ଇଡିରେ ହାଜର ହେଲେ ଅର୍ଚ୍ଚନାଙ୍କ ଆର୍କିଟେକ୍ଟ । ପଚରାଉଚରାରେ ରଞ୍ଜିତଙ୍କଠୁ ମିଳିପାରେ କିଛି ଗୁରୁତ୍ୱପୂର୍ଣ୍ଣ ତଥ୍ୟ
କନକ ବ୍ୟୁରୋ : ଇଡିରେ ହାଜର ହେଲେ ଅର୍ଚ୍ଚନାଙ୍କ ଆର୍କିଟେକ୍ଟ ରଞ୍ଜିତ ବେହେରା । ଅର୍ଚ୍ଚନାଙ୍କ ଘର ଇଂଟେରିଅର ଡିଜାଇନ୍ କରିଥିଲେ ରଞ୍ଜିତ ବେହେରା । ବିଳାସମୟ ଘର ପାଇଁ ବିପୁଳ ଟଙ୍କା ଖର୍ଚ୍ଚ ହୋଇଛି । ସେନେଇ ରଞ୍ଜିତଙ୍କୁ ପଚରାଉଚରା କରିପାରେ ଇଡି । ଏପଟେ ଆଜି ରିମାଣ୍ଡରେ ଯିବେ ବ୍ଲାକମେଲ କୁଇନ୍ ଅର୍ଚ୍ଚନା ନାଗ । ପ୍ରବର୍ତନ ନିର୍ଦ୍ଦେଶାଳୟ ୭ ଦିନିଆ ରିମାଣ୍ଡରେ ନେଇ ପଚରା- ଉଚରା କରିବ । ଗତକାଲି କୋର୍ଟ ୭ ଦିନିଆ ରିମାଣ୍ଡ ପାଇଁ ଇଡିକୁ ଦେଇଛନ୍ତି ଅନୁମତି । ହନିଟ୍ରାପ, ବ୍ଲାକମେଲିଂ, ଅନୈତିକ ଆର୍ଥିକ କାରବାରର ଉତ୍ସ ଖୋଜୁଛି ଇଡି ।
Kanak News is now on WhatsApp
Join and get latest news updates delivered to you via WhatsApp
ପୂର୍ବରୁ ଅନେକ ବ୍ୟକ୍ତି ଏହି ମାମଲାରେ ଇଡି ଅଧିକାରୀଙ୍କ ଜେରାକୁ ସାମ୍ନା କରିଛନ୍ତି । ହେଲେ ଅର୍ଚ୍ଚନାଙ୍କ ମାମଲା ସାମ୍ନାକୁ ଆସିବା ପରେ ଯେଉଁ ଚର୍ଚ୍ଚା ହେଉଥିଲା ଯେ ଏଥିରେ ଅନେକ ବଡ ବଡିଆ ସାମିଲ ଅଛନ୍ତି । କିନ୍ତୁ ଏଯାଏ ସେଭଳି କୌଣସି ବଡ ଚେହେରା ଇଡିରେ ହାଜର ହୋଇ ନାହାନ୍ତି । ଏବେ ଅର୍ଚ୍ଚନାଙ୍କୁ ଜେରା କରିବାକୁ ଯାଉଛି ଇଡିର ତଦନ୍ତ ଅଧିକାରୀ ଟିମ୍ । ତେଣୁ ନୂଆ ନାଁ ଏବେ ସାମ୍ନାକୁ ଆସିପାରେ । କାରଣ ଗତକାଲି ସେ ତଥାକଥିତ ପୀଡିତଙ୍କ କଥା ଉଠାଇଥିଲେ ମିଡିଆ ସାମ୍ନାରେ ।
ସେପଟେ ସୋମବାର କୋର୍ଟରେ ହାଜର ହେବା ବେଳେ ଅର୍ଚ୍ଚନା ଗଣମାଧ୍ୟମକୁ ଦେଇଥିବା ବୟାନ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । ଯାହା କମିଶନରେଟ ପୋଲିସକୁ ବିବାଦ ଘେରକୁ ଟାଣିଛି । ଆଉ ଏହି ମାମଲାରେ ଆରମ୍ଭରୁ କମିଶନରେଟ ପୋଲିସର ଭୂମିକା ମଧ୍ୟ ପ୍ରଶ୍ନ ଘେରରେ ରହିିଛି । ଅର୍ଚ୍ଚନା କହିଛନ୍ତି, ତାଙ୍କୁ ପ୍ରଥମେ ୬୦ ଘଂଟା କାଳ ବାଲିଅନ୍ତା ପୋଲିସ ନଜରବନ୍ଦୀ କରାଯାଇଥିଲା । କୋର୍ଟ ଚାଲାଣ ବେଳେ ପୁଲିସ କାହିଁକି ତାଙ୍କ ହାତ ଓ ମୁହଁକୁ ଚାପିଧରିଥିଲା ତାହା ଏବେ ପ୍ରଶ୍ନ ଘେରରେ । ଯାହା ସବୁ ଘଟୁଛି ତାହା ପୂର୍ବ ଯୋଜନା ମୁତାବିକ ବୋଲି ଅର୍ଚ୍ଚନା କହିଛନ୍ତି । ଆଉ ତାଙ୍କ ବିରୋଧରେ ଏକପାଖିଆ ଖବର ପ୍ରସାରଣ ହେଉଛି ବୋଲି ସେ କହିଛନ୍ତି । ତେବେ ଅର୍ଚ୍ଚନାଙ୍କ ବୟାନକୁ ଡିସିପି ଖାରଜ କରିିଥିବା ସୂଚନା ରହିଛି ।