ମୁମ୍ବାଇର ଏଲଫିନଷ୍ଟେନ୍ ଷ୍ଟେସନରେ ଅଘଟଣ! ଯାତ୍ରୀଙ୍କୁ ଭ୍ରମିତ କରିଦେଲା ଗୁଜବ
କନକ ବ୍ୟୁରୋ : ଟ୍ରେନ୍ ସେବାକୁ ମୁମ୍ବାଇର ଜୀବନରେଖା ବୋଲି କୁହାଯାଏ । ପ୍ରାୟ ୩ ହଜାର ଲୋକାଲ୍ ଟ୍ରେନରେ ଯାତ୍ରା କରନ୍ତି ପାଖାପାଖି ୭୫ ଲକ୍ଷ ଯାତ୍ରୀ । ଆଜି ଯେତେବେଳେ ଏଲଫିନଷ୍ଟେନ୍ ଷ୍ଟେସନରେ ଘଟିଥିବା ଅଘଟଣ, ନିଶ୍ଚିତ ଭାବରେ ଯାତ୍ରୀଙ୍କ ସୁରକ୍ଷା ନେଇ ସୃଷ୍ଟି କରିଛି ଏକ ବଡ ପ୍ରଶ୍ନବାଚୀ । ତେବେ କେମତି ଘଟିଥିଲା ଏହି ଦଳଚକଟା ? କେଉଁ ପରିସ୍ଥିତିରେ ପ୍ରାଣ ହରାଇଲେ ୨୨ ଜଣ ବ୍ୟକ୍ତି ?
Kanak News is now on WhatsApp
Join and get latest news updates delivered to you via WhatsApp
ସବୁ ଦିନ ଭଳି ଆଜି ବି ସ୍ୱାଭାବିକ ଚାଲିଥିଲା ଦେଶର ଆର୍ଥିକ ରାଜଧାନୀ ମୁମ୍ବାଇର ବ୍ୟସ୍ତ ବହୁଳ ଜୀବନ ଯାତ୍ରା । କିଏ ଅଫିସ୍ ଯାଉଥିଲା, ତ କିଏ ଘରକୁ ଫେରୁଥିଲା । ଏଲଫିନଷ୍ଟେନ୍ ଏବଂ ପରେଲ ଷ୍ଟେସନକୁ ସଂଯୋଗ କରୁଥିବା ପାଦଚଲା ଓଭରବ୍ରିଜରେ ସେମିତି ଯା-ଆସ କରୁଥିଲେ ଲୋକ । ବ୍ୟସ୍ତବହୁଳ ସୂଚୀ, ଜନଗହଳିର ସ୍ୱର ଆଉ ତା’ସହ ମୁମ୍ବାଇର ବର୍ଷା। ଝିପି ଝିପି ବର୍ଷା ଦାଉରୁ ଯାତ୍ରୀଙ୍କ ଆଶ୍ରୟର ଠିକଣା ଥିଲା, ୧୦୬ ବର୍ଷର ପୁରୁଣା ଏହି ପାଦଚଲା ଓଭର ବ୍ରିଜ୍ । ଅଣ ଓସାରିଆ ପୋଲ ଉପରେ ଶତାଧିକ ଲୋକଙ୍କ ଗହଳି । ଠିକ୍ ଏହି ସମୟରେ ଖସି ଯାଇଥିଲା ଜଣେ ଯାତ୍ରୀଙ୍କ ପାଦ । ଦୋହଲିଗଲା ପୁରା ସନ୍ତୁଳନ । ଆଉ ଏହାରି ଭିତରେ ପୁରା ମାହୋଲକୁ ଭ୍ରମିତ କରିଦେଲା ଗୁଜବ୍ ।
ଓଭରବ୍ରିଜରୁ ତଳକୁ ଓହ୍ଲାଇବା ପାଇଁ ଏତେ ଜୋରରେ ପ୍ରତିଯୋଗିତା ହେଲା ଯେ, ଆପଣାଛାଁଏ ଜନଗହଳି ନେଇଗଲା ଦଳାଚକଟାର ରୂପ । ଚାହିୁଁଚାହୁଁ ଚାଲିଗଲା ସଂଖ୍ୟାଧିକ ଜୀବନ । ମୁଖ୍ୟତଃ ଦୁଇଟି ଗୁଜବ, ଏବେ ଏତେ ବଡ ଏକ ଅଘଟଣ ପାଇଁ ଦାୟୀ ବୋଲି କୁହାଯାଉଛି । ଓଭରବ୍ରିଜ୍ ଭୁଷୁଡିବାର ଗୁଜବ୍ ଏବଂ ସଟ୍ ସର୍କିଟ୍ ହେବାର ଗୁଜବ୍ ଯେମିତି ବିଗାଡ଼ି ଦେଲା ପୁରା ଏଲଫିନଷ୍ଟେନର ମାହୋଲ । ଯେଉଁ ଟ୍ରେନ୍ ସେବାକୁ ମୁମ୍ବାଇର ଜୀବନ ରେଖା ବୋଲି କୁହାଯାଏ, ସେହି ଜୀବନ- ରେଖା ସାମ୍ନାରେ ଘଟିଗଲା ବଡଧରଣର ଅଘଟଣ । ଆଉ ଏହି ଘଟଣା, ପ୍ରାୟ ୩ହଜାର ଲୋକାଲ୍ ଟ୍ରେନରେ ଯାତ୍ରା କରୁଥିବା ପାଖାପାଖି ୭୫ ଲକ୍ଷ ଯାତ୍ରୀଙ୍କ ସୁରକ୍ଷା ଉପରେ ଏକ ପ୍ରଶ୍ନଚିହ୍ନ ସୃଷ୍ଟି କରିଛି ।