ଗୋପାଳପୁର ପୁଲିସର ଥାର୍ଡ ଡିଗ୍ରୀ : ମିଛ ଅଭିଯୋଗରେ ରାଇକିଆ ବ୍ୟବସାୟୀଙ୍କୁ ନିର୍ଦ୍ଧୁମ ପିଟିଲେ ଥାନା ବାବୁ, ଅଭିଯୋଗ ପରେ ହେଲେ ବଦଳି
କନକ ବ୍ୟୁରୋ : ଗଞ୍ଜାମ ଗୋପାଳପୁର ପୁଲିସର ବର୍ବରତା । ମିଛ ଅଭିଯୋଗରେ କନ୍ଧମାଳ ରାଇକିଆ ବ୍ଲକ ଅଞ୍ଚଳର ବ୍ୟବସାୟୀ ସୁମନ୍ତ କୁମାର ସାହୁଙ୍କୁ ଗୋପାଳପୁର ଥାନାରେ ଥାର୍ଡ ଡିଗ୍ରୀ ଦିଆଯାଇଥିବା ଅଭିଯୋଗ । ଘଟଣା ପରେ ଗୋପାଳପୁର ଥାନା ଅଧିକାରୀ ଶ୍ରୀକାନ୍ତ ଖମାରିଙ୍କ ନାମରେ ରାଇକିଆ ଥାନାରେ ମାମଲା ରୁଜୁ ହୋଇଛି । ଏଭଳି ସାଘାଂତିକ ଅଭିଯୋଗ ଆସିବା ପରେ ଗୋପାଳପୁର ଥାନା ଅଧିକାରୀ ଶ୍ରୀକାନ୍ତ ଖମାରୀଙ୍କୁ ଗଞ୍ଜାମ ଏସପି ଜିଲ୍ଲା ମୁଖ୍ୟାଳୟକୁ ବଦଳି କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଗତ ୨୭ ତାରିଖରେ ଗୋପାଳପୁର ପୋଲିସ କର୍ମଚାରୀ ରାଇକିଆ ଅଞ୍ଚଳର ବ୍ୟବସାୟୀ ସୁମନ୍ତ କୁମାର ସାହୁଙ୍କ ଘରେ ପଶି ଉଠାଇ ନେଇଥିଲେ । ଏମିତିକି ତାଙ୍କୁ ଜୋର ଜବରଦସ୍ତ ଉଠାଇ ଗୋପାଳପୁର ଥାନାକୁ ନେଇ ସେଠାରେ ନିସ୍ତୁକ ମାଡ ମାରିଥିବା ଅଭିଯୋଗ ହୋଇଛି । ଆହତ ସୁମନ୍ତଙ୍କ ସ୍ତ୍ରୀ ସୁଭଦ୍ରା କୁମାରି ଚନ୍ଦନ, ରାଇକିଆ ଥାନାରେ ଘଟଣା ନେଇ ଅଭିଯୋଗ କରିଥିଲେ । ସୂଚନା ଅନୁସାରେ ରାଇକିଆ ଅଞ୍ଚଳର ସ୍ମୃତି ରେଖା ସାହୁ ନାମକ ଜଣେ ମହିଳାଙ୍କ ଠାରୁ ସୁମନ୍ତ କୁମାର ସାହୁ ୪ଲକ୍ଷ ଟଙ୍କା ଋଣ ଆଣିଥିଲେ । ପରେ ସେ ଋଣଟଙ୍କା ସହ ସୁଧ ମଧ୍ୟ ତାଙ୍କ ଫୋନ ପେ ଓ ବ୍ୟାଙ୍କ ଆକାଉଣ୍ଟ ମାଧ୍ୟମରେ ଫେରସ୍ତ କରିଥିଲେ ।
ଭୁଲ ବଶତଃ ଋଣ ଆଣିବା ବେଳେ କରିଥିବା ଏଗ୍ରିମେଣ୍ଟ ପେପର ସ୍ମୃତି ରେଖାଙ୍କ ଠାରୁ ଆଣିନଥିଲେ । ଫଳରେ ତାର ସୁଯୋଗ ନେଇ ସ୍ମୃତି ରେଖା ପୁଣି ଟଙ୍କା ଦାବି କରିଥିଲେ । ଏନେଇ ସ୍ମୃତି ରେଖା ବ୍ୟବସାୟୀଙ୍କ ନାଁରେ ଅଭିଯୋଗ କରିଥିଲେ । ପରେ ଗୋପାଳପୁର ଥାନା ଅଧିକାରୀ ପୋଲିସ ଟିମ ପଠାଇ ସୁମନ୍ତଙ୍କୁ ଘରୁ ଉଠାଇ ଆଣି କିଛି ନବୁଝି ଥାନାରେ ମାଡ଼ ମାରିଥିବା ଅଭିଯୋଗ ହୋଇଛି ।