ସାମ୍ନାକୁ ଆସିଲା ମଙ୍ଗଳ ଗ୍ରହର ନୂଆ ନକ୍ସା । ପାହାଡ, ପର୍ବତ ସହ ଦିଶୁଛି ଆଗ୍ନେୟଗିରି । ଜାଣନ୍ତୁ, କିଏ ପ୍ରସ୍ତୁତ କରିଛି ମଙ୍ଗଳ ଗ୍ରହର ଏହି ନକ୍ସା ।
କନକ ବ୍ୟୁରୋ: ସାମ୍ନାକୁ ଆସିଲା ମଙ୍ଗଳ ଗ୍ରହର ନକ୍ସା । ଏହି ନୂଆ ନକ୍ସାରେ ମଙ୍ଗଳ ଗ୍ରହର ସମସ୍ତ ଅଞ୍ଚଳ ସ୍ପଷ୍ଟ ଭାବେ ଦେଖାଯାଉଥିବା ଦେଖିବାକୁ ମିଳିଛି । ତେବେ ମଙ୍ଗଳ ଗ୍ରହର ଏହି ନୂଆ ନକ୍ସାକୁ ପ୍ରସ୍ତୁତ କରିଛି ସଂଯୁକ୍ତ ଅରବ ଏମିରେଟସ (ୟୁଏଇ)ର ମାର୍ସ ଅର୍ବିଟର, ଅର୍ଥାତ ହୋପ ମିଶନର ସ୍ପେଶକ୍ରାଫ୍ଟ । କୁହାଯାଉଛି, ଏହି ହାଇ ରିଜୋଲ୍ୟୁସନ୍ ମ୍ୟାପ ମିଳିବା ଦ୍ୱାରା ବୈଜ୍ଞାନିକମାନେ ଅନେକ ପ୍ରକାର ଜ୍ଞାନ ଆହରଣ କରିପାରିବେ । ତା ସହିତ ମଙ୍ଗଳ ଗ୍ରହ ବିଷୟରେ ଅଧ୍ୟୟନ କରିପାରିବେ ।
Kanak News is now on WhatsApp
Join and get latest news updates delivered to you via WhatsApp
ମଙ୍ଗଳ ଗ୍ରହର ଏହି ନୂଆ ନକ୍ସାରେ, ମଙ୍ଗଳର କେଉଁ ସ୍ଥାନରେ ପାଣି ଥିଲା, କିମ୍ବା ଏବେ ପାଣି ଅଛି ତାହା ସ୍ପଷ୍ଟ ଭାବେ ଜଣାପଡିବ । ଏହି ନୂଆ ନକ୍ସାକୁ ୟୁଏଇର ସେଣ୍ଟର ଫର୍ ସ୍ପେଶ୍ ସାଇନ୍ସ ଓ ନ୍ୟୁୟର୍କ ୟୁନିଭର୍ସିଟି ଆବୁଧାବି ମିଶି ପ୍ରସ୍ତୁତ କରିଛନ୍ତି । ତେବେ ଏହି ନକ୍ସା ପାଇଁ ହିଁ ୟୁଏଇ ମାର୍ସ ମିଶନ ଡାଟା ପଠାଇଥିଲା ।
ୟୁଏଇର ହୋମ୍ ମିଶନରେ ଷ୍ଟେଟ୍-ଅଫ୍-ଦ-ଆର୍ଟ ଇମର୍ଜିଙ୍ଗ୍ ସିଷ୍ଟମ ରହିଛି । ଏଥିରେ ଏମିରେଟସ୍ ଏକ୍ସପ୍ଲୋରେଶନ୍ ଇମେଜର ଲାଗିଛି । ସଂଯୁକ୍ତ ଆରବ ଏମିରେଟସ୍ ବୈଜ୍ଞାନିକଙ୍କ କହିବା କଥା, ଏହି ନକ୍ସା ଫଳରେ ଯୁବକମାନେ ବିଜ୍ଞାନ କ୍ଷେତ୍ରରେ ଆଗକୁ ବଢିପାରିବେ । ଏହି ନକ୍ସାକୁ ପ୍ରସ୍ତୁତ କରିଥିବା ବୈଜ୍ଞାନିକ ଡିମିତ୍ରା ଅତ୍ରିଙ୍କ କହିବା କଥା, ଏହି ନକ୍ସାକୁ ପ୍ରସ୍ତୁତ କରି ଆମେ ସାରା ବିଶ୍ୱକୁ ଏହାକୁ ଦେଖାଇବାକୁ ଚାହିଁଥିଲୁ । ଏହା ହେଉଛି ମଙ୍ଗଳ ଗ୍ରହର ନୂଆ ଆଟଲାସ୍ , ଯାହାକି ପ୍ରତିଟି ଦେଶର କାମରେ ଆସିବ ।
ଡିମିତ୍ରା ଅତ୍ରୀ ଆହୁରି ମଧ୍ୟ କହିଛନ୍ତି ଯେ, ଏହି ନୂଆ ନକ୍ସାରୁ ବୈଜ୍ଞାନିକମାନେ ଅନେକ କିଛି ଶିଖିବାକୁ ପାଇବେ । ତାଙ୍କ ଟିମ୍ ପାଖାପାଖି ୩ ହଜାର ଫଟୋକୁ ମିଶାଇ ଏହି ନକ୍ସା ପ୍ରସ୍ତୁତ କରିଛି । ଏହି ସମସ୍ତ ଫଟୋକୁ ବିଶ୍ଲେଷଣ କରିବାକୁ ପାଖାପାଖି ୨ ବର୍ଷ ସମୟ ଲାଗିଥିଲା । ଯାହାକି ମଙ୍ଗଳ ଗ୍ରହର ଗୋଟିଏ ବର୍ଷ ସହିତ ସମାନ । ଏହି ନୂଆ ନକ୍ସାରେ ମଙ୍ଗଳ ଗ୍ରହର ବରଫ ସ୍ଥାନ, ପାହାଡ, ଆଗ୍ନେୟଗିରି, ପ୍ରାଚୀନ ନଦୀ, ହ୍ରଦ ଆଦି ଦେଖିବାକୁ ମିଳୁଛି । କୁହାଯାଉଛି, ପ୍ରାୟ ୩୫୦ କୋଟି ବର୍ଷ ପୂର୍ବରୁ ମଙ୍ଗଳ ଗ୍ରହରେ ନଦୀ ରହିଥିଲା ।
ଏହି ନକ୍ସା ଫଳରେ ବୈଜ୍ଞାନିକମାନେ ମଙ୍ଗଳଗ୍ରହର ପୂର୍ବ ଜଳବାୟୁ ବିଷୟରେ ବି ଜାଣିପାରିବେ । କୋଟି କୋଟି ବର୍ଷ ତଳେ ମଙ୍ଗଳ ଗ୍ରହର ଜଳବାୟୁ କିପରି ଥିଲା, ତାହା ଏଥିରୁ ଜାଣିହେବ ବୋଲି କୁହାଯାଉଛି । ଏହି ନକ୍ସାରେ ମଙ୍ଗଳ ଗ୍ରହର ପାଣିପାଗ କେଉଁଠି କେମିତି ରହିଛି , ତାହା ଜାଣିହେବ । ତା ସହିତ ମଙ୍ଗଳ ଗ୍ରହରେ କେତେଥର ଉଲକାପିଣ୍ଡ ମାଡ ହେଇଛି ତାହା ମଧ୍ୟ ଜାଣିହେବ ବୋଲି ଏହି ନକ୍ସାକୁ ପ୍ରସ୍ତୁତ କରିଥିବା ବୈଜ୍ଞାନିକ ସୂଚନା ଦେଇଛନ୍ତି ।