ରାଜ୍ୟରେ ବଢୁଛି ଥଣ୍ଡା,କାଶ, ଜ୍ୱର । ସ୍ଥିତି ଉପରେ ନଜର ରଖିବାକୁ ପରାମର୍ଶ । ଚିଠି ଲେଖି ସତର୍କ କରାଇଲେ ଜନସ୍ୱାସ୍ଥ୍ୟ ନିର୍ଦ୍ଦେଶକ ।
କନକ ବ୍ୟୁରୋ: ରାଜ୍ୟରେ ଥଣ୍ଡା, କାଶ, ଜ୍ୱରରେ ଆକ୍ରାନ୍ତ ରୋଗୀଙ୍କ ସଂଖ୍ୟା ବୃଦ୍ଧି ପାଉଛି । ୫୯ ଜଣ ଏଚ୍୩ଏନ୍୨ ଭୂତାଣୁ ଆକ୍ରାନ୍ତ ଚିହ୍ନଟ ହେବା ପରେ ସ୍ୱାସ୍ଥ୍ୟ ବିଭାଗର ଚିନ୍ତା ବଢ଼ିଯାଇଛି । ଏହି ଭୂତାଣୁରେ ଦେଶରେ ଦୁଇ ଜଣଙ୍କ ମୃତ୍ୟୁ ହେବା ସହ କିଛି ରାଜ୍ୟରେ କରୋନା ମାମଲାରେ ମଧ୍ୟ ବୃଦ୍ଧି ହୋଇଛି । ଏପଟେ ଶ୍ୱାସକ୍ରିୟା ଜନିତ ରୋଗୀଙ୍କ ସଂଖ୍ୟା ବଢୁଥିବାରୁ ହସପିଟାଲ୍ ଗୁଡିକୁ ଚିଠି ଲେଖିଛନ୍ତି ରାଜ୍ୟ ଜନସ୍ୱାସ୍ଥ୍ୟ ନିର୍ଦ୍ଦେଶକ ।
Kanak News is now on WhatsApp
Join and get latest news updates delivered to you via WhatsApp
ସମସ୍ତ ମେଡିକାଲ୍ କଲେଜର ଅଧିକ୍ଷକ, କ୍ୟାପିଟାଲ୍ ହସପିଟାଲ୍ର ନିର୍ଦ୍ଦେଶକ ଏବଂ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀଙ୍କୁ ପରିସ୍ଥିତି ଉପରେ ନଜର ରଖିବାକୁ କୁହାଯାଇଛି । ସଂକ୍ରମଣରେ ବ୍ରେକ ଦେବା ସହ କରୋନାର ଆଉ ଏକ ୱେଭରୁ ବର୍ତିବା ପାଇଁ ପଦକ୍ଷେପ ନେବାକୁ ନିର୍ଦ୍ଦେଶ ଦିଆଯାଇଛି । ଜନସ୍ୱାସ୍ଥ୍ୟ ନିର୍ଦ୍ଦେଶକ, ଦେଇଥିବା ଚିଠିରେ କୁହାଯାଇଛି…
- ଶ୍ୱାସକ୍ରିୟା ଜନିତ ରୋଗୀଙ୍କ ସଂପର୍କରେ ପ୍ରାଥମିକ ସ୍ତରରେ ତଥ୍ୟ ସଂଗ୍ରହ କରାଯାଉ
- ସର୍ଭେଲାନ୍ସ ବଢ଼ାଇବା ସହ ଶ୍ୱାସକ୍ରିୟା ଜନିତ ରୋଗୀଙ୍କ ଉପରେ ସତର୍କ ଦୃଷ୍ଟି ରଖାଯାଉ
- ଆବଶ୍ୟକ ପଡ଼ିଲେ ଆକ୍ରାନ୍ତଙ୍କ ନମୁନା କରୋନା ପରୀକ୍ଷା ପାଇଁ ପଠାଯାଉ
- ଫିଭର କ୍ଲିନିକ ଚାଲୁରଖିବା ସହ କରୋନା ଟେଷ୍ଟ ପାଇଁ ବ୍ୟବସ୍ଥା ରହୁ
- କରୋନା ମାମଲା ବୃଦ୍ଧି ଉପରେ ନଜର ରଖିବା ସହ ଟେଷ୍ଟ, ଟ୍ରାକ୍, ଟ୍ରିଟମେଂଟ, ଟିକାକରଣ ଓ କରୋନା ନିୟମ ପାଳନ ଉପରେ ଗୁରୁତ୍ୱ ଦିଆଯାଉ
- କରୋନା ନେଗେଟିଭ୍ ଥିବା ସତ୍ୱେ ସ୍ୱାସ୍ଥ୍ର୍ୟାବସ୍ଥା ଅଧିକ ବିଗିଡିଲେ ନମୁନା ଭୁବନେଶ୍ୱର ସ୍ଥିତ ଆରଏମଆସିକୁ ପଠାଯାଉ
- ଇନଫ୍ଲୁଏଞ୍ଜା-ଏ ପରୀକ୍ଷା ପାଇଁ ଆରଟିପିସିଆର୍ ଟେଷ୍ଟ କିଟ୍ ମଗାଇବେ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ
- ହାତ ଧୋଇବା ଓ କରୋନା ନିୟମ ପାଳନ ପାଇଁ ଲୋକଙ୍କୁ ସଚେତନ କରାଯାଉ
- ଔଷଧ, ଅକ୍ସିଜେନ୍ ଓ ଅନ୍ୟ ଆବଶ୍ୟକ ସାମଗ୍ରୀର ଷ୍ଟକ୍ ଉପରେ ନିରନ୍ତର ନଜର ରଖିବା ସହ ଆଇସିୟୁ ପ୍ରସ୍ତୁତ ରଖାଯାଉ