କନକ ବ୍ୟୁରୋ: ଆସନ୍ତା ୧୨ ତାରିଖରେ ଲୁଲୁ ସେନା ବିଜେପିରେ ମିଶିବାକୁ ଯାଉଛି । ଏହାକୁ ନେଇ ରାଜନୀତି ପାଣିପାଗ ସରଗରମ ହେବାକୁ ଲାଗିଲାଣି । ୟୁନିଟ୍ ୩ ପ୍ରଦର୍ଶନୀ ପଡିଆରେ ଲୁଲୁଙ୍କ ପରିବାର ସହିତ ଲୁଲୁ ସେନାର ବହୁ କର୍ମୀ ବିଜେପିରେ ଯୋଗଦେବାର କାର୍ଯ୍ୟକ୍ରମ ରହିଛି ।
Kanak News is now on WhatsApp
Join and get latest news updates delivered to you via WhatsApp
ସ୍ୱର୍ଗତ ଲୁଲୁ ମହାପାତ୍ରଙ୍କ ନୀତି ଆଦର୍ଶରେ ଗଠନ ହୋଇଥିବା ଲୁଲୁ ସେନା ବିଜେପିରେ ମିଶିଲେ ରାଜ୍ୟ କଂଗ୍ରେସ ବିଶେଷ ପ୍ରଭାବିତ ହେବ ବୋଲି ମତପ୍ରକାଶ ପାଇଛି । ରାଜ୍ୟରେ କଂଗ୍ରେସ ସ୍ଥିତି ଖରାପ ଥିବାବେଳେ ଲୁଲୁ ସେନା ଏଭଳି ନିଷ୍ପତ୍ତି ନେଇଥିବା ଆଳୋଚନା ହେଉଛି । ତେବେ ଏଥିପାଇଁ ଏଆଇସିସିକୁ ଦାୟୀ କରିଛି ଲୁଲୁ ସେନା ।
ଏଠାରେ ଆମ କହି ରଖୁଛୁ କି, କିଛି ଦିନ ତଳେ ଲୁଲୁସେନା ପକ୍ଷରୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ ବରିଷ୍ଠ ବିଜେପି ନେତା ବିଶ୍ୱଭୂଷଣ ହରିଚନ୍ଦନଙ୍କୁ ଭଞ୍ଜକଳା ମଣ୍ଡପଠାରେ ସମ୍ବର୍ଦ୍ଧନା ଦିଆଯାଇଥିଲା ଯାହାକୁ ନେଇ ବିଭିନ୍ନ ମହଲରେ ଚର୍ଚ୍ଚା ଜୋର ଧରିଥିଲା । ତେବେ ପାଇକ ବିଦ୍ରୋହର ୨୦୦ ବର୍ଷ ପୂର୍ତି ଅବସରରେ ବକ୍ସି ପରିବାରଙ୍କୁ ସମର୍ଦ୍ଧନା ଦେଇଥିବାରୁ ଏହି ପ୍ରତିସମ୍ବର୍ଦ୍ଧନା ଦିଆଯାଇଛି ବୋଲି ଲୁଲୁସେନା ପକ୍ଷରୁ କୁହାଯାଇଥିଲା । ରାଜନୀତିକୁ ଆସିଲେ ମାମୁଁ ଧର୍ମେନ୍ଦ୍ର ପ୍ରଧାନଙ୍କ ସହ ଆସିବେ ବୋଲି ଲୁଲୁଙ୍କ ଝିଅ ଉପାସନା ମଧ୍ୟ କହିଥିଲେ । ଏଥିସହିତ ଧର୍ମେନ୍ଦ୍ର ପ୍ରଧାନ ତାଙ୍କ ପାଇଁ ବହୁତ କିଛି କରିଛନ୍ତି ବୋଲି ଉପାସନା କହିଥିଲେ ।
ଅନ୍ୟପଟେ, ଲୁଲୁଙ୍କ ଭାଇ ବି ଏହାକୁ ସ୍ୱୀକାର କହିଥିଲେ । ସେ କହିଥିଲେ, ଲୁଲୁସେନା ସହ ଆଲୋଚନା କରି ବିଜେପି ସହ ଯିବା କଥା ଚିନ୍ତା କରିବୁ । ଯଦି ସମସ୍ତେ ଚାହିଁବେ ତାହେଲେ ଲୁଲୁସେନା ତାହା ହିଁ କରିବ ବୋଲି ମତବ୍ୟକ୍ତ କରିଥିଲେ ।