କନକ ବ୍ୟୁରୋ : କାମ କଲାନି ବିଜୁ ସ୍ୱାସ୍ଥ୍ୟ କାର୍ଡ । ହୋଇପାରିଲା ନାହିଁ କର୍କଟ ରୋଗୀଙ୍କ ଚିକିତ୍ସା । ଆଉ ବିନା ଚିକିତ୍ସାରେ ଚାଲିଗଲା କର୍କଟ ରୋଗୀଙ୍କ ଜୀବନ । ମୃତକ ଜଣକ ହେଲେ ଜଗତସିଂହପୁର ଜିଲ୍ଲା କୁଜଙ୍ଗ ବ୍ଲକ୍ ପଙ୍କପାଳ ଗ୍ରାମର ଶତୃଘ୍ନ ଓଝା । ଚିକିତ୍ସା ପାଇଁ କଟକ ଯିବା ପୂର୍ବରୁ ଶତୃଘ୍ନଙ୍କ ପ୍ରାଣବାୟୁ ଉଡ଼ିଗଲା । ଶତୃଘ୍ନଙ୍କ ପତ୍ନୀ ତୃପ୍ତିମୟୀ ମଧ୍ୟ ସ୍ତନ କର୍କଟ ରୋଗରେ ପୀଡ଼ିତ ଅଛନ୍ତି । ପତ୍ନୀ କକର୍ଟ ରୋଗରେ ପୀଡ଼ିତ ଥିବା ଜାଣିବା ପରେ ରାଜ୍ୟ ବାହାରେ ଦାଦନ ଖଟୁଥିବା ଶତୃଘ୍ନ ଘରକୁ ଚାଲିଆସିଥିଲେ ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟ ସରକାରଙ୍କ ପକ୍ଷରୁ ମିଳିଥିବା ବିଜୁ ସ୍ୱାସ୍ଥ୍ୟ କାର୍ଡ ଧରି ପତ୍ନୀଙ୍କ ଚିକିତ୍ସା ପାଇଁ ବିଭିନ୍ନ ହସ୍ପିଟାଲକୁ ଯାଇଥିଲେ । କିନ୍ତୁ କେଉଁଠି ବି ତାଙ୍କୁ ସୁବିଧା ମିଳିନଥିଲା । ଏହାର କିଛି ଦିନ ପରେ ଶତୃଘ୍ନ ମଧ୍ୟ ମୁଖ ଗହ୍ୱର କକର୍ଟ ରୋଗରେ ଆକ୍ରାନ୍ତ ହୋଇଥିଲେ । ସେ ନିଜ ପାଇଁ ମଧ୍ୟ ଏହି କାର୍ଡ ବ୍ୟବହାର କରିବାକୁ ଯାଇ କୌଣସି ସୁବିଧା ପାଇନଥିଲେ । ତାଙ୍କ ଅବସ୍ଥା ସଙ୍କଟାପନ୍ନ ହେବାରୁ ପରିବାର ଲୋକେ ଏକ ଫାଉଣ୍ଡେସନର ସହାୟତାରେ ଜିଲ୍ଲାପାଳଙ୍କ ନିକଟରେ ସହାୟତା ପାଇଁ ନିବେଦନ କରିଥିଲେ ।
ଯାହା ପରେ କଟକ ଆଚାର୍ଯ୍ୟ ହରିହର ହସ୍ପିଟାଲରେ ତାଙ୍କର ଚିକିତ୍ସା ପାଇଁ ସ୍ଥିର ହୋଇଥିଲା । କିନ୍ତୁ ଦୁର୍ଭାଗ୍ୟବଶତଃ ଚିକିତ୍ସା ପାଇଁ କଟକ ଯିବା ପୂର୍ବରୁ ଶତୃଘ୍ନଙ୍କ ଦେହାନ୍ତ ହୋଇଛି । ତେବେ ଶତୃଘ୍ନଙ୍କ ମୃତ୍ୟୁ ଓ ତାଙ୍କ ପତ୍ନୀଙ୍କ ଅବସ୍ଥା ଏବେ ବିଜୁ ସ୍ୱାସ୍ଥ୍ୟ କାର୍ଡର ଉପଯୋଗିତାକୁ ନେଇ ପ୍ରଶ୍ନ ସୃଷ୍ଟି କରିଛି ।