କନକ ବ୍ୟୁରୋ: ରାଜଧାନୀର କ୍ୟାପିଟାଲ ହସ୍ପିଟାଲର କାଜୁଆଲଟିରେ ଭୁଲ ଇଞ୍ଜେକସନ ଦେବା ଯୋଗୁଁ ରୋଗୀର ମୃତ୍ୟୁ ଅଭିଯୋଗ ଚାଞ୍ଚଲ୍ୟ ଖେଳାଇ ଦେଇଛି । ଅଭିଯୋଗକୁ ଗୁରୁତର ସହ ନେଇ କ୍ୟାପିଟାଲ ହସ୍ପିଟାଲ ସଂପୃକ୍ତ ରୋଗୀଙ୍କୁ ଚିକିତ୍ସା କରିଥିବା ଡାକ୍ତରଙ୍କୁ କାଜୁଆଲଟିରୁ ହଟାଇ ଦେଇଛି । ଏଥିସହ ତାଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି । ଦୁଇ ଜଣିଆ କମିଟି ଅଭିଯୋଗର ଯାଞ୍ଚ କରି ହସ୍ପିଟାଲ ନିର୍ଦ୍ଦେଶକଙ୍କୁ ରିପୋର୍ଟ ଦେବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଏଥିସହ ହସ୍ପିଟାଲର ଅନ୍ୟ ଡାକ୍ତରଙ୍କୁ ରୋଗୀଙ୍କୁ ଚିକିତ୍ସାରେ ଅବହେଳା ନକରିବାକୁ ତାଗିଦ କରାଯାଇଥିବା ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଗତ ଶୁକ୍ରବାର ଧଉଳି ଥାନା ଅନ୍ତର୍ଗତ କୁମାରଡିହ ଗାଁର ୫୧ ବର୍ଷ ବୟସ୍କ ଦୁଃଶାସନ ସାହୁଙ୍କ ଛାତିରେ ଯନ୍ତ୍ରଣା ହେବାରୁ କ୍ୟାପିଟାଲ ହସ୍ପିଟାଲ ଆଣିଥିଲେ ପରିବାର । ମେଡିକାଲରେ ଆଡମିଟ କରାଇବାକୁ ଡାକ୍ତରଙ୍କୁ ଅନୁରୋଧ କରିଥିଲେ । ହେଲେ କାଜୁଆଲଟି ବିଭାଗରେ ଥିବା ଡାକ୍ତର ଦୁଃଶାସନକୁ ଗ୍ୟାସ ହୋଇଛି କହି ଏକ ଇଞ୍ଜେକସନ ଦେଇଥିଲେ । ଯନ୍ତ୍ରଣା ନକମିବାରୁ ମେଡିସିନ ଓପିଡିକୁ ପଠାଇଥିଲେ । ସେଠାରୁ ପୁଣି ଅନ୍ୟ ବିଭାଗକୁ ତାଙ୍କୁ ପଠାଯାଇଥିବା ଅଭିଯୋଗ କରିଛନ୍ତି ପରିବାର । ରୋଗୀଙ୍କୁ ଧରି ବିଭାଗ ପରେ ବିଭାଗ ବୁଲି ନିରାଶ ହୋଇ ଘରକୁ ଫେରିବା ବାଟରେ ଦୁଃଶାସନ ଅଚେତ ହୋଇଯାଇଥିଲେ । ପୁଣି କ୍ୟାପିଟାଲ ହସ୍ପିଟାଲ ଆସିବା ପରେ ତାଙ୍କୁ ମୃତ ଘୋଷଣା କରିଥିଲେ ଡାକ୍ତର । ସନ୍ଦେହର କଥା ହେଉଛି, ପରିବାର ଠାରୁ ଲେଖିଥିବା ପ୍ରେସକ୍ରିପସନକୁ ଡାକ୍ତର ନେଇଯାଇ ଆଉ ଫେରାଇନଥିଲେ । ଏହାପରେ ହସ୍ପିଟାଲ ଫାଣ୍ଡିରେ ଭୁଲ ଇଞ୍ଜେକସନ ଯୋଗୁ ମୃତ୍ୟୁ ହୋଇଥିବା ଅଭିଯୋଗ କରିଛନ୍ତି ପରିବାର ।
କ୍ୟାପିଟାଲ ହସ୍ପିଟାଲରେ ଦୁଃଶାସନକୁ ଚିକିତ୍ସା କରିବାରେ ଅବହେଳା ହୋଇଥିବା ମାନିଛନ୍ତି ସୁପରଟେଣ୍ଡେଣ୍ଟ । ପ୍ରଶ୍ନ ଉଠୁଛି ଦୁଃଶାସନଙ୍କ ମୃତ୍ୟୁ ପାଇଁ କିଏ ଦାୟୀ? ରୋଗୀଙ୍କ ଜୀବନ ସହ ଖେଳ ଖେଳିଥିବା ଡାକ୍ତରଙ୍କୁ କାର୍ଯ୍ୟରୁ ହଟାଇ ଦେବା ଏକ ଦଣ୍ଡ କି? ସଂପୃକ୍ତ ଡାକ୍ତରଙ୍କ ଲାଇସେନ୍ସ ରଦ୍ଦ ହେବ ନାହିଁ କାହିଁକି?