ବଦଳିଲା ସ୍ୱାଧୀନତା ଦିବସ ସମାରୋହ ସ୍ଥାନ : ଲୋୟର ପିଏମଜି ବଦଳରେ ୟୁନିଟ-୩ ପ୍ରଦଶର୍ନୀ ପଡିଆରେ ଚଳିତବର୍ଷର ସ୍ୱାଧୀନତା ଦିବସ
କନକ ବ୍ୟୁରୋ : ଚଳିତ ଥର ବଦଳିବ ରାଜ୍ୟସ୍ତରୀୟ ସ୍ୱାଧୀନତା ଦିବସ ସମାରୋହ ସ୍ଥାନ । ରାଜ୍ୟସ୍ତରୀୟ ୭୫ ତମ ସ୍ୱାଧୀନତା ଦିବସ ସମାରୋହ ଭୁବନେଶ୍ୱରର ୟୁନିଟ୩ ପ୍ରଦର୍ଶନୀ ପଡ଼ିଆରେ ଆୟୋଜିତ ହେବ । ଏଥିରେ ମୁଖ୍ୟ ଅତିଥି ଭାବେ ଯୋଗଦାନ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କରୋନା କାଳରେ କିପରି ସ୍ୱାଧୀନତା ଦିବସ ସମାରୋହ କରାଯିବ, ଏ ନେଇ ପ୍ରସ୍ତୁତି ବୈଠକ ହୋଇଛି । ସୂଚନା ଓ ପ୍ରସାରଣ ବିଭାଗର ସଚିବ ବିଷ୍ଣୁପଦ ସେଠୀଙ୍କ ଏଥିରେ ଅଧ୍ୟକ୍ଷତାରେ କରିଥିଲେ । ପୂର୍ବରୁ ଲୋୟର ପିଏମଜିରେ ଏହି ସମାରୋହ ଆୟୋଜିତ ହେଉଥିଲା ।
Kanak News is now on WhatsApp
Join and get latest news updates delivered to you via WhatsApp
ଏଥିରେ ନିଷ୍ପତ୍ତି ହୋଇଛି ଯେ, କୋଭିଡ୍ ମାର୍ଗଦର୍ଶିକାର ଠିକ୍ ଅନୁପାଳନ କରାଯାଇ ସ୍ବଳ୍ପ ସଂଖ୍ୟକ ଅତିଥି, କୋଭିଡ୍ ଯୋଦ୍ଧା, ଅଧିକାରୀ ଏବଂ କର୍ମଚାରୀଙ୍କୁ ନେଇ ସ୍ବାଧୀନତା ଦିବସ ଆୟୋଜନ ହେବ । ଗୃହ ବିଭାଗ ଦ୍ବାରା ଚିହ୍ନଟ ୟୁନିଟ-୩ସ୍ଥିତ ପ୍ରଦର୍ଶନୀ ପଡ଼ିଆ ଠାରେ ଆନୁଷଙ୍ଗିକ ବ୍ୟବସ୍ଥା ଗ୍ରହଣ, ସକାଳେ ସୂଚନା ଓ ଲୋକସମ୍ପର୍କ ବିଭାଗ ଦ୍ବାରା ଡାକବାଜି ଯନ୍ତ୍ର ଦ୍ବାରା ରାମଧୁନ୍ ପରିବେଷଣ, ଟିଭି ଓ ସାମାଜିକ ଗଣମାଧ୍ୟମ ଯୋଗେ ସିଧା ପ୍ରସାରଣ, ଗଣମାଧ୍ୟମକୁ ସୂଚନା ପ୍ରଦାନ, ଉତ୍ସବସ୍ଥଳର ସାଜସଜ୍ଜା, ନିମନ୍ତ୍ରିତ ଅତିଥି ଓ କୋଭିଡ ଯୋଦ୍ଧାଙ୍କ ଉପବେଶନ ବ୍ୟବସ୍ଥା ନେଇ ବୈଠକରେ ବିସ୍ତୃତ ଆଲୋଚନା ହୋଇଥିଲା ।
ଏଥିରେ ନିଷ୍ପତ୍ତି ହୋଇଛି ଯେ, ସ୍ବାଧୀନତା ଦିବସ ଅବସରରେ କେନ୍ଦ୍ର ଓ ରାଜ୍ୟ ସରକାରଙ୍କ ବିଭିନ୍ନ କୋଠା, ସରକାରୀ ଉଦ୍ୟୋଗ ଓ ପ୍ରମୁଖ କୋଠାର ଆଲୋକୀକରଣ ହେବ । ବିଏମ୍ସି ପକ୍ଷରୁ ଉତ୍ସବ ସ୍ଥଳରେ ବିଶୋଧନ କରାଯିବ ଏବଂ ପିଇବା ପାଣି ଯୋଗାଯିବ । ସୁରକ୍ଷା ବ୍ୟବସ୍ଥା ଓ ଟ୍ରାଫିକ ନିୟନ୍ତ୍ରଣକୁ ଡିସିପି, ଭୁବନେଶ୍ବର ପରିଚାଳନା କରିବେ । ପୂର୍ବ ବର୍ଷ ପରି ଏଥର ବି ନୂଆଦିଲ୍ଲୀ, କୋଲକାତା, ଚେନ୍ନାଇ, ମୁମ୍ବାଇରେ ସୂଚନା ଓ ଲୋକସମ୍ପର୍କ ବିଭାଗ ପକ୍ଷରୁ ସ୍ବାଧୀନତା ଦିବସ ପାଳନ ହେବ । ସେହିପରି ଆର୍ଡିସି ଜୋନ୍, ଜିଲ୍ଲା ଏବଂ ଉପଖଣ୍ଡସ୍ତରରେ କୋଭିଡ୍ ନିୟମାବଳି ମଧ୍ୟରେ ସ୍ବାଧୀନତା ଦିବସ ପାଳନ କରାଯିବ ।