ଦିଲ୍ଲୀ ରାଜପଥରେ ଗଡିବନି ଓଡିଶାର ପ୍ରଜ୍ଞାପନ ମେଢ । ଚୂଡାନ୍ତ ପର୍ଯ୍ୟାୟକୁ ଯାଇଥିଲା ବକ୍ସି ଓ ପାଇକ କାହାଣୀ । କାହିଁକି ପଡିଲା ବାଦ, ଉଠିଲା ପ୍ରଶ୍ନ
କନକ ବ୍ୟୁରୋ: ସାତ ଦିନ ପରେ ଦେଶ ପାଳିବ ୭୩ ତମ ସାଧାରଣତନ୍ତ୍ର ଦିବସ କିନ୍ତୁ ଚଳିତ ବର୍ଷ ଦିଲ୍ଲୀ ରାଜପଥ ପରେଡରେ ଶୋଭା ପାଇବନି ଓଡିଶାର ପ୍ରଜ୍ଞାପନ ମେଡ । ରାଜ୍ୟ ପକ୍ଷରୁ କେନ୍ଦ୍ରୀୟ ଚୟନ କମିଟିକୁ ୫ଟି ଡିଜାଇନ ପଠାଯାଇଥିଲା ହେଲେ, ଓଡିଶାର ସମସ୍ତ ଡିଜାଇନକୁ କେନ୍ଦ୍ର ଚୟନ କମିଟି କାଟି ଦେଇଛନ୍ତି । ଓଡିଶା ଭଳି ତାମିଲନାଡୁ, ପଶ୍ଚିମବଙ୍ଗ ଓ କେରଳ ପକ୍ଷରୁ ଦିଆଯାଇଥିବା ଡିଜାଇନ ବି କାଟ୍ ଖାଇଯାଇଛି । ତେବେ ତାମିଲନାଡୁ, କେରଳ ଓ ପଶ୍ଚିମବଙ୍ଗ ସରକାରଙ୍କ ପକ୍ଷରୁ କେନ୍ଦ୍ରର ଆଭିମୁଖ୍ୟକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି କିନ୍ତୁ ଓଡିଶା ପକ୍ଷରୁ ବିଧିବଦ୍ଧ ଭାବେ କୌଣସି ପ୍ରତିବାଦ କରାଯାଇ ନାହିଁ , ଯାହାକି ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
Kanak News is now on WhatsApp
Join and get latest news updates delivered to you via WhatsApp
୭୩ ତମ ସାଧାରଣତନ୍ତ୍ର ଦିବସ ଅବସରରେ ଦିଲ୍ଲୀ ରାଜପଥରେ ପ୍ରଦର୍ଶିତ ହେବା ପାଇଁ ଓଡ଼ିଶା ପକ୍ଷରୁ ଦିଆଯାଇଥିଲା ୫ଟି ଡିଜାଇନ୍ । ସେଥିରେ ଥିଲା ୧୮୧୭ ମସିହାର ପାଇକ ବିଦ୍ରୋହ ଓ ବକ୍ସି ଜଗବନ୍ଧୁ, ସ୍ୱାଧୀନତା ସଂଗ୍ରାମରେ ଜୟୀ ରାଜଗୁରୁ, ଚାଖି ଖୁଣ୍ଟିଆଙ୍କ ସଂଘର୍ଷର କାହାଣୀ, ରାଜ୍ୟରେ ହକି ଭିତ୍ତିଭୂମି ଓ ହକି ବିକାଶରେ ଓଡ଼ିଶାର ଅବଦାନ ଭଳି ଗୌରବ ଗାଥା । ଏହି ସବୁ ଭିତରୁ ପ୍ରଥମ ରାଉଣ୍ଡରେ ବକ୍ସି ଜଗବନ୍ଧୁ ଓ ପାଇକ ବିଦ୍ରୋହ ମଡେଲକୁ ପସନ୍ଦ କରିଥିଲେ ଚୟନ କମିଟି । ତିନି ରାଉଣ୍ଡ ପର୍ଯ୍ୟନ୍ତ ସବୁ ଠିକ୍ ଠାକ୍ ଚାଲିଥିଲା, ହେଲେ ଚତୁର୍ଥ ରାଉଣ୍ଡରେ ଏହା କାଟ ଖାଇ ଯାଇଥିଲା । କାଟ ଖାଇବା ପଛରେ ସେପରି ବଡ଼ କାରଣ ଦର୍ଶାନଥିବାରୁ ଏହାକୁ ନେଇ ଅସନ୍ତୋଷ ତେଜିବାରେ ଲାଗିଛି ।
୧୯୫୨ ମସିହାରେ ସାଧାରଣତନ୍ତ୍ର ଦିବସ ପରେଡରେ ପ୍ରଥମେ ସାମିଲ ହୋଇଥିଲା ଓଡ଼ିଶାର ପ୍ରଜ୍ଞାପନ ମେଢ଼ । ୧୨ ଥର ଦିଲ୍ଲୀ ରାଜପଥରେ ପ୍ରଦର୍ଶିତ ହୋଇଛି ଓଡ଼ିଶାର ପ୍ରଜ୍ଞାପନ ମେଢ଼ । ୨୦୨୦ରେ ମଧ୍ୟ ଏହା ପ୍ରଦର୍ଶିତ ହୋଇଥିଲା । କ୍ରମାଗତ ୫ ବର୍ଷ ଧରି ଗୁଜରାଟର ପ୍ରଜ୍ଞାପନ ମେଢ଼କୁ ଅନୁମତି ଦେଇଆସୁଛନ୍ତି କେନ୍ଦ୍ର ସରକାର । ଓଡ଼ିଶାର ପ୍ରଜ୍ଞାପନ ମେଢ଼ ଉଚ୍ଚ ପ୍ରଶଂସିତ ହୋଇ ଆସୁଥିବା ବେଳେ କାହିଁକି ଏଥର ବାଦ ପଡ଼ିଲା, ଏ ନେଇ ପ୍ରଶ୍ନ ଉଠିଛି…
- ବାଦ ପଡ଼ିଲା ପଶ୍ଚିମବଙ୍ଗ, ତାମିଲନାଡୁ, କେରଳର ପ୍ରଜ୍ଞାପନ ମେଢ଼
- କେନ୍ଦ୍ର ନିକଟରେ ତିନି ରାଜ୍ୟର ଜୋରଦାର ପ୍ରତିବାଦ
- ପ୍ରତିବାଦ କରିବାରେ ପଛରେ ପଡ଼ିଲା ଓଡ଼ିଶା
ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଅବଦାନକୁ ନେଇ ପ୍ରଜ୍ଞାପନ ମେଢ଼ ପାଇଁ ପ୍ରସ୍ତାବ ଦେଇଥିଲା ପଶ୍ଚିମବଙ୍ଗ । ଯାହା କାଟ ଖାଇ ଯାଇଛି । ସେହିପରି ତାମିଲନାଡୁ ଓ କେରଳର ପ୍ରସ୍ତାବିତ ଡିଜାଇନ୍ ବାଦ ପଡିଛି । ଏହି ତିନି ରାଜ୍ୟର ମୁଖ୍ୟମନ୍ତ୍ରୀ ଚିଠି ଲେଖି ପ୍ରଧାନମନ୍ତ୍ରୀଙ୍କ ହସ୍ତକ୍ଷେପ ଲୋଡ଼ିଛନ୍ତି । ସମାଜ ସଂସ୍କାରକ ନାରାୟଣ ଗୁରୁ ଓ ଜଟାୟୁ ପାର୍କ ଐତିହ୍ୟକୁ ନେଇ କେରଳ ପକ୍ଷରୁ ଡିଜାଇନ୍ ଦିଆଯାଇଥିଲା । ଯାହା କାଟ ଖାଇ ଯାଇଥିଲା । ଆଦି ଶଙ୍କରାଚାର୍ଯ୍ୟକୁ ନେଇ ପ୍ରଜ୍ଞାପନ ମେଢ଼ କରିବାକୁ ପ୍ରସ୍ତାବ ଦେଇଥିଲା କେନ୍ଦ୍ର । ହେଲେ ଏହାକୁ ପ୍ରତ୍ୟାଖ୍ୟାନ କରିଛି କେରଳ । ପ୍ରଜ୍ଞାପନ ମେଢ଼କୁ ନେଇ ତିନି ରାଜ୍ୟ ପ୍ରତିକ୍ର୍ରିୟାଶୀଳ ହୋଇଥିବା ବେଳେ ଓଡ଼ିଶା କିନ୍ତୁ ଏପର୍ଯ୍ୟନ୍ତ ଆନୁଷ୍ଠାନିକ ଭାବେ ପ୍ରତିବାଦ କରିନଥିବା ଜଣାପଡିଛି ।
ନଜର ପକାନ୍ତୁ କିପରି ହୋଇଥାଏ ପ୍ରଜ୍ଞାପନ ମେଢ଼ ଚୟନ
- ପ୍ରତିରକ୍ଷା ମନ୍ତ୍ରାଳୟ ଏ ନେଇ ଚୟନ କମିଟି ଗଢ଼ିଥାଏ
- ଚୟନ କମିଟିରେ କଳା, ସଂସ୍କୃତି, ଭାସ୍କର୍ଯ୍ୟ, ସଂଗୀତ, ସ୍ଥାପତ୍ୟ ଜଗତର ବିଶିଷ୍ଟ ବ୍ୟକ୍ତି ରହିଥାନ୍ତି
- ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରୁ ପ୍ରସ୍ତାବ ଗ୍ରହଣ କରାଯାଏ
- ବିଷୟବସ୍ତୁ, ଭାବନା, ଡିଜାଇନ୍ ଆଦିକୁ ଦୃଷ୍ଟିରେ ରଖି ପ୍ରସ୍ତାବକୁ ଅନୁମୋଦନ ଦିଆଯାଏ
- ଏହାପରେ ସ୍କେଚ୍ ପଠାଇଥାନ୍ତି ରାଜ୍ୟ
- ବିଭିନ୍ନ ପର୍ଯ୍ୟାୟରେ ଚୟନ ହେବା ପରେ ମଡେଲ ନିର୍ମାଣ ପାଇଁ କୁହାଯାଇଥାଏ
ବକ୍ସି ଜଗବନ୍ଧୁ ଓ ପାଇକ ବିଦ୍ରୋହକୁ ନେଇ ଓଡ଼ିଶା ଯେଉଁ ଡିଜାଇନ ଦେଇଥିଲା, ତିନି ରାଉଣ୍ଡ ପର୍ଯ୍ୟନ୍ତ ଚୟନ କମିଟି ଏହାକୁ ଉଚ୍ଚ ପ୍ରଶଂସା କରିଥିଲା । ତେବେ କାହିଁକି ଚତୁର୍ଥ ରାଉଣ୍ଡରେ ବାଦ ପଡ଼ିଲା ଏହାକୁ ନେଇ ସନ୍ଦେହ ସୃଷ୍ଟି ହୋଇଛି । ପାଇକ ବିଦ୍ରୋହକୁ ପ୍ରଥମ ସ୍ୱାଧୀନତା ସଂଗ୍ରାମର ମାନ୍ୟତା ଦେବାକୁ କେନ୍ଦ୍ର ସରକାର ରାଜି ନହେବା ପରେ ଓଡ଼ିଶାର ପ୍ରଜ୍ଞାପନ ମେଢ଼ ବାଦ ପଡ଼ିଥିବା ନେଇ ଅଭିଯୋଗ ହୋଇଛି ।