୋ: ବେଙ୍ଗାଲୁରରେ ଶବ, ଓଡିଶାରେ ଧାରଣା ଦେଇଛନ୍ତି ବାପା ମା । ଅର୍ଥ ଅଭାବରୁ ଝିଅର ଶବକୁ ଫେରାଇ ଆଣି ପାରୁନଥିବାରୁ ଲୋୟର ପିଏମଜିରେ ଧାରଣା ଦେଇଛନ୍ତି ବାପା ମାଆ । ୨୦୨୧ରେ ପୁରୀ ଜିଲ୍ଲା ବେଣାଗାଁର ସୁମିତ୍ରା ହରିଚନ୍ଦନ ନାମକ ନାବାଳିକାଙ୍କୁ ଚନ୍ଦନ ପାଇକରାୟ ନାମକ ଯୁବକ ପ୍ରେମ ବିବାହ କରି ବେଙ୍ଗାଲୁର ନେଇଯାଇଥିଲେ । ଆଉ ଏବେ ଆସିଛି ଝିଅର ମୃତ୍ୟୁ ଖବର । ହେଲେ, ଝିଅର ଶବ ଫେରାଇ ଆଣିବାକୁ ବାଧକ ସାଜିଛି ଅର୍ଥ ।
Kanak News is now on WhatsApp
Join and get latest news updates delivered to you via WhatsApp
ବଢ଼ିଲା ଝିଅର ମୃତ୍ୟୁର ଖବର ଯେତେବେଳେ ମା’ର ପାଖରେ ଆସି ପହଞ୍ଚିଛି, ଆଉ ମୃତଦେହ ସୁଦୂର ବାଙ୍ଗାଲୋରରେ ଅଟକି ରହିଛି, ସେତେବେଳେ କେଉଁ ମା’ର ହୃଦୟ ବା’ ଥୟ ଧରିଥାନ୍ତା । ଝିଅର କଥା ବାହୁନି ବାହୁନି କାନ୍ଦୁଛନ୍ତି ଜଣେ ମା’ । କେତେବେଳେ କାନ୍ଦିକାନ୍ଦି ଅଚେତ୍ ହୋଇଯାଉଛନ୍ତି ତ’ କେତେବେଳେ ଝିଅର ମୃତଦେହ ଫେରାଇ ଆଣିବା ପାଇଁ ନେହୁରା ହେଉଛନ୍ତି । ୯ଦିନ ହେଲାଣି ଝିଅର ମୃତ୍ୟୁ ହୋଇସାରିଛି । ହେଲେ ଅର୍ଥାଭାବରୁ ଝିଅର ମୃତଦେହ ଘରକୁ ଆଣିପାରୁନାହିଁ । ଏଭଳି ସ୍ଥିତିରେ ଝିଅର ମୃତଦେହ ବେଙ୍ଗାଲୁରୁ ଫେରାଇ ଆଣିବାକୁ ଲୋୟର ପିଏମଜିରେ ଧାରଣା ଦେଇଛନ୍ତି ବାପା ମାଅ।।
୨୦୨୧ରେ ପୁରୀ ଜିଲ୍ଲା ବେଣାଗାଁର ସୁମିତ୍ରା ହରିଚନ୍ଦନ ନାମକ ଜଣେ ନାବାଳିକା ନିଖୋଜ ହୋଇଯାଇଥିଲେ । ଏନେଇ କଣାସ ଥାନାରେ ପରିବାର ଲୋକେ ଏତଲା ଦେଇଥିଲେ ମଧ୍ୟ ପୁଲିସ କୌଣସି ତତ୍ପରତା ଦେଖାଇନଥିଲା । କିଛି ଦିନ ପରେ ଘର ଲୋକ ଜାଣିବାକୁ ପାଇଥିଲେ, ସୁମିତ୍ରାକୁ ଅଭିଷେକ ପାଇକରାୟ ନାମକ ଜଣେ ଯୁବକ ପ୍ରେମ ବିବାହ କରି ବେଙ୍ଗଲୋର ନେଇଯାଇଛି । ଏହାର କିଛି ମାସ ପରେ ବେଙ୍ଗାଲୋରରୁ ଝିଅ ଫୋନ କରି ତାକୁ ନିର୍ଯାତନା ଦିଆଯାଉଛି, ତେଣୁ ଘରକୁ ନେଇଯିବାକୁ ବାପା ମାଆଙ୍କୁ କହିଥିଲେ । ହେଲେ ଅର୍ଥ ଅଭାବରୁ ଯାଇପାରିନଥିଲେ ପରିବାର ଲୋକେ । ଆଉ ଗତ ୬ ତାରିଖରେ ବେଙ୍ଗାଲୋରରେ ଝିଅର ମୃତ୍ୟୁ ହୋଇଥିବା ଫୋନ କରି କହିଥିଲେ ଅଭିଷେକ ପାଇକରାୟ ।
ଅଭିଯୁକ୍ତ ଅଭିଷେକ ପାଇକରାୟକୁ ବାଙ୍ଗାଲୋର ପୁଲିସ ଅଟକ ରଖିଥିବା ବେଳେ ସୁମିତ୍ରାଙ୍କ ମୃତଦେହକୁ ସ୍ଥାନୀୟ ଏକ ହସ୍ପିଟାଲ ରଖାଯାଇଛି । ମୃତଦେହକୁ ନେଇଯିବା ପାଇଁ ପରିବାର ଲୋକଙ୍କୁ କୁହାଯାଇଥିବା ବେଳେ ଘଟଣା ସମ୍ପର୍କରେ ପୁରୀ ଏସପି ଏବଂ ପୁଲିସ ଡିଜିଙ୍କୁ ସୂଚନା ଦିଆଯାଇଛି ।
୯ ଦିନ ହେଲାଣୀ ବାଙ୍ଗାଲୋରରେ ପଡ଼ି ରହିଛି ଝିଅର ମୃତଦେହ । ହେଲେ ଅର୍ଥ ଅଭାବ ଯୋଗୁଁ ଝିଅର ମଲା ମୁହଁ ଥରେ ଦେଖିପାରୁ ନାହାଁନ୍ତି ପରିବାର ଲୋକ । ଆଉ ପ୍ରଶାସନର ସାହାରା ଆଶାରେ ଧାରଣା ଦେଉଛନ୍ତି ମା’ ବାପା ।