ଏଡିଆର ରିପୋର୍ଟ: କେସିଆରଙ୍କ ଦଳକୁ ମିଳିଛି ସବୁଠୁ ଅଧିକ ଅନୁଦାନ । ବିଜେଡିକୁ ମିଳିନି କିଛି ବି ଚାନ୍ଦା । ସାମ୍ନାକୁ ଆସିଲା ଆଞ୍ଚଳିକ ଦଳମାନଙ୍କୁ ମିଳିଥିବା ଅନୁଦାନ ରିପୋର୍ଟ
କନକ ବ୍ୟୁରୋ: ୨୦୨୧-୨୨ ଆର୍ଥିକ ବର୍ଷରେ ସବୁଠୁ ଅଧିକ ଚାନ୍ଦା ପାଇଛି କେସିଆରଙ୍କ ଦଳ । ଗତ ଆର୍ଥିକ ବର୍ଷରେ ଭାରତ ରାଷ୍ଟ୍ର ସମିତି ପାଖାପାଖି ୪୧ କୋଟି ଟଙ୍କା ଅନୁଦାନ ପାଇଥିବାବେଳେ, ଆଞ୍ଚଳିକ ଦଳମାନଙ୍କ ଭିତରେ ସବୁଠୁ ଅଧିକ ଅନୁଦାନ ପାଇଛି । ସେହିପରି ଓଡିଶାରେ ଶାସନ କ୍ଷମତାରେ ଥିବା ବିଜେଡି ଗତ ଆର୍ଥିକ ବର୍ଷରେ କୌଣସି ବି ଚାନ୍ଦା ପାଇନଥିବା ଏଡିଆର ରିପୋର୍ଟରେ ତଥ୍ୟ ପ୍ରକାଶ ପାଇଛି । ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମ (ଏଡିଆର) ରିପୋର୍ଟ ମୁତାବକ ପୂର୍ବରୁ ଟିଆରଏସ୍ ଥିବା ଭାରତ ରାଷ୍ଟ୍ର ସମିତି ଦଳ ଗତ ବର୍ଷ ମୋଟ ୪୦.୯ କୋଟି ଟଙ୍କା ଅନୁଦାନ ପାଇଛି ବୋଲି ନିର୍ବାଚନ କମିଶନଙ୍କ ପାଖରେ ରିପୋର୍ଟ ଦାଖଲ କରିଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ରାଜନୈତିକ ଦଳମାନଙ୍କୁ ଅନୁଦାନ ଆକାରରେ କେତେ ଟଙ୍କା ମିଳେ, ସେ ନେଇ ରାଜନୈତିକ ଦଳ ନିର୍ବାଚନ କମିଶନଙ୍କୁ ରିପୋର୍ଟ ପ୍ରଦାନ କରିଥାନ୍ତି । ଯାହାର ତଥ୍ୟ ଏବେ ଏଡିଆର ପ୍ରକାଶ କରିଛି । ଏଡିଆର ରିପୋର୍ଟରେ ୨୬ଟି ରାଜନୈତିକ ଦଳର ତଥ୍ୟ ପ୍ରକାଶ ପାଇଥିବାବେଳେ, ଏହି ଦଳମାନଙ୍କୁ ମୋଟ ୫୧୦୦ ଲୋକ ୧୯୦ କୋଟି ଟଙ୍କା ଅନୁଦାନ ଦେଇଛନ୍ତି । ତେବେ ସବୁଠୁ ଅଧିକ ଅନୁଦାନ ପାଇଥିବା ୫ଟି ରାଜନୈତିକ ଦଳଙ୍କ ଭିତରେ ଭାରତ ରାଷ୍ଟ୍ର ସମିତି ସହିତ ଆମ୍ ଆଦମୀ ପାର୍ଟି, ଜନତା ଦଳ ୟୁନାଇଟେଡ୍, ସମାଜବାଦୀ ପାର୍ଟି ସହ ୱାଇ ଏସ୍ ଜଗନ ମୋହନ ରେଡ୍ଡିଙ୍କର ୱାଇଏସଆର କଂଗ୍ରେସ ମଧ୍ୟ ସାମିଲ ଅଛି ।
ବିଆରଏସକୁ ଗତ ଆର୍ଥିକ ବର୍ଷରେ ୪୦.୯୦ କୋଟି ଟଙ୍କା ଅନୁଦାନ ମିଳିଥିବାବେଳେ, ଆମ୍ ଆଦମୀ ପାର୍ଟିକୁ ୩୮.୨୪ କୋଟି ଟଙ୍କା ଅନୁଦାନ ମିଳିଛି । ସେହିପରି ଜେଡିୟୁକୁ ୩୩.୨୫ କୋଟି, ସମାଜବାଦୀ ପାର୍ଟିକୁ ୨୯.୭୯ କୋଟି ଏବଂ ୱାଇଏସଆର କଂଗ୍ରେସକୁ ୨୦ କୋଟି ଟଙ୍କା ଅନୁଦାନ ଆକାରରେ ମିଳିଛି । ତେବେ ଆଞ୍ଚଳିକ ଦଳ ହେଲେ ବି ଦଳକୁ ମିଳିଥିବା ଅନୁଦାନ ଅର୍ଥ ନେଇ କୌଣସି ତଥ୍ୟ ଦେଇନି ବିଜେଡି । ଏଡିଆର ରିପୋର୍ଟ ଅନୁଯାୟୀ ବିଜେଡିକୁ ୨୦୨୧-୨୨ ବର୍ଷରେ କୌଣସି ବି ଚାନ୍ଦା ମିଳିନି ।
ତେବେ ଏଡ଼ିଆର ରିପୋର୍ଟରେ ବିଜେଡିର ଏହି ତଥ୍ୟ ଆସିବା ପରେ ଶାସକ ଓ ବିରୋଧୀଙ୍କ ଭିତରେ ଜୋର ଧରିଛି ଆରୋପ ପ୍ରତ୍ୟାରୋପ । ବିଜେପି ବିଧାୟକ ବୁଧାନ ମୁର୍ମୁ ଅଭିଯୋଗ କରିଛନ୍ତି ଯେ, ବିଜେଡି ପାଖରେ ବହୁତ ଟଙ୍କା ଅଛି । ଯେହେତୁ ପ୍ରକୃତ ଉତ୍ସରୁ ଏହି ଟଙ୍କା ଆସିନି ଆଉ ଏହା ଠିକ୍ ଅର୍ଥ ନୁହେଁ ସେଥିପାଇଁ ବିଜେଡି କେତେ ଟଙ୍କା ଚାନ୍ଦା ପାଇଛି ତାକୁ ଲୁଚାଉଛି । ସେହିପରି କଂଗ୍ରେସ କହିଛି ବିଜେଡି ପାଇଥିବା ଚାନ୍ଦାର ତଥ୍ୟ ନ ଦର୍ଶେଇବା ଅର୍ଥ ତାହା କଳା ଧନ । ସେପଟେ ବିଜେଡି ଏହାର ଜବାବରେ ରଖିଛି । ବିରୋଧୀ ଚିରାଚରିତ ଭାବେ ଏମିତି ଅଭିଯୋଗ ଆଣିଛନ୍ତି, ଏହା କିଛି ନୂଆ ନୁହେଁ । ଏବେ ଯଦି ତଥ୍ୟ ଦିଆ ହୋଇନି ତେବେ ଆଗକୁ ଦିଆଯିବ ବୋଲି କହିଛନ୍ତି ବିଜେଡି ବିଧାୟକ ପର୍ଶୁରାମ ଧଡା ।