ପ୍ରଫେସରଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗ: ସାମନାକୁ ଆସି କାର୍ଯ୍ୟାନୁଷ୍ଠାନ ଦାବି କଲେ ପୀଡିତା ଛାତ୍ରୀ
କନକ ବ୍ୟୁରୋ: ରାଗିଂ ଅଭିଯୋଗକୁ ନେଇ ବିଜେବି କଲେଜ ଉଠୁଥିବା ପଡୁଥିବାବେଳେ, ବ୍ରହ୍ମପୁର ବିଶ୍ୱବିଦ୍ୟାଳୟରେ ପ୍ରଫେସରଙ୍କ ବିରୋଧରେ ଆସିଛି ଯୌନ ଶୋଷଣ ଅଭିଯୋଗ । ଜଣେ ଛାତ୍ରୀଙ୍କ ନିଜ କ୍ୱାର୍ଟରକୁ ଡାକି ଓଡିଆ ବିଭାଗର ପ୍ରଫେସର ସଦାନନ୍ଦ ନାୟକ ଯୌନ ଶୋଷଣ କରିଥିବା ଅଭିଯୋଗ ଉଗ୍ର ରୂପ ନେଇଛି । ଏନେଇ ନିଜେ ଛାତ୍ରୀ ଜଣଙ୍କ ସାମନାକୁ ଆସି ବୟାନ ଦେବା ସହ ଅଭିଯୁକ୍ତ ପ୍ରଫେସରଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅଭିଯୋଗ ଅନୁସାରେ କିଛି ଦିନ ତଳେ ପ୍ରଫେସର ଜଣଙ୍କ ଏହି ଛାତ୍ରୀଙ୍କୁ ରୁମକୁ ଡାକି ଅସଦାଚରଣ କରିଥିଲେ ।ଏନେଇ ତାଙ୍କ ବନ୍ଧୁମାନେ ଜାଣିବା ପରେ ପ୍ରଫେସରଙ୍କୁ ମାଡ ମାରିଥିଲେ । ଆଉ ମାଡ ଖାଇବା ପରେ ଫ୍ରଫେସର ଥାନାରେ ଅଭିଯୋଗ କରିଥିଲେ । ଛାତ୍ରୀ ଜଣଙ୍କ ପ୍ରଫେସରଙ୍କ ବିରୋଧରେ ବି ଅଭିଯୋଗ କରିଥିଲେ । କିନ୍ତୁ ପ୍ରଫେସରଙ୍କ ଅଭିଯୋଗକୁ ଆଧାର କରି ଦୁଇ ଛାତ୍ରଙ୍କୁ ପୁଲିସ ଗିରଫ କରି ଜେଲ ପଠାଇ ଦେଇଥିଲା । ହେଲେ ପ୍ରଫେସରଙ୍କୁ ଜାମିନ ମିଳିଯାଇଥିଲା । ଯାହାକୁ ନେଇ ଅସନ୍ତୋଷ ତେଜିବାରେ ଲାଗିଛି ।
ଏସବୁ ଭିତରେ ପ୍ରଫେସରଙ୍କୁ ମାଡ ମାରିଥିବା ଛାତ୍ରଙ୍କ ବିରୋଧରେ ଶୃଂଖଳାଗତ କାର୍ଯ୍ୟାନୁଷ୍ଠାନ ନେଇଛି ବିଶ୍ୱବିଦ୍ୟାଳୟ ଶାନ୍ତି କମିଟି । ସେମାନଙ୍କୁ ଚତୁର୍ଥ ସେମିଷ୍ଟାର ପରୀକ୍ଷା ଦେବାକୁ ଅନୁମତି ଦିଆଯାଇ ନାହିଁ । ଯାହାକୁ ନେଇ ଛାତ୍ରଛାତ୍ରୀମାନେ ତାତି ଉଠିଛନ୍ତି । ପିଜି କାଉଁସିଲ ଫାଟକ ସମୁଖରେ ଧାରଣାରେ ବସିବା ସହ ବିକ୍ଷୋଭ ପ୍ରଦର୍ଶନ କରିଛନ୍ତି । ଅଭିଯୁକ୍ତ ପ୍ରଫେସରଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ସହ ଛାତ୍ରମାନଙ୍କୁ ପରୀକ୍ଷା ଦେବାକୁ ଅନୁମତି ଦେବାକୁ ଦାବି କରିଛନ୍ତି । ବିଶ୍ୱବିଦ୍ୟାଳୟ କର୍ତୁପକ୍ଷ କହିଛନ୍ତି ଛାତ୍ରୀ ଜଣଙ୍କ ଆଣିଥିବା ଅଭିଯୋଗର ଅନୁଧ୍ୟାନ କରାଯାଉଛି । ବ୍ରହ୍ମପୁରର ବିଶ୍ୱବିଦ୍ୟାଳୟର ପ୍ରଫେସରଙ୍କ ବିରୋଧରେ ଛାତ୍ରୀ ଅଭିଯୋଗ ସତ ହୋଇଥିଲେ ସାଂଘାତିକ ।