କିଏ ଏହି ସନ୍ଧ୍ୟା ଦେବନାଥନ ? ଯାହାଙ୍କୁ ମିଳିଲା ଫେସବୁକ ଇଣ୍ଡିଆର ମୁଖ୍ୟପଦ
କନକ ବ୍ୟୁରୋ : ଫେସବୁକର ପ୍ୟାରେଣ୍ଟ କମ୍ପାନୀ ମେଟା ତରଫରୁ ସନ୍ଧ୍ୟା ଦେବନାଥନଙ୍କୁ ଇଣ୍ଡିଆର ଉପ ସଭାପତି ଭାବେ ନିଯୁକ୍ତି ଦିଆଯାଇଛି । ଏନେଇ ଗୁରୁବାର ଦିନ କମ୍ପାନୀ ତରଫରୁ ସୂଚନା ଦିଆଯାଇଥିଲା । ମେଟା ପାଖରେ ଫେସବୁକ୍, ଇନଷ୍ଟାଗ୍ରାମ ଓ ହ୍ୱାଟସପ୍ ଭଳି ସୋସିଆଲ ମିଡିଆ ପ୍ଲାଟଫର୍ମ ରହିଛି । ଚଳିତମାସ ପ୍ରାରମ୍ଭରେ ଅଜିତ ମୋହନ ଏହି ପଦରୁ ଇସ୍ତଫା ଦେଇଥିବାରୁ ସନ୍ଧ୍ୟାଙ୍କୁ ତାଙ୍କ ସ୍ଥାନରେ ନିଯୁକ୍ତି ଦିଆଯାଇଛି । ମେଟା ତରଫରୁ ଦିଆଯାଇଥିବା ବୟାନରେ କୁହାଯାଇଛି କି ଫେସବୁକ୍ ଇଣ୍ଡିଆର ଉପ ସଭାପତି ଭାବେ ସନ୍ଧ୍ୟା ଦେବନାଥନ୍ ଜାନୁଆରୀ ପହିଲାରୁ କାର୍ଯ୍ୟ ଆରମ୍ଭ କରିବେ । ଏବେ ସନ୍ଧ୍ୟା ସିଙ୍ଗାପୁରରେ ଫେସବୁକ୍ ପାଇଁ କାମ କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମେଟାର ମୁଖ୍ୟ ବ୍ୟବସାୟୀକ ଅଧିକାରୀ ମାର୍ନେ ଲେର୍ବିନ ତାଙ୍କ ବୟାନରେ କହିଛନ୍ତି ସନ୍ଧ୍ୟାଙ୍କ ପାଖରେ ବ୍ୟବସାୟ ବୃଦ୍ଧି କରିବା ଓ ଟିମ୍ ପରିଚାଳନା କରିବାର ଅନୁଭବ ରହିଛି । ଏବେ ଆସନ୍ତୁ ଜାଣିବା ଏହି ସନ୍ଧ୍ୟା ଦେବନାଥନଙ୍କ ବାବଦରେ ।
ସନ୍ଧ୍ୟା ଦେବନାଥନ୍ ୨୦୧୬ ରେ ମେଟାରେ ନିଯୁକ୍ତି ପାଇଥିଲେ । ସେ ସିଙ୍ଗାପୁର ଓ ଭିଏତନାମରେ ମେଟାର ବ୍ୟବସାୟ ସମ୍ଭାଳିବା ସହ ଦକ୍ଷିଣ-ପୂର୍ବ ଏସିଆରେ ମେଟାର ଇ-କମର୍ସକୁ ଆଗକୁ ବଢାଇବାରେ ସହଯୋଗ କରିଥିଲେ । ସନ୍ଧ୍ୟାଙ୍କ ପାଖରେ ଏନେଇ ୨୨ ବର୍ଷର ଅଭିଜ୍ଞତା ରହିଛି । ସେ ବ୍ୟାଙ୍କିଙ୍ଗ, କମର୍ସ ଓ ଟେକ୍ନୋଲୋଜୀ ଭଳି ସେକ୍ଟରରେ କାମ କରିଛନ୍ତି ।
ସେପଟେ ଯଦି ଆମେ ସନ୍ଧ୍ୟା ଦେବନାଥନଙ୍କ ଶିକ୍ଷା କଥା କହିବା ତେବେ ସେ ୧୯୯୮ ମସିହାରେ ଆନ୍ଧ୍ର ୟୁନିଭରସିଟି କଲେଜରୁ କେମିକାଲ ଇଂଜିନିୟରିଂରେ ବିଟେକ୍ ସମାପ୍ତ କରିଥିଲେ । ଏହାପରେ ସେ ସିଏଟି ପରୀକ୍ଷାରେ କୃତକାର୍ଯ୍ୟ ହୋଇ ଦିଲ୍ଲୀ ୟୁନିଭରସିଟିରେ ଫ୍ୟାକୁଏଲ୍ଟି ଅଫ ମ୍ୟାନେଜମେ ଷ୍ଟଡିଜରେ ଏମବିଏ ଡିଗ୍ରୀ ହାସଲ କରିଥିଲେ । ଏହାପରେ ସେ ଅକ୍ସଫୋର୍ଡ ୟୁନିଭରସିଟିରୁ ଲିଡରସିପ୍ ଷ୍ଟଡିଜ ସମାପ୍ତ କରିଥିଲେ ।