କନକ ବ୍ୟୁରୋ : ରାଷ୍ଟ୍ରପତି ନିର୍ବାଚନ ପାଇଁ ମଝିରେ ଆଉ ଗୋଟିଏ ମାସ ଥିବା ବେଳେ ଦେଶ ରାଜନୀତିରେ ବିଭିନ୍ନ ରାଜନୈତିକ ସମୀକରଣ ତିଆରି ହେଉଛି । ମମତା, ବିରୋଧୀଙ୍କ ନେତୃତ୍ୱ ନେଉଥିବା ବେଳେ କିଛି ଦଳ ନିଜର ଆଭିମୁଖ୍ୟ ସ୍ପଷ୍ଟ କରିନାହାନ୍ତି ।
Kanak News is now on WhatsApp
Join and get latest news updates delivered to you via WhatsApp
ଦିଲ୍ଲୀ କଂଷ୍ଟିଚ୍ୟୁସନ କ୍ଲବ, ଯେଉଁଠାରେ ବିରୋଧୀଙ୍କୁ ମେଳି କରି ମୋଦି ସରକାର ବିରୋଧରେ ଶକ୍ତି ପ୍ରଦର୍ଶନ କରୁଛନ୍ତି ମମତା ବାନାର୍ଜୀ । ପ୍ରସଙ୍ଗ ହେଉଛି ରଷ୍ଟ୍ରପତି ନିର୍ବାଚନ । ଏହି ବୈଠକରେ ଯୋଗଦେବା ପାଇଁ ୨୨ଟି ଅଣଏନଡିଏ ଦଳକୁ ଡାକିଥିଲେ ମମତା । କିନ୍ତୁ ମମତାଙ୍କ ଏହି ବୈଠକକୁ ଆସିବା ପୂର୍ବରୁ ଅନେକ ବିରୋଧୀ ଦଳର ନେତା ମୁହଁମୋଡି ଦେଇଛନ୍ତି । ମୋଟ ୧୬ଟି ଦଳ ମମତାଙ୍କ ଏହି ବୈଠକରେ ଯୋଗଦେଇ ଆଲୋଚନାରେ ସାମିଲ ହୋଇଥିଲେ । ବୈଠକରେ ଟିଆରଏସ, ଆମ ଆଦମି ପାର୍ଟି, ଶିରୋମଣି ଅକାଳି ଦଳ ଓ ବିଜୁ ଜନତା ଦଳ ଯୋଗଦେଇନଥିଲେ ।
ଏ ସବୁ ଭିତରେ ସମସ୍ତଙ୍କ ନଜର ଥିଲା ବିଜେଡି ଉପରେ । ପୂର୍ବରୁ ବି ବିଜେଡି ଏଭଳି ମେଳିରେ ସାମିଲ ହୁଏ ନାହିଁ । ସୁପ୍ରିମୋ ନବୀନ ପଟ୍ଟନାୟକଙ୍କ ରଣନୀତି ଏ ସବୁ କ୍ଷେତ୍ରରେ ସମ୍ପୂର୍ଣ୍ଣ ଅଲଗା ଥାଏ । ଏଥର ବି ସେଇୟା ଦେଖିବାକୁ ମିଳିଥିଲା । ରାଷ୍ଟ୍ରପତି ନିର୍ବାଚନରେ ବିଜୁ ଜନତା ଦଳ ନିଜର ଆଭିମୁଖ୍ୟ ସ୍ପଷ୍ଟ କରି ନଥିବାବେଳେ ମମତାଙ୍କ ବୈଠକରେ ବିଜେଡି ଯୋଗ ନଦେବା ଏହି ଚର୍ଚ୍ଚକୁ ଆହୁରି ବଢାଇ ଦେଇଛି । କିଛି ଦିନ ପୂର୍ବରୁ ଦିଲ୍ଲୀରେ ନବୀନ ଓ ମୋଦୀଙ୍କ ଭେଟଘାଟ ହୋଇଥିଲା ଓ ଏହାକୁ ରାଷ୍ଟ୍ରପତି ନିର୍ବାଚନ ଦୃଷ୍ଟିକୋଣରୁ ଦେଖାଯାଉଥିଲା । କିନ୍ତୁ ଏହା ସୌଜନ୍ୟମୂଳକ ସାକ୍ଷାତ ବୋଲି କହିଥିଲେ ନବୀନ ।
ଟିଆରଏସ କହିଛି କଂଗ୍ରେସ ସହ କୌଣସି ପରିସ୍ଥିତିରେ ଗୋଟିଏ ମଞ୍ଚରେ ଏକାଠି ହେବନି ଦଳ । ସମାନ କଥା ପଞ୍ଜାବର ଶିରୋମଣି ଅକାଳୀ ଦଳ ମଧ୍ୟ କହିଛି । ସେହିପରି ଅରବିନ୍ଦ କେଜ୍ରିୱାଲଙ୍କ ନେତୃତ୍ୱାଧୀନ ଦଳ ଆପ୍ କହିଛି, ପ୍ରାର୍ଥୀ ଘୋଷଣା ପରେ ଦଳ କୌଣସି ନିଷ୍ପତ୍ତି ନେବ । ସେହିପରି ବିଜୁ ଜନତା ଦଳ ମଧ୍ୟ ବୈଠକରୁ ଦୂରେଇ ରହିଛି ।