ସିଞ୍ଜୋ ଆବେଙ୍କୁ ହତ୍ୟା କରିଥିବା ସ୍ୱୀକାର କଲା ଅଭିଯୁକ୍ତ। ତଦନ୍ତ ପାଇଁ ୯୦ ଜଣିଆ କମିଟି ଗଠନ।
କନକ ବ୍ୟୁରୋ: ଜାପାନର ପୂର୍ବତନ ପ୍ରଧାନମନ୍ତ୍ରୀ ସିଞ୍ଜୋ ଆବେଙ୍କ ହତ୍ୟା ସାରା ବିଶ୍ୱକୁ ସ୍ତବ୍ଧ କରିଦେଇଛି । ନିର୍ବାଚନୀ ପ୍ରଚାର ସମୟରେ ନାରା ସହରରେ ଏକ ସଭାକୁ ସମ୍ବୋଧନ କରୁଥିବା ବେଳେ ଆବେଙ୍କୁ ଗୁଳି କରି ହତ୍ୟା କରାଯାଇଥିଲା । ଏହି ହତ୍ୟାକାଣ୍ଡ କେମିତି ଘଟିଲା ଏବଂ ଏହା ପଛର ଅସଲ କାରଣ କ’ଣ, ତାର ତଦନ୍ତ ପାଇଁ ଜାପାନ ସରକାର ୯୦ ଜଣିଆ କମିଟି ଗଠନ କରିଛନ୍ତି । ପୋଲିସର କହିବା ଅନୁସାରେ, ଆବେଙ୍କ ନାରା ଗସ୍ତ ନେଇ ପୂର୍ବଦିନ ସନ୍ଧ୍ୟାରେ ଆତତାୟୀକୁ ଖବର ମିଳିସାରିଥିଲା । ଆଉ ହତ୍ୟାକାରୀ ସୁଯୋଗର ଫାଇଦା ଉଠାଇ ଆବେଙ୍କ ଉପରକୁ ଗୁଳି ଚଳାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ପ୍ରଶ୍ନ ଉଠୁଛି, ପୂର୍ଣ୍ଣ ସୁରକ୍ଷା ଭିତରେ ଦେଶର ପୂର୍ବତନ ପ୍ରଧାନମନ୍ତ୍ରୀ ସିଞ୍ଜୋ ଆବେଙ୍କୁ କେମିତି ହତ୍ୟା କରାଗଲା? ଅନ୍ୟପକ୍ଷରେ ପୁଲିସ୍ କହିଛି ଯେ ଆବେଙ୍କ ସଭାସ୍ଥଳର ସୁରକ୍ଷା ଯାଞ୍ଚ କରାଯିବ ଏବଂ କେଉଁଠି ଭୁଲ୍ ରହିଲା, ତା’ର ପୁଙ୍ଖାନୁପୁଙ୍ଖ ତଦନ୍ତ କରାଯିବ ।
ଏହାରି ଭିତରେ ଘଟଣାସ୍ଥଳରୁ ଗିରଫ ହୋଇଥିବା ୪୧ ବର୍ଷୀୟ ଅଭିଯୁକ୍ତ ୟାମାଗାମୀ ତେତସୁୟା ସିଂଜୋ ଆବେଙ୍କୁ ଗୁଳି କରିଥିବା ସ୍ୱୀକାର କରିଛି । କୌଣସି ଏକ ଧାର୍ମିକ ସଂଗଠନକୁ ୟାଗାୟାମୀ ତୀବ୍ର ବିରୋଧ କରୁଥିବା ପୋଲିସ ତଦନ୍ତରୁ ଜଣାପଡ଼ିଛି । ଆଉ ଏହି ଧାର୍ମିକ ସଂଗଠନ ସହ ସିଂଜୋ ଆବେଙ୍କର ସଂପୃକ୍ତି ମଧ୍ୟ ରହିଥିଲା । ତେବେ ତଦନ୍ତ ବେଳେ ଉକ୍ତ ଧାର୍ମିକ ସଂଗଠନର ନେତାଙ୍କର ପରିଚୟ ଉଜାଗର କରାଯାଇନାହିଁ । ୟାମାଗାମୀ ପୋଲିସକୁ ଆହୁରି କହିଛି ଯେ ତା’ର ମାଆ ମଧ୍ୟ ସଂଗଠନରେ ସାମିଲ ଥିଲା ଏବଂ ସଂଗଠନକୁ ପ୍ରଚୁର ଅର୍ଥଦାନ କରିଥିଲେ । ଯାହା ତାଙ୍କ ପରିବାର ପାଇଁ ସମସ୍ୟା ସୃଷ୍ଟି କରିଥିଲା । ପୁଲିସ୍ ୟାମାଗାମୀଙ୍କ ଘରେ ଚଢ଼ାଉ କରିଛି ଏବଂ ତା’ ଘରୁ ବିସ୍ଫୋରକ ଜବତ କରିଛି ।
ଆବେଙ୍କ ହତ୍ୟାକାରୀ ୟାମାଗାମୀ ଜାପାନ ନୌସେନା ତଥା ଜାପାନର ସାମୁଦ୍ରିକ ପ୍ରତିରକ୍ଷା ବାହିନୀର ଜଣେ ପୂର୍ବତନ ସଦସ୍ୟ ଭାବେ ୩ ବର୍ଷ କାମ କରିଛନ୍ତି । ଆବେଙ୍କୁ ଗୁଳି କରିବା ପରେ ସେ ସେଠାରୁ ଖସିବାକୁ ରାସ୍ତା ପାଇନଥିଲା ।