କନକ ବ୍ୟୁରୋ : ଲୋକାଲ କେବୁଲ ଟିଭିରେ ପିଲାଙ୍କୁ ପାଠ ପଢାଉଥିବା ସୂର୍ଯ୍ୟ ସାରଙ୍କୁ ମିଲିବ ଷ୍ଟୁଡିଓ । ଗଞ୍ଜାମ ଧରାକୋଟର ଏହି ଶିକ୍ଷକଙ୍କ ଉଦ୍ୟମ ପାଇଁ ଜିଲ୍ଲା ପ୍ରଶାସନ ପ୍ରସଂଶା କରିବା ସହ ଏକ ଷ୍ଟୁଡିଓ ଯୋଗାଇ ଦେବାକୁ ପ୍ରତିଶ୍ରୁତି ଦେଇଛି । ଷ୍ଟୁଡିଓ ପାଇଁ ଯାହା ଖର୍ଚ୍ଚ ହେବ ଜିଲ୍ଲା ପ୍ରଶାସନ ଯୋଗାଇ ଦେବ । ସେହିପରି କେବୁଲ ଅପରେଟର ମଧ୍ୟ ଏଥିରେ ସହଯୋଗ କରିବେ ।
Kanak News is now on WhatsApp
Join and get latest news updates delivered to you via WhatsApp
କରୋନା ମହାମାରୀ ସମୟରେ ପିଲାଙ୍କ ସ୍କୁଲ ଯିବା ଏକ ପ୍ରକାର ଠପ୍ ହୋଇଯାଇଥିବା ବେଳେ, ପିଲାମାନଙ୍କୁ ଶିକ୍ଷା ଯୋଗାଇଦେବା ସରକାରଙ୍କ ପାଇଁ ଏକ ବଡ଼ ଚ୍ୟାଲେଂଜ ପାଲଟିଛି । ତେଣୁ ୟୁଟ୍ୟୁବ୍ ମାଧ୍ୟମରେ ପିଲାମାନେ ପାଠ ପଢିବା ପାଇଁ ସରକାରଙ୍କ ପକ୍ଷରୁ ଘୋଷଣା ହୋଇଛି । କିନ୍ତୁ ସବୁ ପିଲାଙ୍କ ପାଖରେ ଆଣ୍ଡ୍ରଏଡ଼ ମୋବାଇଲ ଫୋନ ନଥିବା ବେଳେ ଅନେକ ସ୍ଥାନରେ ନେଟୱାର୍କ ସମସ୍ୟା ମଧ୍ୟ ଦେଖାଯାଉଛି । ଯାହା ଦ୍ୱାରା ଅନେକ ପିଲା ପାଠ ପଢିବାରୁ ବଂଚିତ ହେଉଛନ୍ତି । ଏପରି ସ୍ଥିତିରେ ପିଲାଙ୍କୁ ପାଠ ପଢାଇବା ପାଇଁ ଏକ ଅଭିନବ ପ୍ରୟାସ କରିଛନ୍ତି ଗଂଜାମ ଧରାକୋଟ ମୁଣ୍ଡମରାଇ ଗାଁର ଦେଓପାଟଣା ସ୍କୁଲର ପ୍ରଧାନଶିକ୍ଷକ ସୂର୍ଯ୍ୟ ନାରାୟଣ ସାହୁ ।
ଲୋକାଲ ଟିଭି ଚ୍ୟାନେଲରେ ସେ ପିଲାମାନଙ୍କୁ ଶିକ୍ଷାଦାନ କରୁଛନ୍ତି । ପିଲାମାନେ ଘରେ ବସି ପାଠ ପଢୁଛନ୍ତି । ଆଉ ମୋବାଇଲ ଦରକାର ପଡ଼ୁନାହିଁ କି ନେଟ ମଧ୍ୟ ଦରକାର ପଡ଼ୁନାହିଁ । ଧରାକୋଟ ବ୍ଳକର ୭ଟି ପଂଚାୟତରେ ପ୍ରାୟ ପିଲାଙ୍କ ପାଖରେ ଆଣ୍ଡ୍ରଏଡ଼ ମୋବାଇଲ ନାହିଁ । ଯଦି କାହା ପାଖରେ ଅଛି ନେଟୱାର୍କ ସମସ୍ୟା ସାଙ୍ଗକୁ ରିଚାର୍ଜ ପାଇଁ ଟଙ୍କା ନାହିଁ । ଏଭଳି ସ୍ଥିତିରେ ପ୍ରଧାନ ଶିକ୍ଷକ ସୂର୍ଯ୍ୟ ନାରାୟଣ ସାହୁ ଏଭଳି ଅଭିନବ ପ୍ରୟାସ ଆରମ୍ଭ କରିଛନ୍ତି ।