ପରାଜୟ ପରେ କଙ୍ଗାରୁ ଦଳର ଅଧିନାୟକଙ୍କ ବଡ ବୟାନ ! କହିଲେ କୋହଲି ଓ ପୂଜାରାଙ୍କୁ ଦଳରୁ ବାଦ୍ ଦିଅ, ତମ ଅବସ୍ଥା ବି ଆମ ଭଳି ହେବ ।
ମେଲବୋର୍ଣ୍ଣରେ ଖେଳାଯାଇଥିବା ତୃତୀୟ ଟେଷ୍ଟରେ ଭାରତ ଠାରୁ ୧୩୭ ରନରେ ପରାଜୟ ହେବା ପରେ, ହାରିବାର କିଛି ଏଭଳି କାରଣ ରଖିଛନ୍ତି ଅଷ୍ଟ୍ରେଲିଆ କ୍ରିକେଟ୍ ଟିମର ଅଧିନାୟକ ଟିମ୍ ପେନ୍ । ସେ ସ୍ୱୀକାର କରିଛନ୍ତି ଯେ, ଅଷ୍ଟ୍ରେଲିଆ ଦଳର ଦୁଇ ତାରକା ଖେଳାଳୀ ଷ୍ଟିଭ୍ ସ୍ମିଥ୍ ଏବଂ ଡେଭିଡ୍ ୱାର୍ନର ଦଳ ପାଇଁ ନଖେଳିବା ଏହି ପରାଜୟର ବଡ କାରଣ ଅଟେ । ସେ କହିଛନ୍ତି, ସ୍ମିଥ ଏବଂ ୱାର୍ନରଙ୍କ ବିନା ଭାରତର ଟପ୍ କ୍ଲାସ ବୋଲିଂ ଆକ୍ରମଣକୁ ସାମ୍ନା କରିବାରେ ଅଷ୍ଟ୍ରେଲିଆ ସମ୍ପୂର୍ଣ୍ଣ ବିଫଳ ହୋଇଛି । ତୃତୀୟ ଟେଷ୍ଟରେ ଭାରତ ଅଷ୍ଟ୍ରେଲିଆକୁ ୧୩୭ ରନରେ ହରାଇବା ସହ ୪ଟିକିଆ ମ୍ୟାଚ ବିଶିଷ୍ଟ ସିରିଜରେ ୨-୧ରେ ଆଗୁଆ ରହିଛି । ତେବେ ଟେଷ୍ଟ ଇତିହାସରେ ଏହା ଭାରତର ୧୫୦ତମ ବିଜୟ ।
Kanak News is now on WhatsApp
Join and get latest news updates delivered to you via WhatsApp
ତୃତୀୟ ଟେଷ୍ଟରେ ପରାଜୟ ପରେ ସାମ୍ବାଦିକ ସମ୍ମିଳନୀରେ କଙ୍ଗାରୁ ଦଳର ଅଧିନାୟକ ଟିମ୍ ପେନ କହିଛନ୍ତି, ଦଳରେ ଅନୁଭବୀ ଖେଳାଳୀ ବାଦ ପଡିଥିବାରୁ ଅଷ୍ଟ୍ରେଲିଆକୁ ପରାଜୟର ସାମ୍ନା କରିବାକୁ ପଡିଛି । ବିଶେଷ କରି ବଲ ଟାମ୍ପରିଂ ମାମଲାରେ ଛନ୍ଦି ହୋଇ ଦୁଇ ବର୍ଷ ପର୍ଯ୍ୟନ୍ତ କ୍ରିକେଟରୁ ବାସନ୍ଦ ହୋଇଥିବା ଷ୍ଟିଭ୍ ସ୍ମିଥ୍ ଏବଂ ଡେଭିଡ୍ ୱାର୍ନର ମ୍ୟାଚ୍ ନଖେଳିବା ପରାଜୟର ବଡ କାରଣ ଅଟେ ବୋଲି ଟିମ୍ ପେନ୍ କହିଛନ୍ତି । ସେହିପରି କେମରନ୍ ବେନକ୍ରାଫ୍ଟଙ୍କ ଅନୁପସ୍ଥିତତା ମଧ୍ୟ ଦଳ ଉପରେ ପ୍ରଭାବ ପକାଇଛି ।
ତେବେ ସାମ୍ବାଦିକ ସମ୍ମିଳନୀରେ ଭାରତର ବୋଲିଂ ବାହିନୀକୁ ପ୍ରଶଂସା କରିଛନ୍ତି କଙ୍ଗାରୁ ଦଳର ଅଧିନାୟକ । ଏହା ସହ ଅଧିନାୟକ ବିରାଟ କୋହଲି ଏବଂ ଚେତେଶ୍ୱର ପୂଜାରାଙ୍କ ବ୍ୟାଟିଂ ଷ୍ଟାଇଲକୁ ମଧ୍ୟ ସେ ପ୍ରଂଶସା କରିଛନ୍ତି । ପେନ୍ କହିଛନ୍ତି, ଭାରତ ପାଖରେ କୋହଲି ଏବଂ ପୂଜାରାଙ୍କ ଭଳି ବିଶ୍ୱସ୍ତରୀୟ ବ୍ୟାଟ୍ସମ୍ୟାନ ଅଛନ୍ତି, ଯେଉଁମାନେ ଦଳର ସ୍କୋରକୁ ୪୦୦ ଆଗକୁ ନେଇଯାଇଥିଲେ । କିନ୍ତୁ ଅଷ୍ଟ୍ରେଲିଆ ପାଖରେ ଦଳର ପ୍ରାରମ୍ଭିକ ବ୍ୟାଟ୍ସମ୍ୟାନ ନଥିବାରୁ ସେମାନେ ଭାରତୀୟ ବୋଲର ମାନଙ୍କୁ ସାମ୍ନା କରିବାରେ ବିଫଳ ହୋଇଥିଲେ । ତେବେ ସବୁଠାରୁ ବଡ କଥା ହେଉଛି, ଟିମ୍ ପେନ୍ କହିଛନ୍ତି, ଯଦି ଭାରତୀୟ ଦଳରୁ କୋହଲି ଏବଂ ପୂଜାରାଙ୍କୁ ବାଦ୍ ଦିଆଯାଏ, ତେବେ ଟିମ୍ ଇଣ୍ଡିଆର ଅବସ୍ଥା ମଧ୍ୟ ଅଷ୍ଟ୍ରେଲିଆ ଭଳି ହେବ ।