ଆକାଂକ୍ଷୀ ଜିଲ୍ଳା ଗସ୍ତରେ କେନ୍ଦ୍ରମନ୍ତ୍ରୀଙ୍କ ସହ ଦଳୀୟ ନେତା । ସରକାରୀ କାର୍ଯ୍ୟକ୍ରମରେ ବିଜେପି ନେତାଙ୍କ ଉପସ୍ଥିତିକୁ ନେଇ ପ୍ରଶ୍ନ ଉଠାଇଲା ବିଜେଡି
କନକ ବ୍ୟୁରୋ: ଆକାଂକ୍ଷୀ ଜିଲ୍ଲାରେ କେନ୍ଦ୍ରୀୟ ଯୋଜନାର ସମୀକ୍ଷାକୁ ନେଇ ରାଜନୀତି ଆରମ୍ଭ ହୋଇଯାଇଛି । ୧୦ ଜିଲ୍ଲାକୁ କେନ୍ଦ୍ରମନ୍ତ୍ରୀଙ୍କ ଗସ୍ତ ପଛରେ ବିକାଶ ପାଇଁ ଗୁରୁତ୍ୱ କମ୍, ରାଜନୀତି ଅଧିକ ବୋଲି ସନ୍ଦେହ କରୁଛି ବିଜେଡି । କାରଣ କେନ୍ଦ୍ରମନ୍ତ୍ରୀଙ୍କ ଓଡିଶା ଗସ୍ତସୂଚୀର ଯେଉଁ ତଥ୍ୟ ସାମ୍ନାକୁ ଆସିଛି, ସେଥିରେ ବିଜେପିର ଜିଲ୍ଲା ସଭାପତିଙ୍କୁ ସାମିଲ କରିବାକୁ କୁହାଯାଇଛି । ତେଣୁ କେନ୍ଦ୍ରମନ୍ତ୍ରୀଙ୍କ ଗସ୍ତକୁ ବିଜେପିର ସାଧାରଣ ନିର୍ବାଚନ ପ୍ରସ୍ତୁତିର ଏକ ଅଂଶ ଭାବେ ମଧ୍ୟ ବିଚାର କରୁଛି ଶାସକ ଦଳ ।
Kanak News is now on WhatsApp
Join and get latest news updates delivered to you via WhatsApp
ଆକାଂକ୍ଷୀ ଜିଲ୍ଲାରେ କେନ୍ଦ୍ରୀୟ ପ୍ରକଳ୍ପର ସମୀକ୍ଷା ପାଇଁ କେନ୍ଦ୍ରମନ୍ତ୍ରୀ ଆସୁଥିବା ପ୍ରସଙ୍ଗକୁ ନେଇ ରାଜ୍ୟ ରାଜନୀତି ସରଗରମ ହୋଇଛି । ପ୍ରଥମେ ମଙ୍ଗଳବାର କୋରାପୁଟରେ କେନ୍ଦ୍ରମନ୍ତ୍ରୀ ସଂଜୀବ ବଲିୟାନ ଜିଲ୍ଲା ପ୍ରଶାସନ ଓ ଜନପ୍ରତିନିଧିଙ୍କ ଅସହଯୋଗ କଥା ଉଠାଇଥିଲେ । ଆଉ ଏବେ କେନ୍ଦ୍ରମନ୍ତ୍ରୀଙ୍କ ସମୀକ୍ଷାକୁ ବିକାଶ ଉଦ୍ଦେଶ୍ୟ ନୁହେଁ ଶୁଦ୍ଧ ରାଜନୀତି ବୋଲି କହିଛି ବିଜେଡି ।
- ଆକାଂକ୍ଷୀ ଜିଲ୍ଲା ସମୀକ୍ଷାକୁ ନେଇ ତେଜିଲା ରାଜନୀତି
- ସମୀକ୍ଷା ଦେଖାଣିଆ, ରାଜନୈତିକ ଏଜେଣ୍ଡା ଥିବା ଅଭିଯୋଗ
ଓଡିଶାର ୧୦ ଆକାଂକ୍ଷୀ ଜିଲ୍ଲାରେ କେନ୍ଦ୍ରୀୟ ଅନୁଦାନ ଓ ପ୍ରକଳ୍ପର ସମୀକ୍ଷା ରାଜନୈତିକ ପ୍ରସଙ୍ଗ ପାଲଟି ଯାଇଛି । ଓଡିଶାର ପଛୁଆ ଜିଲ୍ଲାର ବିକାଶ କାମକୁ ଗୁରୁତ୍ୱ ଦେବା ଅପେକ୍ଷା କେନ୍ଦ୍ରମନ୍ତ୍ରୀଙ୍କ ଗସ୍ତରେ ରାଜନୀତି ଉଦ୍ଦେଶ୍ୟର ସନ୍ଦେହ କରୁଛି ବିଜେଡି । କେନ୍ଦ୍ରମନ୍ତ୍ରୀଙ୍କ ଗସ୍ତ ସୂଚୀର ଯେଉଁ ତଥ୍ୟ ସାମ୍ନାକୁ ଆସିଛି, ସେଥିରେ ବିଜେପି ଜିଲ୍ଲା ସଭାପତି କିମ୍ବା ସଂଗଠନର ନେତାଙ୍କୁ ସାମିଲ କରିବାକୁ କୁହାଯାଇଛି । ପ୍ରଶ୍ନ ଉଠୁଛି, ବିକାଶମୂଳକ କାର୍ଯ୍ୟର ସମୀକ୍ଷାରେ ନିର୍ଦ୍ଦିଷ୍ଟ ଦଳର ଜିଲ୍ଲା ନେତାଙ୍କ କାମ କଣ?
ରାଜ୍ୟସଭା ସାଂସଦ ଅମର ପଟ୍ଟନାୟକ କହିଛନ୍ତି, କେନ୍ଦ୍ର ଆକାଂକ୍ଷୀ ଜିଲ୍ଲା ପାଇଁ ଅନୁଦାନକୁ ୬୦-୪୦ ପ୍ରତିଶତ ଅନୁପାତ ବଦଳରେ କାହିଁକି ୯୦-୧୦ ପ୍ରତିଶତ କରୁ ନାହାନ୍ତି । ଏହା କଲେ ସେହି ଜିଲ୍ଲାର ବିକାଶ ହୋଇପାରନ୍ତା । କେନ୍ଦ୍ର ସରକାର ବିକାଶକୁ ଫୋକସ କରୁନାହାନ୍ତି ରାଜନୈତିକ ଏଜେଣ୍ଡା ଥିବା କହିଛନ୍ତି ସାସଂଦ । ସେପଟେ ରାଜ୍ୟ ବିଜେପି କହିଛି, କେନ୍ଦ୍ରମନ୍ତ୍ରୀ ବିକାଶ କାମର ସମୀକ୍ଷା ପାଇଁ ଆସୁଛନ୍ତି, କିନ୍ତୁ ବିଜେଡି ରାଜନୀତି କରୁଛି ।
ଆକାଂକ୍ଷୀ ଜିଲ୍ଲାରେ କେନ୍ଦ୍ରମନ୍ତ୍ରୀଙ୍କ କେନ୍ଦ୍ରୀୟ ପ୍ରକଳ୍ପର ବାସ୍ତବ ସ୍ଥିତି ନିରୀକ୍ଷଣ ସମୀକ୍ଷା ପ୍ରସଙ୍ଗ ମାଧ୍ୟମରେ ରାଜ୍ୟ ସରକାରଙ୍କୁ ବଦନାମ କରିବା ପାଇଁ ଉଦ୍ୟମ ଆରମ୍ଭ ହୋଇଥିବା କହିଛି ବିଜେଡି । ଅନ୍ୟପଟେ ଚାରି ଦିନିଆ ଓଡିଶା ଗସ୍ତରେ ଆସିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଏହି ଗସ୍ତ ସମୟରେ ଆକାଂକ୍ଷୀ ଜିଲ୍ଲା ଢେଙ୍କାନାଳ ଗସ୍ତ କରି କେନ୍ଦ୍ରୀୟ ଜନକଲ୍ୟାଣକାରୀ ଯୋଜନାର ସମୀକ୍ଷା କରିବେ ।