ଅଟା ହେଉଛି ମହଙ୍ଗା, ବର୍ଷକରେ ବଢ଼ିଲାଣି ୪୦ପ୍ରତିଶତ। ୪୦ରୁ ୪୫ଟଙ୍କାରେ ପହଞ୍ଚିଲା କିଲୋ ପିଛା ପ୍ୟାକେଟ ଅଟା ଦାମ।
କନକ ବ୍ୟୁରୋ: ଦେଶରେ ଅଟାଦର ବଢୁଛି । ଯାହା ଖାଉଟିଙ୍କ ପାଇଁ ଚିନ୍ତାର ବିଷୟ ହୋଇଛି । ସବୁଠାରୁ ବଡ କଥା ହେଲା, ଯଦି ସରକାର ଆଗକୁ ଖୋଲା ବଜାରରେ ଗହମ ନ ଛାଡନ୍ତି ହୁଏତ ଅଟାର ଦାମ ଆହୁରି ବଢିପାରେ ।
Kanak News is now on WhatsApp
Join and get latest news updates delivered to you via WhatsApp
ବର୍ତ୍ତମାନ ବଜାରରେ ଖୋଲା ଅଟା କିଲୋପ୍ରତି ୩୮ରୁ ୪୦ଟଙ୍କାରେ ବିକ୍ରି ହେଉଥିବା ବେଳେ ପ୍ୟାକେଟ ଅଟା ୪୦ରୁ ୪୫ଟଙ୍କାରେ ବିକ୍ରି ହେଉଛି । ଗତବର୍ଷ ଜାନୁୟାରୀରେ ଅଟା ଦର ଯାହା ରହିଥିଲା ତାହା ଏବେ ୪୦% ମହଙ୍ଗା ହୋଇଛି । କୁହାଯାଉଛି, ସରକାର ଯଦି ଗଚ୍ଛିତ ରଖିଥିବା ଗହମ ବଜାରକୁ ନଛାଡ଼ନ୍ତି, ତାହେଲେ ଅଟାଦର ଆହୁରି ବଢ଼ିବାର ସମ୍ଭାବନା ରହିଛି । ରପ୍ତାନୀ ଉପରେ କଟକଣା ଲଗାଯାଇଥିଲେ ବି ଜାନୁଆରୀରେ ଗହମ ଦର ୭ରୁ ୧୦ ପ୍ରତିଶତ ବଢ଼ିଛି । ଗହମର ମୂଲ୍ୟବୃଦ୍ଧିର ପ୍ରଭାବ ଅଟା ଦର ଉପରେ ମଧ୍ୟ ପଡ଼ୁଛି । ଭୁବନେଶ୍ୱରରେ ଅଟା କିଲୋପ୍ରତି ଗତବର୍ଷ ତୁଳନାରେ ୪ରୁ ୮ ଟଙ୍କା ବଢିଛି ।ଓଡ଼ିଶାକୁ ମୁଖ୍ୟତଃ ପଞ୍ଜାବ ଓ ହରିୟାଣାରୁ ଗହମ ଆସିଥାଏ । ଗହମର ଦର ବଢିଥିବାରୁ ଏହାର ପ୍ରଭାବ ଗହମରୁ ତିଆରି ହେଉଥିବା ଅନ୍ୟ ଉତ୍ପାଦ ଉପରେ ବି ପଡିଛି । ଅର୍ଥାତ ସୁଜି, ମଇଦା ଓବ୍ରାଉନ ବ୍ରେଡର ମଧ୍ୟ ଦର ବୃଦ୍ଧି ଘଟିଛି । ଭୁବନେଶ୍ୱର ବଜାରରେ ତୁଳନାତ୍ମକ ଭାବେ ଦେଖିଲେ
ଉତ୍ପାଦ ଜାନୁଆରୀ ୨୨ ଜାନୁଆରୀ ୨୩
ଗହମ(୧ କ୍ୱିଂଟାଲ) ୧୯୦୦ ୩,୨୦୦
ଅଟା (କିଲୋପ୍ରତି) ୨୮-୩୦ ୪୦-୪୨
(ଖୋଲାବଜାର)
ଅଟା (କିଲୋପ୍ରତି)ବ୍ରାଣ୍ଡେଡ ୩୦–୩୨ ୪୦-୪୫
ସୁଜି(କିଲୋପ୍ରତି) ୩୨-୩୫ ୪୫-୫୦
ଗହମ ଉତ୍ପାଦନରେ ହ୍ରାସ ଓ ଭାରତର ଗହମକୁ ବାହାରକୁ ରପ୍ତାନୀ ପାଇଁ କମ୍ପାନୀଗୁଡିକ ଆଗ୍ରହ ପ୍ରକାଶ କରୁଥିବାରୁ ଅଟା ଦର ବଢୁଥିବା କୁହାଯାଉଛି ।
ଅଟାଦର କମାଇବାକୁ ଉଭୟ କେନ୍ଦ୍ର ଓ ରାଜ୍ୟ ସରକାର ତତ୍ପର ହୋଇପଡ଼ିଛନ୍ତି । ଖୋଲା ବଜାରରେ ୩୦ ଲକ୍ଷ ଟନ୍ ଗହମ ବିକ୍ରିି କରିବାକୁ କେନ୍ଦ୍ର ସରକାର ନିଷ୍ପତି ନେଇଛନ୍ତି । କେନ୍ଦ୍ର ସରକାର ବଫର ଷ୍ଟକରୁ ଏହି ଗହମ ବିକିବେ । ଏହାକୁ ଖୋଲା ବଜାରରେ ବିକ୍ରି କରାଯିବ । ଗହମ ଷ୍ଟକକୁ ଅଟାକଳ ଓ ବ୍ୟବସାୟୀଙ୍କୁ ଯୋଗାଇ ଦିଆଯିବ । ଏଥିପାଇଁ ଏଫସିଆଇକୁ କେନ୍ଦ୍ର ସରକାର ଅନୁମତି ଦେଇସାରିଛନ୍ତି । ଅନ୍ୟପକ୍ଷରେ ରାଜ୍ୟ ସରକାର ମଧ୍ୟ ପଦକ୍ଷେପ ନେବା ଆରମ୍ଭ କରିଛନ୍ତି । ଭାରତୀୟ ଖାଦ୍ୟ ନିଗମ, ଏଫସିଆଇ ଓଡ଼ିଶା ପକ୍ଷରୁ ୪୬ ହଜାର ମେଟ୍ରିକ ଟନ୍ ଗହମ ଟେଣ୍ଡର କରାଯାଇଛି ।