ଜ୍ଞାନବାପୀ ମସଜିଦ୍ ବିବାଦ: ସୁପ୍ରିମକୋର୍ଟରେ ଦାୟର ହେଲା ଆଉ ଏକ ଯାଚିକା । ପଢନ୍ତୁ, କଣ କରାଯାଇଛି ଦାବି…
କନକ ବ୍ୟୁରୋ: କାଶୀ ବିଶ୍ୱନାଥ ମନ୍ଦିର ଓ ଜ୍ଞାନବାପୀ ମସଜିଦ୍ ବିବାଦ ମାମଲାରେ ସୁପ୍ରିମକୋର୍ଟରେ ଦାଖଲ ହୋଇଛି ଆଉ ଏକ ଯାଚିକା । ଅଶ୍ୱିନୀ ଉପାଧ୍ୟାୟ ଏହି ଯାଚିକା ଦାୟର କରିବା ସହିତ ତାଙ୍କ ପକ୍ଷର କଥା ମଧ୍ୟ ଶୁଣିବାକୁ ଦାବି କରିଛନ୍ତି । ସେ କହିଛନ୍ତି ଯେ, ଏହି ମାମଲା ସିଧା ତାଙ୍କ ଧାର୍ମିକ ସ୍ୱତନ୍ତ୍ର ଅଧିକାର ସହ ଜଡିତ । ବହୁ ବର୍ଷ ଧରି ସେଠାରେ ଭଗବାନ ଆଦି ବିଶ୍ୱେଶ୍ୱରଙ୍କ ପୂଜା ହୋଇ ଆସୁଛି । ତେଣୁ ଏହି ସମ୍ପତ୍ତି ତାଙ୍କର ଅଟେ । କୌଣସି ବି ପରିସ୍ଥିତିରେ ଏହି ସମ୍ପତ୍ତିର ଅଧିକାର ଛଡାଇ ନିଆଯାଇପାରିବ ନାହିଁ ବୋଲି ସେ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ସେ ଆହୁରି ମଧ୍ୟ କହିଛନ୍ତି ଯେ, ଥରେ ପ୍ରାଣ ପ୍ରତିଷ୍ଠା ହୋଇଯିବା ପରେ ଏବଂ ମନ୍ଦିରର କିଛି ଅଂଶକୁ ଧ୍ୱଂସ କରିବା ପରେ ମଧ୍ୟ ମନ୍ଦିରର ଧାର୍ମିକ ସ୍ୱରୂପ ପରିବର୍ତ୍ତନ ହୁଏ ନାହିଁ ବୋଲି ସେ କହିଛନ୍ତି । ସେ ଦାୟର କରିଥିବା ମାମଲାରେ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ, ଇସଲାମିକ୍ ସିଦ୍ଧାନ୍ତ ମୁତାବକ ମନ୍ଦିରକୁ ଭାଙ୍ଗି ଯେଉଁ ସବୁ ମସଜିଦ୍ ନିର୍ମାଣ କରାଯାଇଛି, ତାହା ବୈଧ ମସଜିଦ୍ ନୁହେଁ । ୧୯୯୧ ପ୍ଲେସସ୍ ଅଫ୍ ୱରସିପ୍ ଆକ୍ଟ ଅନୁସାରେ କୌଣସି ଧାର୍ମିକ ସ୍ଥଳର ସ୍ୱରୂପ ନିର୍ଦ୍ଧାରଣ କରିବାକୁ ରୋକାଯାଇପାରିବ ନାହିଁ । ତା ସହିତ ମସିଜିଦ୍ କମିଟିର ଯାଚିକାକୁ ଖାରଜ କରିବାକୁ ସେ ଅନୁରୋଧ କରିଛନ୍ତି ।
ସୂଚନାଯୋଗ୍ୟ ଯେ, ସୁପ୍ରିମକୋର୍ଟଙ୍କ ଆଦେଶ ପରେ ଆଜି ପ୍ରଥମ ଥର ପାଇଁ ଏହି ମାମଲାର ଶୁଣାଣି ଜିଲ୍ଲା ଜଜ୍ ଡକ୍ଟର ଅଜୟ କୃଷ୍ଣଙ୍କ ଅଦାଲତରେ ହେବାକୁ ଯାଉଛି । ସୁପ୍ରିମକୋର୍ଟଙ୍କ ଆଦେଶ ମୁତାବକ,ମୋକଦ୍ଦମା ସହ ଜଡିତ ପ୍ରତିଟି ଦଲିଲ୍ ଜିଲ୍ଲା ଜଜଙ୍କ ଅଦାଲତରେ ପହଞ୍ଚି ସାରିଛି ।